Բանակում չարաշահումների մասին խոսողներն այսօր պաշտոններ են զբաղեցնում, թող զբաղվեն դրանով. Վիտալի Բալասանյան

«Ուզում եմ շնորհակալական խոսք ասել և գլուխ խոնարհել բոլոր նահատակների առաջ, նամանավանդ՝ հետպատերազմյա տարիների, երբ 94թ.-ի մայիսին ժամանակավոր հրադադարի պայմանագիր կնքեցինք, բայց չունեցանք այն ստատուսը, որ կբերեր խաղաղության: Ուզում եմ համայն հայությանը շնորհավորել, սա բոլորիս աշխատանքն է: Տա Աստված, որ մեր ժողովուրդը կամք, կորով և ուժ ունենա՝ մեր պետականությունը պահպանելու համար», – հունվարի 28-ին լրագրողների հետ զրույցում ասաց Արցախի անվտանգության խորհրդի քարտուղար Վիտալի Բալասանյանը:

Հարցին, թե վերջին բացահայտումների ֆոնին կարելի՞ է արդյոք ասել, որ բանակն անխնա թալանվել է և չի եղել վերահսկողություն, Վիտալի Բալասյանը հորդորեց օդից կախված խոսակցություններին չհավատալ:

«Համապատասխան ուժային, իրավապահ կառույցները զբաղվում են: Բոլոր նրանք, ովքեր խոսում էին այդ մասին, այսօր պաշտոններ են զբաղեցնում, եթե կան այդպիսի դեպքեր, ապա համապատասխան որոշում կկայացնեն: Հիմա կա՞ դատարանի վճիռ, քանի՞ քրեական գործ է հարուցվել, որ իմանանք ու խոսենք այդ մասին: Կարո՞ղ է միայն բանակում են այդպիսի բացթողումներ եղել: Բոլոր կառույցներում էլ եղել են: Եթե ամեն մարդ իր պարտականությունները պատշաճ կատարի, նման բացթողումներ չենք ունենա», – ասաց Բալասանյանը:

Լրագրողները հետաքրքրվեցին նաև տարածքային ամբողջականության և տարածքների հանձման մասին Ադրբեջանի նախագահի և ռուս քաղաքական գործիչների հայտարարություններից, ինչին ի պատասխան՝ Վիտալի Բալասանյանն այդ երկրների ղեկավարներին և այլ երկրների քաղաքական գործիչներին խորհուրդ տվեց տարածքային ամբողջականության մասին խոսելուց առաջ նախ հստակ էքսկուրս անել, տեսնել, թե ե՞րբ է Ադրբեջանը հայտնվել քաղաքական քարտեզի վրա, ե՞րբ է հայտնվել Ադրբեջանի այսօրվա հանրապետությունը, ի՞նչ տարածքի վրա, ի՞նչ սահմաններով,  իրավական ի՞նչ փաստաթղթերով կամ ո՞ր երկրի, որ միջազգային կառույցների կողմից է ճանաչվել այդ երկիրը:

«Երբ Խորհրդային միությունը նորից վերականգնի իր սահամանները, չի բացառվում, որ ԽՍՀՄ տարածքային ամբողջականությունը որևէ երկիր չճանաչի: Եթե ԽՍՀՄ-ը վերականգնվի, այդ ժամանակ աշխարհը կորոշի, մենք կմտածենք, իսկ այժմ տարածքային ամբողջականության մասին խոսելն աբսուրդ է, ծիծաղելի բան է: Բոլոր այն պետությունները, որոնք այսօր քաղաքական քարտեզի վրա են, բոլորը պատերազմների արդյունքում գծված պետական սահմաններով են», – նշեց Բալասանյանը:

Լրագրողներից մեկը հարցրեց նաև Վիտալի Բալասանյանի կարծիքը պաշտպանության նախկին նախարար Սեյրան Օհանյանին Մարտի 1-ի գործով հարցաքննության կանչելու վերաբերյալ:

«Պետք է լուրջ ուսումնասիրել այդ Մարտի 1-ի գործերը, երբ մարդիկ ասում են՝ արդեն բացահայտվել է, ըստ իս՝ դեռ չի բացահայտվել: Բացահայտվել է, թե ոչ, դա քննությունը և դատարանը կորոշի: Կարող է վաղն ինձ էլ Մարտի 1-ի գործով հարցաքննեն, որ ես այդ օրերին ապրել եմ Արցախում: Թող կանչեն, թող գնան համապատասխան բացատրություններ տան: Այստեղ որևէ խնդիր չկա: Իսկ ինչ վերաբերում է ԶՈՒ-ին դրանով վնասելուն, ապա միանշանակ պետական պաշտոն զբաղեցնողն իրավունք չունի որևէ մեկին մեղադրի, մեղադրի այն ինստիտուտին, որ պետական սահմաններն է պաշտպանում», – ասաց Արցախի անվտանգության խորհրդի քարտուղարը:

Մանրամասները՝ տեսանյութում: