Կառավարությունն այսօր սոցիալական նպաստներին վերաբերող որոշում է ընդունել

Կառավարությունն այսօր հերթական նիստն է գումարել: Օրակարգում է ՀՀ կառավարության 2014 թվականի հունվարի 30-ի 145 N որոշման մեջ լրացում կատարելու մասին հարցը:

«Կառավարության նշված որոշմամբ կարգավորվում է պետական նպաստների մասին օրենքի կիրարկման ապահովումը: Երկրորդ հավելվածով հաստատված է ընտանիքների անապահովության գնահատման կարգը: Անապահովության աստիճանի գնահատման համար օգտագործվում են մի շարք բնութագրիչներ, այդ թվում՝ ընտանիքի եկամուտը, կենսաթոշակը, ծերության, հաշմանդամության, կերակրողին կորցնելու դեպքում ստացված նպաստները»,- ասաց ՀՀ աշխատանքի և սոցիալական հարցերի փոխնախարար Արսեն Մանուկյանը:

2018 թվականի նոյեմբերի 29-ին հաստատված փոփոխություններով՝ 2019 թվականի հունվարից բարձրացել է ծերության, հաշմանդամության, և կերակրողին կորցնելու դեպքում նպաստների չափերը՝ սահմանվելով 25.500 դրամ, ինչը կարող է բացասաբար անդրադառնալ ապահովության համակարգում հաշվառված մի շարք ընտանիքների վրա:

«Նախագծի ընդունմամբ հնարավոր կլինի բացառել այն դեպքերը, երբ ընտանիքին ավելի վճարելով դիցուք 6500 կամ 4000 դրամ, ընտանիքը զրկվելու է նպաստի 18 հազար դրամից: Ես օրինակ բերեմ, որպեսզի պարզ լինի, թե ինչի մասին է խոսքը. ծերության նպաստ մենք վճարում ենք այն անձանց, ովքեր չունեն աշխատանքային կենսաթոշակի իրավունք, եթե նրանց ծերության նպաստի չափը սահմանված էր 16 հազար դրամ, ներկայումս՝ հունվարի 1-ից, նրանք ստանում են 25 հազար 500 դրամ: Եվ եթե նույն ծերության նպաստ ստացող անձը նպաստառու է մեր համակարգում, ինքն, ի լրում դրան, ստանում է 18 հազար դրամ: Կան 804 ընտանիքներ, որոնց դեպքում, եթե ավելացնում ենք նախատեսված հավելագրումները, նրանք զրկվում են իրենց 18 հազար դրամից: Նշված փոփոխություններով հնարավոր կլինի խուսափել դրանից, և նրանք կստանան թե՛ 25 հազար դրամը, թե՛ 18 հազար դրամը», – ասաց Մանուկյանը:

ՀՀ վարչապետ Նիկոլ Փաշինյանն ընդգծեց, որ օրենքը պետք է հնարավորինս արագ ընդունել ԱԺ-ում, որպեսզի մարդիկ կառավարության հայտարարած փաստացի չափով նվազագույն կենսաթոշակ և նպաստ ստանան:

«Իմ կողմից նշված նպաստառուները՝ ծերության, հաշմանդամության և կերակրողին կորցնելու համար նպաստ ստացողները, հունվարի 1-ից ստանում են 25 հազար 500 դրամ»,- հավելել է  ՀՀ աշխատանքի և սոցիալական հարցերի փոխնախարարը:

ՀՀ վարչապետը հետաքրքրվել է, թե քանի՞ մարդ է, որ օրենքի պատճառով ստիպված է սպասել.

«64 հազար մարդ արդեն իսկ ստանում է 25 հազար 500 դրամի չափով, 20 հազար մարդ կստանա, երբ որ մենք օրենքի փոփոխությունը կանենք: Այսինքն՝ 25 հազար 500 դրամը նշված 20 հազար մարդիկ կստանան մարտ ամսին, բայց մենք հետադարձ ուժ ենք տալու, որպեսզի հունվարի 1-ից նրանք էլ ստանան»,- ասել է Մանուկյանը՝ հավելելով, որ վերահաշվարկ կկատարվի, և պակասող մասը կվճարվի:

Կառավարությունն ընդունել է ՀՀ կառավարության 2014 թվականի հունվարի 30-ի 145 N որոշման մեջ լրացում կատարելու մասին որոշումը: