Զինվորական ավտոբուսի վրա հարձակվածներից մեկը նախկինում դատապարտվել է զորամասում սպային քաշքշելու համար. մանրամասներ

Երեկ զինվորական ավտոբուսի վրա հարձակված երիտասարդներից մեկը ձերբակալվել է, իսկ միջադեպից հետո փախուստի մեջ գտնվող մյուս ակտիվ մասնակիցը Մերուժան Ոսկանյանն է, որը նախկինում դատապարտվել է զինծառայության ընթացքում եղած միջադեպի հետևանքով։ Այդ միջադեպը եղել է 2015 թվականի սեպտեմբերին, երբ Ոսկանյանը ծառայել է Արցախի զորամասերից մեկում՝ որպես հետախույզ։

«Դատալեքսից» տեղեկանում ենք, որ վաշտի անձնակազմի հետ Ոսկանյանը սեպտեմբերի 18-ի առավոտյան հանդերձավորվել է զենք-զինամթերքով, սաղավարտով և զրահաբաճկոնով` ուսումնական դաշտ մեկնելու և պարապմունք անցկացնելու համար: Զորանոցից դուրս գալու ժամանակ նա զայրացած անհիմն հայհոյանք է հնչեցրել, որի համար զորամասի հերթապահ, ավագ լեյտենանտ Սուրիկ Վահանի Բաբայանը զորամասի շտաբի շենքի մոտակայքում իր մոտ է կանչել Մերուժան Ոսկանյանին, հարցրել, թե ում է ուղղված հայհոյանքը, և փորձել է նրան հանգստացնել:

Դատարան ուղարկված քրեական գործի նյութերի և մեղադրական եզրակացության համաձայն՝ Մերուժան Ոսկանյանը պատասխանել է, որ հայհոյանքը բոլորին է ուղղված:

Զորամասի հերթապահ Սուրիկ Բաբայանը նախատել է Մերուժան Ոսկանյանին և բացատրել, որ չի կարելի հայհոյել: Բացատրական զրույցի ընթացքում, սակայն, Մերուժան Ոսկանյանը թքել է գետնին, շրջվել է, որպեսզի հեռանա: Սուրիկ Բաբայանը, նկատելով, որ Մերուժան Ոսկանյանը արհամարհում է իր բացատրական զրույցը, երկու ձեռքով բռնել է Ոսկանյանի զրահաբաճկոնից, դադարեցրել նրա ընթացքը և փորձել կարգի հրավիրել նրան:

Այդ ընթացքում Մերուժան Ոսկանյանը վիճաբանության մեջ է մտել իր նկատմամբ պետ հանդիսացող Բաբայանի հետ, քաշքշել է նրան, հայհոյանք է հնչեցրել և բռունցքով հարվածել է նրա ձախ ուսի շրջանին, իրեն ամրակցված ինքնաձիգի մետաղյա խզակոթով էլ հարվածել է Բաբայանի ոտնաթաթին։ Դրան ի պատասխան՝ սպա Սուրիկ Բաբայանը, հայհոյանք է հնչեցրել Ոսկանյանի հասցեին, հարվածել կրծքավանդակին, քաշքշել և ծնկով հարվածել նրա գլխին:

Միջադեպին հաջորդած երկարատև դատավարությունից հետո՝ 2016 թվականի դեկտեմբերին զինծառայողը՝ Ոսկանյանը, որ նաև երեկվա միջադեպի մասնակից է, դատապարտվել է 4 տարվա ազատազրկման, ինչը սակայն պայմանականորեն չի կիրառվել ու նրա նկատմամբ սահմանվել է 1 տարի փորձաշրջան։

Սպայի դեպքում դատական գործն ավելի է ձգձգվել։ Նրան դատարանը 3 ամսվա ազատազրկման է դատապարտել, բայց քանի որ սպան ուներ նախկին դատվածություն ու հսկողության տակ էր, 3 ամսին գումարվել է ևս 4 ամիս ժամկետ։ Այս 7 ամսվա ազատազրկումը նույնպես պայմանականորեն չի կիրառվել, ու սահմանվել է 2 տարի փորձաշրջան։

2017 թվականին վերաքննիչ բողոքի հիման վրա գործը վերաբացվել է, քանի որ նոր եզրակացության համաձայն՝ Ոսկանյանին քաշքշելիս սպան սեռական բնույթի հայհոյանք հնչեցնելով` անպարկեշտ ձևով ստորացրել է նրա պատիվն ու արժանապատվությունը։ 2018 թվականի սեպտեմբերին՝ բուն միջադեպից երեք տարի անց դատարանը կայացրել է նոր որոշում, որով Ոսկանյանի հետ վիճաբանություն արած սպան ազատվել է հետապնդումից, քանի որ ենթադրվող հանցագործության վաղեմության ժամկետն անցել է։

Գործից, սակայն, հայտնի են դառնում որոշ մանրամասներ, որոնք բնութագրում են երեկվա միջադեպի մասնակից Ոսկանյանին։ Մասնավորապես 2015 թվականի միջադեպից հետո վիճաբանության մեջ մտած սպային դատապարտելիս դատարանը որպես մեղմացնող հանգամանք է դիտարկել նաև այն, որ նրա արարքը մեծապես պայմանավորված է եղել սահմանափակ մեղսունակության վիճակում գտնվող Մերուժան Ոսկանյանի հակաիրավական՝ հանցավոր և հակաբարոյական վարքագծի դրսևորմամբ: Իսկ Մերուժան Ոսկանյանը դատարանին հայտնել է, որ հաշտվել է Սուրիկ Բաբայանի հետ և նրանից որևէ պահանջ չունի։

Ինչ վերաբերում է երեկվա միջադեպին, ապա փաստի կապակցությամբ 08.01.2019թ. ՀՀ ՊՆ ռազմական ոստիկանությունում ՀՀ Քրեական օրենսգրքի 258-րդ հոդվածի 3-րդ մասի 1-ին կետի հատկանիշներով հարուցվել է քրեական գործ:

Այս հոդվածի համաձայն՝ հանցագործության նկարագրությունն այսպիսին է․ «Խուլիգանություն՝ դիտավորությամբ հասարակական կարգը կոպիտ կերպով խախտելը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով, և որը կատարվել է մի խումբ անձանց կամ կազմակերպված խմբի կողմից»։

Քրեական օրենսգրքի այս կետի հատկանիշներով հարձակման մասնակիցները կարող են պատժվել տուգանքով՝ նվազագույն աշխատավարձի երկուհարյուրապատիկից հինգհարյուրապատիկի չափով (համապատասխանում է 200 հազարից 500 հազար դրամին), կամ ազատազրկմամբ` առավելագույնը հինգ տարի ժամկետով: