Բնակարան 9 անչափահաս ունեցող ընտանիքին. Շիրակի մարզում հրատապ խնդիրների լուծման ծրագրով շինարարությունն ուշանում է

Առաջնահերթ լուծում պահանջող խնդիրների ծրագրով Շիրակի մարզի 16 շինություններում և ենթակառուցվածքներում վերանորոգման աշխատանքներ են տարվելու: Ցանկը հաստատվել էր 3 ամիս առաջ, բայց գործը շինարարական փուլին այդպես էլ չհասավ: Պատասխանատուները ձգձգումների պատճառ են բերում նախագծային շտկումները:

Այս ծրագրով, թերևս, ժամանակին միայն լուծում է ստացել մարզի 3 ընտանիքների բնակարանային խնդիրը: Առափի, Ջրառատ և Պեմզաշեն գյուղերի 3 ընտանիքի բնակարանների գնման վկայագրեր են տրվել, նրանք էլ արդեն հասցրել են բնակարաններ գնել:

Ջրառատ գյուղում 75 քառակուսի մետր մակերեսով այս տանն ապրում է Ալոյանների բազմանդամ ընտանիքը: 9 երեխա է մեծանում, մեծը 13 տարեկան է, փոքրը՝ 8 ամսական: Ընտանիքի հայրն ասում է, որ տունը միշտ էլ խնդիրներ է ունեցել, բայց իրենք անընդհատ մտածել են, որ կարևորն առողջ երեխաների ծնունդն է: 1 սենյակում հիմա 4 երեխաներով են քնում, երկհարկանի մահճակալներն էլ չեն օգնել, որ փոքր տանը ազատ տարածք շատ լինի:

Տարիներ առաջ միայն 1 սենյակում էին բոլորով ապրում, հետո նոր տարածք ավելացրին, բայց դա էլ չբավականացրեց բազմադամ ընտանիքին: Տան հարցով ամիսներ առաջ դիմել էին մարզպետարան: Ընտանիքն անսպասելիորեն մեկ ամիս առաջ տեղեկացավ, որ հատկացվելու է 5 սենյականոց բնակարանի գնման վկայագիր՝ 11 մլն դրամ արժեքով: Նրանք ընդամենը 20 օր ունեին բնակարանի գործարքը կատարելու համար ու հասցրեցին:

Ալոյանները նույն գյուղում արդեն տուն են գնել: Եղածից մակերեսով կրկնակի մեծ է, միայն թե ներքին հարդարման գործեր կան:

Կառնուտի դպրոցը նույնպես հրատապի ծրագրում է հայտնվել: Ընդամենը 16 տարի առաջ գյուղի համար նոր դպրոց էր կառուցվել: Բայց նորի կառուցումով խնդիրները չեն պակասել: Մի քանի ամիս առաջ փլուզվել է դպրոցի սանհանգույցը:

Դպրոցի տնօրեն Հայկուհի Հովհաննիսյանի խոսքով՝ միանգամից փլուզվել էին սանհանգույցի միջնապատերը, բարեբախտաբար, դա տեղի էր ունեցել այն ժամանակ, երբ այնտեղ երեխաներ չկային:

Սանհանգույցի խնդիրը դպրոցում 2008 թվականից է առկա: Դպրոցի կոյուղաջրերը տարիներով կուտակվել են շենքի հիմքի տակ և 50-70 սմ խորությամբ ստորգետնյա դատարկություն են ստեղծել, որի հետևանքով փլուզում է տեղի ունեցել:

Դպրոցի ջեռուցման համակարգում էլ խնդիրները քիչ չեն: Էլեկտրական մարտկոցներով է տաքացվում, իսկ ծանրաբեռնվածությանը հոսանքագծերը չեն դիմանում և հաճախ հրդեհավտանգ իրավիճակ է ստեղծվում: Դրանից խուսափելու համար միջանցքները չեն ջեռուցում, դասարաններում էլ հազիվ 15 աստիճան ջերմություն է ապահովվում:

Նորակառույց այս դպրոցի վերանորոգման համար դեռևս 14 մլն դրամի աշխատանք է կատարվելու: Բայց շինաշխատանքների մեկնարկն ուշանում է ոչ միայն այստեղ: Նախագծային թերություններն են վերացվում: Ընդհանուր առմամբ, ավելի քան 400 մլն դրամ է հատկացված Շիրակի մարզի հրատապ խնդիրների լուծման այս ծրագրի համար: Մարզպետարանը ավելի քան 1 մլրդ դրամի ծրագիր էր ներկայացրել հաստատման, դրանց մեծ մասը մերժվել է: