Գործադուլ Շիրակի պետական համալսարանի ավագ դպրոցում

Շիրակի Պետական համալսարանի ավագ դպրոցի մանկավարժները գործադուլ են հայտարարել: Նրանք պահանջում են իրենց 100 տոկոսով վճարել 13-րդ աշխատավարձը: Մանկավարժները պնդում են, որ բուհի տնօրինությունը ցուցաբերել է խտրական վերաբերմունք: Գիտխորհրդի նիստում որոշում է կայացվել 13-րդ աշխատավարձը 100 տոկոսով վճարել միայն համալսարանի դասախոսներին, իսկ ավագ դպրոցի մանկավարժների համար սահմանել սիմվոլիկ գումար:

Ավագ դպրոցի 56 մանկավարժները դասասենյակներում գտնվելու փոխարեն հավաքվել էին ուսուցչանոցում, գործադուլ էին հայտարարել ու աշակերտներին տուն ուղարկել, իսկ  դժգորհության պատճառը, ըստ մանկավարժների, խտրական վերաբերմունքն է նույն բուհի երկու կրթական հաստատությունների միջև:

«Եթե մենք նույն կառույցում ենք աշխատում, ուրեմն պետք է ստանանք նույն պարգևավճարը, ինչ ստանում են ինստիտուտում»,- դժգոհել է  ՇՊՀ ավագ դպրոցի ուսուցիչ Նունե Սարգսյանը:

«Ինչո՞ւ է նույն հիմնարկի մի մասը ստանում պարգևավճարը 100 տոկոսի չափով, մյուս մասին տալիս են ինչ-որ սիմվոլիկ գումար»,- մանկավարժական հանրույթի զայրույթն է արտահայտել  ՇՊՀ ավագ դպրոցի ուսուցիչ Աշոտ Դավինյանը:

Իսկ սիմվոլիկ գումարը ավագ դպրոցի ուսուցիչների համար սահմանվել է 40 հազար դրամ: Գիտխորհուրդն է նման որոշում կայացրել: Իսկ, թե ինչու է տարբերակում դրվել դասախոսների ու մանկավարժների միջև, այս հարցի պատասխանը գործադուլ հայտարարած ուսուցիչների հետ հանդիպման եկած հոգաբարձուների խորհրդի անդամներն էլ չեն ունեցել: Միայն նշել են , որ բուհը ֆինանսական խնդիրներ ունի: Մանկավարժները դա հիմնավոր պատճառ չեն համարել:

«Եթե ունենք ֆինանսական խնդիր, ասեք մենք մտնենք էդ դրության մեջ, բայց թող բոլորին հավասար, ենթադրենք 70-80 հազար դրամ  տրամադրեն, ոչ թե տարբերակեն»,- բացատրություն է պահանջել  ՇՊՀ ավագ դպրոցի ուսուցիչ  Մելինե Խաչատրյանը:

«Եթե տարեվերջին տրվում է էդ պարգևավճարը, ուրեմն դրա համար կան միջոցներ, հիմա մեզ համար անհասկանալի է, թե ինչպես կարող է երկու ստորաբաժանումներից մեկի համար ֆինանսական միջոցները բավարար լինեն, մյուսի համար ՝ ոչ»,- զարմացել է  ՇՊՀ ավագ դպրոցի ուսուցիչ Նարինե Եղիազարյանը:

Հոգաբարձուների խորհրդի անդամների գործառույթները սահմանափակվեցին միայն խնդիրն արձանագրելով: Այն քննարկման են դնելու առաջիկա նիստի ընթացքում։ Մանկավարժներն էլ ներկայացրին, որ ըստ էության, այս հարցի կարգավորումը արհմիության պարտականությունն էր, ու երբևէ արհմիությունը իրենց շահերը չի պաշտպանել: Մանկավարժներն ու ավագ դպրոցի արհմիության նախագահը որոշում են կայացրել ու դիմումներով այդ կառույցի անդամակցությունից հրաժարվել։

Շիրակի պետական համալսարանում գործադուլը շարունակվելու է նաև երկուշաբթի: Այդ օրը դպրոցի հանրույթի հետ հանդիպելու պատրաստակամություն արդեն հայտնել են բուհի ռեկտորի ժամանակավոր պաշտոնակատարն ու կրթության ու գիտության նախարարի տեղակալը: