Նորընտիր ԱԺ առաջին նիստ ու վարչապետի նշանակում. ե՞րբ և ինչպե՞ս

Ե՞րբ է տեղի ունենալու նորընտիր խորհրդարանի առաջին նիստը, ե՞րբ և ի՞նչ կարգով է խորհրդարանի մեծամասնություն կազմող քաղաքական ուժի կողմից առաջարկված վարչապետի թեկնածուն դառնալու վարչապետ:  SHANTNEWS.am-ը փորձել է ստանալ այս հարցերի պատասխանները:

Ոչ թե վարչապետի ընտրություն, այլ նշանակում

Արտահերթ խորհրդարանական ընտրություններից հետո նորաստեղծ խորհրդարանը վարչապետ չի ընտրի: Ազգային ժողովի աշխատակազմի ղեկավարի տեղակալ Արսեն Բաբայանը պարզաբանում է՝ խորհրդարանում վարչապետի ընտրությունը տեղի է ունենում վարչապետի հրաժարականի դեպքում կամ ստեղծվում է այնպիսի իրավիճակ, երբ վարչապետի պաշտոնավարումն անհնար է:

Օրենքն այդ դեպքում նախատեսում է ոչ թե ընտրություն, այլ նշանակում: Մեծամասնություն կազմող քաղաքական ուժի, այս դեպքում՝ «Իմ քայլը» դաշինքի կողմից ներկայացված վարչապետի թեկնածուին վարչապետի պաշտոնում նշանակում է ՀՀ նախագահը:

Թե երբ դա տեղի կունենա, «Քաղաքացիական պայմանագիր» կուսակցության վարչության անդամ Վահագն Հովակիմյանը եզրակացնում է՝ նորընտիր խորհրդարանի հենց առաջին նիստի օրը: Առայժմ հստակ չէ՝ երբ տեղի կունենա անդրանիկ նիստը. շրջանառվում է մի քանի վարկած:

Ե՞րբ տեղի կունենա նորընտիր խորհրդարանի առաջին նիստը. վարկած 1

Կենտրոնական ընտրական հանձնաժողովը չի մեկնաբանում հստակ, երբ տեղի կունենա նորընտիր խորհրդարանի առաջին նիստը: Ըստ Ազգային ժողովի աշխատակազմի ղեկավարի տեղակալ Արսեն Բաբայանի՝ եթե չբողոքարկվեն ընտրության արդյունքները, ապա ԿԸՀ-ը կընդունի որոշում խորհրդարանի ընտրված լինելու վերաբերյալ, կհայտարարվի ԱԺ-ի կազմավորված լինելու վերաբերյալ: Նրա խոսքերով՝ մեկնաբանումներից մեկով հենց դեկտեմբերի 24-ին էլ տեղի կունենա ԱԺ անդրանիկ նիստը:

Վարկած 2.

«Քաղաքացիական պայմանագիր» կուսակցության վարչության անդամ Վահագն Հովակիմյանն այլ վարկած է առաջ քաշում: Եթե ընտրությունների արդյունքները չբողոքարկվեն, խորհրդարանի առաջին նիստը կանցկացվի արդեն հաջորդ տարում: Ըստ Հովակիմյանի՝ արդեն դեկտեմբերի 21-ին պարզ կլինի՝ քաղաքական ուժերը բողոքարկո՞ւմ են ընտրության արդյունքները, թե՞ ոչ, համաձայն դրա էլ՝ օրենքով նախատեսված մյուս ընթացակարգերը կիրականացվեն:

«Հաջորդող շաբաթվա ընթացքում Կենտրոնական ընտրական հանձնաժողովը կկազմի մանդատները տրամադրելու արձանագրությունը, սովորաբար ինչպես դա տեղի է ունենում: Ըստ այդմ՝ երկրորդ երկուշաբթի օրը հունվարի 7-ն է: Հենց այդ օրն էլ տեղի կունենա Ազգային ժողովի առաջին նիստը»:

Եթե բողոքարկվեն ընտրության արդյունքները, կամ վարկած 3․

Իսկ եթե բողոքարկվեն ընտրության արդյունքները, խորհրդարանի առաջին նիստն այլ օր տեղի կունենա: «Քաղաքացիական պայմանագիր» կուսակցության վարչության անդամ Վահագն Հովակիմյանի մեկնաբանմամբ՝ նիստը կարող է անցկացվել հունվարի 14-ին կամ 21-ին:

«Պայմանավորված Սահմանադրական դատարանի որոշման կայացման օրով՝ կարող է հետաձգվել մինչև հունվարի 14 կամ հունվարի 21, այսինքն՝ դա պայմանավորված կլինի Սահմանադրական դատարանով, թե երբ այդ որոշումը կկայացնի: Կարող է վերջին օրը կայացնել, կարող է ժամկետից շուտ կայացնել»:

Առաջին նիստը կվարի ամենաավագ պատգամավորը: Սա ևս օրենքի պահանջն է, քանի որ դեռ որոշված չեն լինի Ազգային ժողովի նախագահն ու տեղակալները: Նրանց անունները հայտնի կդառնան խորհրդարանի առաջին նստաշրջանի ընթացքում:

Ոչ պաշտոնապես, ԱԺ նախագահի մի քանի անուն է շրջանառվում՝ Լենա Նազարյան, Ալեն Սիմոնյան, Արարատ Միրզոյան:

Հեղինակ՝ Արտակ Խուլյան