Եթե բարձրաձայնում են պետական դավաճանության մասին և հաղորդում չեն տալիս, ուրեմն շառլատան են. Փաշինյան

ՀՀ վարչապետի պաշտոնակատար Նիկոլ Փաշինյանը դեկտեմբերի 5-ին լրագրողների հետ զրույցում արձագանքել է ՀՀԿ կողմից պատգամավորության թեկնածու առաջադրված Դավիթ Շահնազարյանի` այսօրվա ասուլիսում հնչեցրած որոշ մտքերի: Նա նախ հետաքրքրվեց` Շահնազարյանն ԱԱԾ-ին ներկայացրե՞լ է այն դավադրությունը, որ, իր պնդմամբ, գոյություն ունի Հայաստանում:

«Ինքն ասում էր, որ կա դավադրություն Արցախի դեմ, ասում էր, որ հեղափոխությանն օգնել են ուժեր, և գործել է «իշխանություն՝ Արցախի դիմաց» բանաձևը, այսինքն` ըստ էության մեղադրել է մեզ ինչ-ինչ ուժերի հետ՝ ընդդեմ Արցախի, ընդդեմ ՀՀ և ըստ էության՝ ընդդեմ հայ ժողովրդի: Ուրեմն, պետք է ԱԱԾ-ն նյութեր նախապատրաստի, և եթե պարզվի, որ հեղափոխությունը տեղի է ունեցել այդպես, բոլոր դավադիրներին պետք է հայտնաբերի, պատասխանատվության ենթարկի, մարդկանց ներկայացնի, որ դավադիրներ կան»,- ասաց նա:

Հակառակ դեպքում, ըստ Փաշինյանի, տարակուսելի է, որ որևէ անձ շարունակաբար հայտարարություններ է անում, բայց հրաժարվում է գնալ ԱԱԾ, ներկայացնել փաստեր կամ թեկուզ հրապարակային` ասուլիսների ժամանակ, փաստեր ներկայացնել, թե ովքեր են դավադիրները, քանի որ մարդիկ պետք է հստակ իմանան` կա դավադրությո՞ւն, թե՞ պարզապես ստախոսություն: Ի պատասխան Շահնազարյանի քաղաքական հայտարարության, Փաշինյանը նշեց.

«Ես էլ քաղաքական հայտարարություն եմ անում, որ լուրջ վարկածներ ունեմ, որ այդ մարդիկ օտարերկրյա գործակալներ են և դավադիր պատերազմի հրձիգներ: Ես չեմ ուզում այլ քաղաքական հայտարարություն անել` ասելով, որ այդ մարդիկ կամ այդ քաղաքական ուժը հոգեվարքի մեջ են, բայց, ի պաշտոնե նաև, պարտավոր եմ մեր երկրի ազգային անվտանգության շահերը պաշտպանել, և, ի վերջո, մեր բոլոր գործողությունները միտված են լինելու դրան»:

Վարչապետի պաշտոնակատարը նշեց, որ իր այս կոչն անձնավորված չէ, այն բանաձև է` ուղղված ցանկացած մեկին, որովհետև, եթե բան ունեն ասելու այդ մարդիկ, ովքեր մեղադրանքներ են հնչեցնում, և եթե հանկարծ պարզվի, որ այդ մեղադրանքը ճիշտ է, իրենց նկատմամբ պետք է քրգործ հարուցվի:

«Եթե պարզվի, որ մենք մեր երկրի և Արցախի դեմ դավադրության մեջ ենք, պետք է արագ քրգործ հարուցեն և մեզ ձերբակալեն: Այսօր ԱԱԾ-ից հրավիրել էին, որ այդ հայտարարությունն անող մարդիկ գան ու համագործակցեն, ասեն` ինչ դավադրություն է: Սա կոնկրետ պետական դավաճանության մեղադրանք է, և եթե որևէ մեկը բարձրաձայնում է պետական դավաճանության մասին և չի գնում իրավապահներին հանցագործության մասին հաղորդում տալու, նա շառլատան է»,- ասաց նա:

Փաշինյանն ասաց, որ սահմանին ուժերի դասավորության փոփոխությունների մասին կեղծ լուրեր հնչեցնող մարդիկ խոսում են Ադրբեջանի պաշտոնական քարոզչության լեզվով. մեր պաշտպանության նախարարությունը մի քանի անգամ անդրադարձել է այդ թեմաներին:

«Ես պատասխանատու ձևով ասում եմ, որ բոլոր այն տարածքները, որոնք եղել են ՀՀ ԶՈւ վերահսկողության ներքո, շարունակում են նույն կերպ մնալ ՀՀ ԶՈւ վերահսկողության ներքո: Ես մի 10 օր առաջ այցելել, տեղում եմ տեսել իրավիճակը: Նախիջևանի ուղղությամբ ՀՀ ԶՈւ ձեռքում է ռազմավարական նախաձեռնությունը` ամբողջությամբ»,- նշեց նա: