Ազգային կինոկենտրոնի տնօրենը կառույցում ստուգումներ է իրականացրել և նյութերն ուղարկել դատախազություն

Այսօր Ազգային կինոկենտրոնի տնօրեն Շուշանիկ Միրզախանյանը հայտարարությամբ է հանդես եկել, որը վերաբերում է կինոռեժիսոր Հովհաննես Գալստյանի՝ Ազգային կինոկենտրոնի հետ ունեցած համագործակցությանը՝ սկսած 2010 թվականից մինչ օրս:

Նշենք, որ Հովհաննես Գալստյանը հացադուլ է հայտարարել և պահանջում է, որ իր ֆիլմի նկարահանման համար կինոկենտրոնը գումար հատկացնի, մինչդեռ Շուշանիկ Միրզախանյանը SHANTNEWS.am-ի հետ զրույցում հայտնել է, որ խնդիրը շատ գլոբալ է և ինքը 2017 թվականից ի վեր ստանձնելով Ազգային կինոկենտրոնի տնօրենի պաշտոնը՝ ստուգումներ է սկսել ու փորձել հասկանալ կառույցի ֆինանսական հոսքերն ու «հուլունքի» պես հավաքել է բոլոր փաստաթղթերը, որոնք վերաբերում են ֆիլմերի ֆինանսավորմանը:

«Ստացել եմ ահավոր վատ վիճակով ֆինանսական կառույց, որտեղ չի արվել ոչ մի հանձնում-ընդունում: Այդ գործընթացի ընթացքում բավական խախտումներ եմ հայտնաբերել, որը մասնավորապես ռեժիսոր Հովհաննես Գալստյանի հետ է կապված»,- ասել  է Շուշանիկ Միրզախանյանը:

Ըստ նրա մոտ առկա փաստաթղթերի՝ կա 2010-2014 թվականների մի պայմանագիր, որում նշված է, որ Հովհաննես Գալստյանի «Պարալեզ փրոդաքշնը» պետք է ֆիլմ նկարահաներ, և 93 միլիոն դրամի պարտավորություն է ունեցել Ազգային կինոկենտրոնը: Ընդհանուր բյուջեն կազմել է 700 մլն դրամ, և Ազգային կինոկենտրոնից բացի՝ ֆիլմի մնացած 600 և մի փոքր ավելի դրամը պարտավորվել է տրամադրել «Պարալեզ փրոդաքշնը»:

«Այդ ֆիլմը 5 անվանում ունի՝ «Գաբրիել Մարի», «Սողանք», «Լուսավոր շրջան»,«Թողություն»: Սրանք մի ֆիլմի վերնագրեր են, և սրան էլ պետք է բացատրություն տրվի: Ամեն տարի նոր անվանումով ինչ-որ սցենար է ներկայացվել Մշակույթի նախարարություն ու անընդհատ երկարաձգվել է պայմանագիրը: Հովհաննես Գալստյանը չի ավարտել ֆիլմը և փաստաթղթերը փակվել ու դրվել են մի կողմ»,- բացատրել է կինոկենտրոնի տնօրենը և հավելել է, որ իր ցանկությունն է ուղղակի պարզել ու հասկանալ, թե ինչ գործընթացներ են եղել Կինոկենտրոնում ու ճշմարտությունը ջրի երես հանել:

Միրզախանյանը նշել է, որ ըստ Հովհաննես Գալստյանի՝ կինոկենտրոնը տարիներ շարունակ կոռումպացված է եղել, բայց Գալստյանը մոռանում է, թե ում հետ է երկար տարիներ աշխատել:

Կինոկենտրոնի տնօրենը շեշտել է, որ ինքն այս հարցերի շուրջ պարբերաբար հանձնաժողովներ է հրավիրել և այդ ստուգումների ու հանձնաժողովների նիստերի ընթացքում հրավիրել է նաև Հովհաննես Գալստյանին:

«Ես չպետք է պատասխան տամ այն կեղտոտ քայլերի համար, որոնք ինձ հետ բացարձակ կապ չունեն, բայց ես պարտավոր եմ այս ամենին վերջ տալ»,- ասել է Միրզախանյանը:

Կինոկենտրոնի տնօրենը նաև պատմել է, որ Հովհաննես Գալստյանին բազմիցս նամակներ է ուղղել և հորդորել պարզաբանել, թե ինչու մինչև հիմա ֆիլմը ավարտված չէ ու ինչու աշխատանքներ չեն ընթանում:

«Հովհաննես Գալստյանի պատասխանի ամբողջ մեխը այն է, որ այդ 93 մլն դրամի 40 մլն դրամը նա Կինոկենտրոնի նախկին տնօրեն Գևորգ Գևորգյանին ներկայացրել է իրավիճակը, նրանք համաձայնության են եկել: Գևորգ Գևորգյանը համաձայնել է, որ այդ նույն գումարներն ուղղվեն «Կիսալուսնի ծովածոցը» ֆիլմի վրա և այդ նույն տարվա մեջ արտադրության մեջ է եղել կինոկենտրոնում և էլի «Պարալեզ փրոդաքշնն» է նկարահանել: Բայց հարց է բարձրացվում, թե ո՞ւր են այն գրավոր հիմքերը, որ իրավունք ունեին գումար հատկացնել մեկ ֆիլմի համար, բայց փոխարենը նկարահանում են լրիվ այլ ֆիլմ»,- պատմել է Շուշանիկ Միրզախանյանը:

Կինոկենտրոնի տնօրենն իրականացված ստուգումների արդյունքում հավաքված բոլոր փաստաթղթերն ու ապացույցներն ուղարկել է դատախազություն: