7 փաստ արտահերթ խորհրդարանական ընտրությունների մասին

Երևանի ավագանու արտահերթ ընտրություններից հետո հերթը խորհրդարանականինն է, կրկին արտահերթ: Այդ է պատճառը, որ նախընտրական քարոզարշավը կարճ կտևի, գրեթե 2 շաբաթ:

Քարոզարշավի մեկնակն այսօր է, իսկ ավարտը՝ դեկտեմբերի 9-ին: Դեկտեմբերի 8-ին լռության օր է:

SHANTNEWS.am-ը 7 փաստ է առանձնացրել արտահերթ խորհրդարանական ընտրությունների վերաբերյալ:

Սպասվելիք ընտրություններին ավելի շատ քաղաքական ուժեր են մասնակցում, քան նախորդին: Այս անգամ նրանց թիվը 11 է, իսկ նախորդ անգամ 9 էր: Արտահերթ խորհրդարանական ընտրություններին մասնակցող 4 քաղաքական ուժ ընտրապայքարի մեջ նոր է մտնում.

1. «Քաղաքացու որոշում» սոցիալ-դեմոկրատական կուսակցություն,
2. «Ազգային առաջընթաց» կուսակցություն,
3. «Սասնա ծռեր» կուսակցություն,
4. «Քրիստոնեա-ժողովրդական վերածնունդ» կուսակցություն:

3 քաղաքական ուժ էլ նախորդ ընտրություններին այլ կազմ ու ձևաչափ ուներ: «Մենք» դաշինքի մաս կազմող «Ազատ դեմոկրատներ»-ն առանձին էր մասնակցում ընտրություններին, իսկ «Մենք»-ի մյուս ուժը՝ «Հանրապետություն» կուսակցությունը, 2017-ի ընտրություններին «Ելք» դաշինքի կազմում էր:

Քաղաքական այս միավորի մեջ էր նաև «Լուսավոր Հայաստան» կուսակցությունը, որն առաջիկա ընտրություններին միայնակ է մտել ընտրապայքարի մեջ և «Քաղաքացիական պայմանագիր» կուսակցությունը, որն այս տարի «Իմ քայլը» դաշինքի կազմում է: Արտահերթ խորհրդարանական ընտրություններին մասնակցող քաղաքական ուժերից 3-ը մասնակցել է գրեթե բոլոր համապետական ընտրություններին.

1.  «Բարգավաճ Հայաստան» կուսակցություն», 
2. ՀՅԴ,
3. Հայաստանի Հանրապետական կուսակցություն:

Կուսակցությունների և դաշինքների համարները որոշվել են վիճակահանությամբ: Թե ովքեր են գլխավորում ընտրություններին մասնակցող քաղաքական միավորների ցուցակները, ներկայացնում ենք հերթականությամբ.

1. ՀՀԿ. ցուցակը գլխավորում է պաշտպանության նախկին նախարար Վիգեն Սարգսյանը,
2. «Քաղաքացու որոշում» սոցիալ-դեմոկրատական կուսակցություն. ցուցակը գլխավորում է տնտեսագետ Սուրեն Սահակյանը,
3. «Հայ հեղափոխական դաշնակցություն» կուսակցություն. ցուցակը գլխավորում է Արմեն Ռուստամյանը,
4. «Իմ քայլը» դաշինք. ցուցակը գլխավորում է Նիկոլ Փաշինյանը,
5. «Լուսավոր Հայաստան» կուսակցություն. ցուցակը գլխավորում է Էդմոն Մարուքյանը,
6. «Քրիստոնեա-ժողովրդական վերածնունդ» կուսակցություն. ցուցակը գլխավորում է քաղաքագետ Լևոն Շիրինյանը,
7. «Ազգային առաջընթաց» կուսակցություն. ցուցակը գլխավորում է Լուսինե Հարոյանը,
8. «Մենք» կուսակցությունների դաշինք․ ցուցակը գլխավորում է Արամ Սարգսյանը,
9. «Օրինաց երկիր» կուսակցություն. ցուցակը գլխավորում է Արթուր Բաղդասարյանը,
10. «Սասնա Ծռեր» համահայկական կուսակցություն. ցուցակը գլխավորում է Վարուժան Ավետիսյանը,
11. «Բարգավաճ Հայաստան» կուսակցություն. ցուցակը գլխավորում է Գագիկ Ծառուկյանը:

11 ուժերի համապետական ցուցակների ամենաերիտասարդ թեկնածուները 25 տարեկան են: Ընտրություններին մասնակցող ամենատարեց թեկնածուն 83 տարեկան է ՀՅԴ-ից:

Ընտրությունների արդյունքում խորհրդարանում կլինի առնվազն 101 պատգամավոր:

Նախնական տվյալներով՝ ընտրելու իրավունք ունի 2.574.916 քաղաքացի. նրանք կքվեարկեն Հայաստանի 13 ընտրատարածքներում։