Կիևի հետ խաղի ճակատագիրը վճռելու համար 30 րոպե ունեինք և վճռեցինք. Նիկիտա Սիմոնյանն ու «Արարատ-73»-ի խաղացողները հիշում են փառահեղ հաղթանակը

1973թ. իր պատմության ընթացքում առաջին անգամ «Արարատ-73»-ը դարձել է ԽՍՀՄ չեմպիոն և գավաթակիր: Հաղթանակից 45 տարի անց «Արարատ 73»-ի խաղացողները՝ ԽՍՀՄ չեմպիոններ և կրկնակի գավաթակիրներ Սերգեյ Բոնդարենկոն, Սերգեյ Պողոսյանը հանդիպել են մամուլի սրահում, կիսվել հիշողություններով: Տեսակամուրջի միջոցով ասուլիսին մասնակցել է նաև թիմի գլխավոր մարզիչ, Ռուսաստանի ֆուտբոլային միության առաջին փոխնախագահ Նիկիտա Սիմոնյանը:

«Հնարավոր չէ մոռանալ եզրափակիչ խաղը, որտեղ մենք պարտվում էինք 1։0 հաշվով, սակայն վերջին 80 վայրկյանների ընթացքում Իշտոյանը գոլ խփեց և հավասարեցրինք հաշիվը: Մենք ունեինք ավելացրած վերջին 30 րոպեները՝ Կիևի հետ խաղի ճակատագիրը վճռելու համար և վճռեցինք. Իշտոյանը խփեց երկրորդ գոլը: Ժամանակը վազում է, 45 տարի է անցել, բայց այդ մասին հաճախ եմ հիշում»,- պատմեց Նիկիտա Սիմոնյանը:

Նա նաև հիշեց, որ իր գերմանացի ընկերներից մեկն ասում էր, որ այդ խաղից հետո բոլորը քարտեզի վրա փնտրում էին փոքրիկ Հայաստանի տեղը:

«Դուք՝ սիրելիներս, հերոսություն եք արել, ինչի համար ևս մեկ անգամ շնորհավորում եմ: Առողջություն, բարեկեցություն ու խորին խոնարհում ձեզ ու նաև մեր երկրպագուներին, որովհետև առանց նրա այսքան հաջողությունների չէինք հասնի»,- նշեց «Արարատ 73»-ի գլխավոր մարզիչը:

Թիմի խաղացող Սերգեյ Բոնդարենկոն, ով արդեն 20 տարի է՝ բնակվում է ԱՄՆ-ում, հիշեց, որ այդ տարիներին խաղացողներից և ոչ մեկը որևէ լուրջ վնասվածք չի ստացել:

«Սա կոլեկտիվ էր, որ մեկ միասնական նպատակ ուներ: Նպատակ, որը պատմության մեջ է մնացել: Դա հաղթանակն է, հաղթանակից բացի, ոչինչ սպորտսմենին չի տալիս այդքան ներքին բավարարվածություն, որը մնում է ամբողջ կյանքում: Այդպիսի սպորտսմեն էր նաև Յուրի Վարդանյանը, որին, ցավոք, կորցրեցինք»- ասաց Սերգեյ Բոնդարենկոն:

Նիկիտա Սիմոնյանը խոստովանեց, որ շատ է ուզում Հայաստան գալ, բայց չի կարողանում գալ կնոջ հիվանդության պատճառով, ով ունի իր խնամքի կարիքը: Նա հիշեց, որ իր թիմի հետ վերջին անգամ հանդիպել է Երևանում՝ 10-15 տարի առաջ: Մինչդեռ խաղացողներն ավելի հաճախ են կարողանում հանդիպումներ ունենալ միմյանց հետ:

«Երբ մարդիկ աշխատում են 15-20 տարի միասին և հետո թողնում են իրենց աշխատանքը կամ թոշակի են գնում, իհարկե, քիչ են կարողանում հանդիպել: «Արարատ 73»-ի խաղացողները, սակայն, մշտապես պահպանում են կապը, հանդիպում ենք ֆուտբոլի վետերանների ակումբում, երբեմն նաև դաշտ ենք դուրս գալիս ու խաղում: Դրսում գտնվող մեր ընկերների հետ էլ մշտապես հեռախոսով ենք կապի մեջ լինում»,- ասաց Սերգեյ Պողոսյանը ու նաև Նիկիտա Սիմոնյանին փոխանցեց ընկերների բարևները:

Սերգեյ Բոնդարենկոն էլ պատմեց, որ ընդամենն օրեր առաջ է հանդիպել խաղընկերների հետ՝ իր ծննդյան 70-ամյակի միջոցառմանը:

«Իմ ծննդյան տոնին ներկա էին բոլոր տղաները, որ խաղում էին «Արարատ 73»-ում և Հայաստանում էին: Այդ օրն ինձ ասացին, որ անակնկալ են պատրաստել ինձ համար: Հանկարծ ներս եկավ աղջիկս՝ ամուսնու հետ, ով նույնպես նախկին ֆուտբոլիստ է, ուրախությունից կորցրեցի խոսելու ունակությունս, բայց մինչ անակնկալը տեսնելը, շատ բաներ մտքովս անցան: Ես մտածում էի, որ Նիկիտա Սիմոնյանն է եկել, ես ուրախությունից առաստաղին կբարձրանայի»,- պատմեց Սերգեյ Բոնդարենկոն:

Նիկիտա Սիմոնյանը ևս մեկ անգամ շնորհավորեց Բոնդարենկոյին ու կատակեց՝ ասելով, որ 75-ամյակին գուցե հանդիպեն Երևանում: