Վերջին 13 տարում Բաքուն 27 մլն դոլար է ծախսել ԱՄՆ պաշտոնյաներին՝ իրեն հարմար որոշումներ ընդունել տալու համար

Միայն 2005-2018 թվականներին Ադրբեջանը առնվազն 27 միլիոն դոլար է ծախսել Վաշինգտոնում լոբբիստական գործունեություն ծավալելու համար։ Ստեղծված լոբիստական ցանցով ադրբեջանցիները կարողացել են ամերիկացի պաշտոնյաներին դրդել, որ նրանք ադրբեջանանպաստ որոշումներ կայացնեն այլևայլ հարցերում։ Հայ մասնագետները այժմ բացահայտել են այդ ցանցի մի մասը ու ներկայացրել ինֆոգրաֆիկայով (մեծ որակով հասանելի է այստեղ)։ Դա այն մասն է, որ բաց է և փաստաթղթերով ապացուցելի։ Այդ ցանցի ծայրերը հասնում են մինչև ԱՄՆ ներկա ու նախկին նախագահներին։

«Եթե Թրամփը մեկ ամսում 4 անգամ շնորհավորում է Ալիևին, հենց այս խողովակներով է այդ աշխատանքը տարվում, և հստակ գիտեն, որ պետք է աշխատել այս պաշտոնյայի հետ, որպեսզի այս բովանդակությամբ նամակը դրվի Թրամփի սեղանին, և Թրամփը շնորհավորի, ենթադրենք, Ադրբեջանի անկախության օրը, Ալիևի վերընտրվելու կապակցությամբ (ի դեպ, հենց նույն օրը։ Իսկ եթե հիշում եք, Հայաստանի վարչապետին շուրջ մեկ շաբաթ ուշացումով շնորհավորեց, բայց Ալիևին շնորհավորեց հենց այդ նույն օրը), նավթա-գազային ընկերության հիմնադրման օրը շնորհավորեց։ Մոտ 3-4 նամակ պարբերաբար գնում էր»,– SHANTNEWS.am-ի հետ ունեցած հարցազրույցում հայտարարեց ամերիկագետ Սուրեն Սարգսյանը։

Նա նշեց, որ թեև ամերիկյան կողմի պատասխանատուները՝ անվտանգության ու պետքարտուղարության աշխատակիցները նայում են, թե ինչ է ստորագրում Թրամփը, և թե արդյոք դա չի հակասում իրենց ԵԱՀԿ միջնորդի դերին, սակայն որոշ բաներ կարող են և սպրդել։

Բայց բացի պաշտոնյաներից, ադրբեջանցիները աշխատում են նաև լրատվամիջոցների հետ։ Սա էլ իր ձևով հանրային ճնշումով պաշտոնյաներին որևէ որոշման, որևէ գործարքի գնալուն դրդելու, համոզելու միջոց է։

«Այս ամենի նպատակը նաև հակահայկական քարոզն է, հակահայկական տրամադրությունների ձևավորումն է։ Եվ այս ուղղությամբ, օրինակ` այս հոդվածները, որոնց մասին խոսեցինք … ԶԼՄ-ներում շատ հաճախ կտեսնեք, որ տեղադրում են հոդված մոտավորապես հետևյալ բովանդակությամբ, որ Հայաստանը Ռուսաստանի ռազմավարական դաշնակիցն է և Իրանի հետ ունի բարեկամական հարաբերություններ, ապա ԱՄՆ թշնամին է, չի կարող ԱՄՆ հետ բարեկամ պետություն լինել։ Եվ երբ այս տեսակի հոդվածները, այս տեսակի գրառումները, այս տեսակի վերլուծությունները, բնականաբար, 1-2-3-4 անգամ տպագրվում են տարբեր ԶԼՄ-ներով, որոշակի հանրային կարծիք են ձևավորում, որն էլ որոշակի առումով ազդում է պաշտոնյաների, որոշում կայացնողների վրա, որոնք միշտ չէ, որ դետալներից տեղյակ են», – նշեց Սարգսյանը։

Ամերիկագետի խոսքով՝ ադրբեջանցիների ու ամերիկյան պաշտոնյաների միջև այս միջնորդավորված կապը խզելը դժվար է, որովհետև միջնորդը լոբբիստական ընկերություններ են ու նրանք կատարում են այն, ինչ խնդրում է ֆինանսավորողը, սակայն Սուրեն Սարգսյանը կարծում է, որ այսպիսի ուսումնասիրությունները հայկական կողմին օգնում են հասկանալ, թե ինչպես է աշխատում ամերիկյան համակարգը։

Ավելին, բացահայտված 27 միլիոն դոլարի փոխարեն կարող է լինել ավելի մեծ թիվ, քանի որ կան ավելի ծածուկ թաքնված ֆինանսական հոսքեր, որոնցով, ըստ Սարգսյանի, Ադրբեջանը փորձում է հասնել իրեն ձեռնտու քաղաքականության։ Տեսանելի ցանցում այժմ ընդգրկված են ԱՄՆ ներկա նախագահ Դոնալդ Թրամփը, նախկին նախագահներ Բիլ Քլինթոնը և Բարաք Օբաման, մի շարք հեղինակավոր լրատվամիջոցներ և այլ անհատներ ու կազմակերպություններ։