Երեք հեռուստաընկերություններից ամենաօբյեկտիվ լուսաբանումն ապահովել է «Շանթ»-ը. զեկույց

«Իրազեկ քաղաքացիների միավորում» հասարակական կազմակերպությունը հանրության ուշադրությանն է ներկայացրել  «Հեռուստաընկերությունների կողմից լուսաբանման քաղաքականության փոփոխությունը ապրիլի 23-ից մայիսի 8-ն ընկած ժամանակահատվածում» զեկույցը: Զեկույցը դիտարկում է Հայաստանում հանրապետական սփռում ունեցող երեք՝ Հանրային, «Արմենիա» և «Շանթ» հեռուստաընկերությունների կողմից ապրիլի 23-ից մայիսի 8-ն ընկած ժամանակահատվածում Հայաստանի ներքաղաքական զարգացումների լուսաբանումը։ «Իրազեկ քաղաքացիների միավորում» հասարակական կազմակերպության նպատակն է եղել պարզել, թե արդյոք փոխվել է վերոնշյալ հեռուստատեսությունների լուսաբանման քաղաքականությունը՝ ներքաղաքական փոփոխություններին զուգահեռ:

Այսպիսով՝ «Իրազեկ քաղաքացիների միավորում» ՀԿ-ի կողմից 2018թ․ ապրիլի 23-ից մինչև մայիսի 8-ը մշտադիտարկման են ենթարկվել «Արմենիա», «Շանթ» և Հանրային հեռուստաընկերությունների՝ ժամը 18։00-24։00-ն ընկած ժամանակահատվածում թողարկվող լրատվական և ոչ լրատվական հաղորդումները։ Մշտադիտարկման արդյունքները ցույց են տվել,  որ ուսումնասիրության ենթարկված երեք հեռուստաընկերությունները դրսևորել են տարբեր մոտեցումներ և տարբեր կերպ են լուսաբանել մշտադիտարկված ժամանակահատվածում ներքաղաքական զարգացումները.

«Շանթ» ՀԸ-ի մասով մասնավորապես ասվում է.

«Մշտադիտարկված հեռուստատեսություններից ամենաանկողմնակալ լուսաբանումը կատարել է «Շանթ» հեռուստաընկերությունը: Մշտադիտարկման ողջ ընթացքում «Շանթ» հեռուստաընկերության լուսաբանումը միաժամանակ և’ չեզոք է, և’ բազմակողմանի: Այսպես, օրինակ՝ ապրիլի 23-ին «Հորիզոն» լրատվականի 18:00-ի  թողարկումը ներկայացնում է Սերժ Սարգսյանի հրաժարականի տեքստը, ապա՝ Նիկոլ Փաշինյանի հայտարարությունը: «Հորիզոնը» այս թողարկման ընթացքում ցույց է տվել Ապրիլյան պատերազմի մասնակից զորացրված զինվորների՝ Ազգային ժողովի պատգամավորների հետ բանակցելու պահանջը, որը ներկայացվել էր ԱԺ-ն հսկող ոստիկաններին, Վրաստանի նախկին նախագահ Միխեիլ Սաակաշվիլիի ուղերձը Հայաստանի ժողովրդին: Նույն՝ ապրիլի 23-ի «Հորիզոնի» հիմնական՝ 22:00-ի թողարկումը ներկայացնում է «Ազատություն» ռադիոկայանի կողմից նկարահանված ռեպորտաժը այն մասին, թե ինչպես է նախկին ՀՀԿ-ական պատգամավոր Առաքել Մովսիսյանը Էջմիածնում` Փարաքարի հատվածում, մի խումբ քաղաքացիների հրահանգներ տալիս, որ փակեն Երևան եկող ճանապարհը: Ապրիլի 23-ի՝ «Շանթ» հեռուստաընկերության փրայմ թայմի հիմնական մասը՝ մոտ 4 ժամ, նվիրված է եղել շարժման լուսաբանմանը, որի ընթացքում ներկայացվել են Հանրապետության հրապարակում տեղի ունեցող հանրահավաքից ուղիղ եթերի դրվագներ և շարժման մասնակիցների ամբողջական ճառեր: Ապրիլի 29-ի 22:00-ի «Հորիզոնի» թողարկումը ևս բավականին չեզոք է լուսաբանում երկրում ընթացող քաղաքական զարգացումները: Այսպես, օրինակ՝ այս թողարկման ընթացքում մանրամասն ներկայացված է ուսանողական ակցիան, այդ թվում՝ դրա շրջանակներում հնչած բուհերն ապակուսակցականացնելու կոչերը: Ապրիլի 29-ի 22:00-ի «Հորիզոնի» մոտ 24 րոպեանոց թողարկման առաջին 19 րոպեները նվիրված են եղել շարժմանը: Թողարկման մեջ տեղ է գտել նաև Արմեն Սարգսյանի հարցազրույցը BBC-ին և Ռոբերտ Քոչարյանի հարցազրույցը НТВ-ին, երկուսն էլ չեզոք տոնայնությամբ՝ հարցազրույցների ուղղակի մեջբերմամբ: Մայիսի 1-ի «Հորիզոն» լրատվականի 22:00-ի թողարկումն անկողմնակալ լուսաբանման ևս մեկ օրինակ է, որն օբյեկտիվ կերպով ներկայացնում է օրվա քաղաքական անցուդարձը՝ ցուցադրելով դրվագներ Հանրապետության հրապարակից կատարված ուղիղ հեռարձակումներից: Մայիսի 7-ի «Հորիզոն» լրատվականի 22:00-ի թողարկումը ներկայացնում է մայիսի 8-ին կայանալիք վարչապետի ընտրության վերաբերյալ ԱԺ տարբեր խմբակցությունների տեսակետները: Բոլոր կուսակցությունների տեսակետները ներկայացված են համաչափ և անկողմնակալ ձևով: «Շանթ» հեռուստաընկերությունը կատարել է չափավոր լուսաբանում՝ հստակ ներկայացնելով մշտադիտարկված ժամանակահատվածում Հայաստանում տեղի ունեցող անցուդարձը օբյեկտիվ լրատվության կանոններին համապատասխան: Միաժամանակ «Շանթ» հեռուստաընկերությունը չի դիմել տնտեսական ճգնաժամի սպառնալիքների և արցախյան սահմանագծին հնարավոր բախումների մասին ենթադրությունների լուսաբանման: «Շանթ» հեռուստաընկերության վերլուծական հաղորդումը՝ «Հեռանկարը», որը եթեր է հեռարձակվում «Հորիզոն» լրատվականների շրջանակում, շարունակել է կանոնավոր եթեր հեռարձակվել»:

Վերջում՝ զեկույցի եզրակացության մեջ, նշվում է, որ երեք հեռուստաընկերություններից ամենաօբյեկտիվ լուսաբանումն ապահովել է «Շանթ» հեռուստաընկերությունը: Մյուս կողմից Հանրային և «Արմենիա» հեռուստաընկերությունները, ի տարբերություն «Շանթի», փորձել են դրական երանգ հաղորդել Սերժ Սարգսյանի հրաժարականին: «Շանթ» հեռուստաընկերությունը մշտադիտարկված ժամանակատվածի ողջ ընթացքում ներկայացրել է օբյեկտիվ և անկողմնակալ լրատվություն՝ եթեր հեռարձակելով թե պաշտոնական տեսակետը և թե լայնամասշտաբ ցույցերն ու դրանց ղեկավարների կողմից ներկայացվող պահանջներն ու պնդումները:

Զեկույցին ամբողջությամբ կարող եք ծանոթանալ այստեղ: