Ընտրական օրենսգրքի բարեփոխումները երրորդ անգամ չեն ներկայացվի ԱԺ

«Զուտ ժամանակային առումով ես կարծում եմ, որ երրորդ անգամ Ընտրական օրենսգիրքը չի բերվի ԱԺ»,- կարծում է «Ծառուկյան» խմբակցության պատգամավոր Նաիրա Զոհրաբյանը:

«Մենք ընտրությունների կգնանք գործող օրենսգրքով: Անհասկանալի է, թե  ինչու որոշ քաղաքական ուժեր, որոնց կենսական շահերից էր բխում նոր օրենսգրքի ընդունումը, որպեսզի հանվեր ռեյտինգային ընտրակարգը, նվազեցվեր ընտրական շեմը, որովհետև նորով սահմանվում է չորս տոկոս անցողիկ շեմ և չորրորդ ուժի համար սահմանվում էր առավելագույնը երկու տոկոսի անցողիկ շեմ, որոշեցին գնալ քաղաքական ինքնասպանության: Սա Հանրապետականի և որոշ քաղաքական ուժերի համար համար փրկօղակ էր` ունենալով այսօր վստահության վակուում, չունենալով մեծ վստահություն վայելող քաղաքական գործիչներ, որոնք կարող էին ռեյտինգային ընտրակարգով` տարածքային ցուցակներով քվեներ բերել իրենց կուսակցությանը: Ինձ համար հասկանալի չէ: Տպավորությունս մեկն է` Հանրապետականը փորձեց վերջին անգամ իր քանակային առավելությունը ցուցադրել: Սա իրենց ուժի վերջին ցուցադրությունն էր: Որևէ այլ քաղաքական տրամաբանություն այստեղ չկար, թե ինչու իրենք երեկ տապալեցին Ընտրական օրենսգրքի քվեարկությունը»,- կարծիք է հայտնել ԱԺ «Ծառուկյան» խմբակցության պատգամավոր Նաիրա Զոհրաբյանը:

Նա տեսականորեն չբացառեց, որ այս խորհրդարանում նույն սցենարով կարող է տապալվել նաև վարչապետի թեկնածության շուրջ քվեարկությունը, այսինքն՝ Հանրապետականը կողմ քվեարկի թեկնածուին, սակայն Զոհրաբյանն ասաց, թե «չի  հասկանում  քաղաքական սուիցիդի գնալու սադոմազոխիստական նպատակահարմարությունը»:

«Եթե քաղաքական ուժը հակումներ ունի անընդհատ գնալու ինքնասպանության, դա արդեն ոչ թե  քաղաքական տրամաբանության, այլ պսիխոտրամաբանության ժանրից  է, որտեղ,  անկեղծ ասած, ես բացարձակապես մասնագետ չեմ»,- ասել է Զոհրաբյանը:

Նոր Ընտրական օրենսգիրքը եթե լիներ, ապա վստահելիությունն ընտրական պրոցեսի նկատմամբ ավելի բարձր կլիներ, մինչդեռ  նախորդ ռեյտինգային ընտրակարգը բացարձակապես ապաքաղաքական էր` գործեց «փող + ռեյտինգ» բանաձևը,- նկատել է Զոհրաբյանը: Նա որոշակի լավատեսություն է հայտնել առաջիկա ընտրությունների վերաբերյալ և ասել.

«Թեև դրանք անց են կացվելու գործող հին օրենսգրքով, սակայն չի լինելու վարչական ռեսուրսի չարաշահում, գումար: Հանրային վստահելիություն ունեցող էն գործիչները, ովքեր կառաջադրվեն ռեյտինգային ընտրակարգով, գործելու է «ռեյտինգ=հանրային ճանաչելիություն» բանաձևը: «Ծառուկյան» խմբակցությունն այն եզակի քաղաքական ուժերից  է, որն ունի բրենդային գործիչներ, և մեզանից յուրաքանչյուրը կարող է առաջադրվել ռեյտինգային ընտրակարգով և շահել որոշակի ձայներ: Առանց ավելորդ  համեստության կարող եմ ասել` ես, Միքայել Մելքումյանը, Վահե Էնֆիաջյանը, էլ չեմ խոսում, բնականաբար, Գագիկ  Ծառուկյանի մասին, որը մեր ամենավարկանիշային գործիչն է ոչ միայն «Բարգավաճ Հայաստանի», այլև ողջ հանրապետության տարածքում: Իսկ ի՞նչ են մտածում էն քաղաքական ուժերը, որոնք, լինենք անկեղծ, չունեն կամ քիչ ունեն էդպիսի բրենդային գործիչներ: Ինչո՞ւ գնացին քաղաքական սուիցիդի, ես չեմ հասկանում»,- նշել  է ԱԺ «Ծառուկյան» խմբակցության պատգամավորը: