Ադրբեջանի կողմից ՄԱԿ-ի բանաձևերի հիշատակումը մուղամի պես շլյագեր է դարձել. Բաբայան

Ադրբեջանի ԱԳՆ խոսնակի բերած փաստարկումները իրավական, քաղաքական տեսանկյունից որևէ արժեք չունեն, որովհետև նրա հիշատակած ՄԱԿ-ի բոլոր փաստաթղթերում նաև Ադրբեջանին վերաբերող բազմաթիվ կետեր կան, և ադրբեջանական կողմը միտումնավոր աչքակապություն է անում այդ ամենի վրա։ ՀՀ վարչապետի՝ Արցախում արած հայտարարությունների վերաբերյալ Ադրբեջանի պաշտոնական արձագանքը SHANTNEWS.am-ի հետ զրույցում այսպես մեկնաբանեց Արցախի նախագահի խոսնակ Դավիթ Բաբայանը։

«Այդ բանաձևերը որևէ ձևով չէին կանխորոշում Արցախի կարգավիճակը։ Դա միակողմանի չէր, այնտեղ կան նաև Ադրբեջանին վերաբերող կոչեր, օրինակ, անհապաղ դադարեցնել ռազմական գործողությունները և այլն։ Բայց Ադրբեջանի համար սա կարևոր չէ, սա կարծես մուղամի պես շլյագեր է դարձել, անընդհատ այդ ամենը կրկնում են, ինչ-որ փաստաթղթեր են մեջբերում»,- նշեց Բաբայանը։

Նրա բնորոշմամբ՝ իրենց մեկնաբանությունների մեջ ադրբեջանցիները կոպտորեն խախտում են միջազգային իրավունքը՝ տարածքային ամբողջականությունը վեր դասելով ժողովուրդների ինքնորոշման իրավունքից։ Մինչդեռ, միջազգային հիմնարար այդ իրավունքները հավասար են, և չի կարող տարածքային ամբողջականությունը գերադասելի համարվել ժողովուրդների ինքնորոշման իրավունքից։

«Մենք Ադրբեջանի իշխանություններին խորհուրդ կտայինք ևս մեկ անգամ նայել բոլոր փաստաթղթերը վերջին նույնիսկ 20 տարիների ընթացքում՝ սկսած Բելֆաստի համաձայնագրից՝ Մեծ Բրիտանիայի և Հյուսիսային Իռլանդիայի միջև։ Այնտեղ նույնիսկ այսպիսի հետաքրքիր կետ կա, որ 7 տարին մեկ Հյուսիսային Իռլանդիան կարող է հանրաքվե անցկացնել իրենց կարգավիճակի մասին, ընդհուպ՝ Բրիտանիայի կազմից դուրս գալը»,- նշեց Բաբայանը՝ ավելացնելով, որ դա նախադեպ է նաև Արցախի համար։

Նույն կերպ արևմտյան պետությունները հավաքել են Կոսովոյի անկախությունը հիմնավորող օրենքների, կարգավորումների, նախադեպերի մի փաթեթ, որում Կոսովոյի փոխարեն Արցախ գրելիս կարելի է նույն ձևով հիմնավորել նաև Արցախի անկախության իրավունքը։

«Պարզապես, մենք հասկանում ենք, որ միջազգային հանրությունը չունի միասնական մոտեցում այսպես կոչված «չճանաչված պետությունների» նկատմամբ, և սա նրանից չէ, որ չկա միասնական իրավական հիմք ընդհանուր մոտեցում ցուցաբերելու համար, պարզապես իրավականն այստեղ ինչ-որ տեղ ածանցյալ է աշխարհաքաղաքականությունից։ Այդ ամենը հասկանալով՝ մենք գիտենք, որ շուտափույթ ճանաչում չի լինելու, բայց աշխատելու ենք այս ուղղությամբ»,– նշեց Դավիթ Բաբայանը։

Միջազգային ճանաչումը կարևոր է, բայց Բաբայանի խոսքերով՝ կարևոր է նաև «չճանաչվածության» բարդույթը հաղթահարելն ու հզոր պետություն կառուցելը։ Այդ ուղղությամբ աշխատանքներն արդյունք տալիս են։

Հիշեցնենք, որ Ադրբեջանի ԱԳՆ խոսնակն այսօր հայտարարել է, որ Արցախյան հակամարտության կարգավորման բանակցային գործընթացի վերաբերյալ ՀՀ վարչապետ Նիկոլ Փաշինյանի խոսքերը խեղաթյուրում են միջազգային իրավունքի սկզբունքները։ Սրանով պաշտոնյան արձագանքել է Փաշինյանի այն խոսքերին, որ Արցախը որպես լիարժեք կողմ պետք է վերադառնա բանակցային սեղան, որտեղ ներկայում բանակցում են Հայաստանն ու Ադրբեջանը։

Փաշինյանի ասուլիսին, նրա արած հայտարարություններին անդրադառնալիս, ադրբեջանական կողմի խոսնակը, սակայն, խուսափել է Բաքվի ստանձնած պարտավորությունների չկատարման մասին հիշատակումներից։ Փաշինյանն իր ասուլիսի ընթացքում, օրինակ, հայտարարել է, որ Արցախի շփման գծում հրադադարի խախտման միջադեպերը հետաքննելու մեխանիզմի ներդրման ԵԱՀԿ կողմից առաջարկված տարբերակին Հայաստանը համաձայն է նաև այսօր։ Վարչապետի խոսքերով՝ թեև այդ մասին պայմանավորվածություն եղել է 2016 թվականին, սակայն դրանից հրաժարվել է Ադրբեջանը, իսկ Հայաստանը հիմա էլ պատրաստ է այդպիսի մեխանիզմների ստեղծմանը։