Որևէ մեկի մտքով չէր անցնում, որ Սերժ Սարգսյանը հրաժարական կտա, դա հրաշք էր. Ծառուկյան

ԲՀԿ առաջնորդ Գագիկ Ծառուկյանը հոկտեմբերի 18-ին լրագրողների հետ ճեպազրույցում նշեց, որ Հայաստան եկած գործարարները շատ լավ տրամադրություն ունեն:

«Մենակ նորից եմ ես ձեզ ասում, մեր լրագրողները, ձեր ցավը տանեմ, խաչաձև, մուտիլովկեք, որ ավելի հետաքրքիր լինի, եսիմինչ… որ ուզում եք բոմբ տրաքացնեք, արդեն տրաքել, պրծել ա»,- նշեց նա` դիմելով լրագրողներին:

ՀՀ վարչապետի պաշտոնակատար Նիկոլ Փաշինյանի`բարիկադները քանդելու մասին հայտարարության վերաբերյալ նա նշեց.

«Ցավն էլ տանեմ, մարդն ասում ա` բարիկադները արդեն քանդել ենք, հիմա պետք ա կարողանանք, ամեն մեկը իր գործը կատարի, ամեն մեկն իր հնարավորության սահմաններում աջակցենք կառուցենք, աշխատատեղեր լինեն, որ ամեն ինչ նորմալ լինի»:

Լրագրողները հետաքրքրվեցին` արդյո՞ք իր նախընտրական խոստումը` ներդրումների ներգրավման մասին, ուժի մեջ է մնում, նա պատասխանեց.

«Ուրեմն, ես ձեզ էն անգամ էլ ասեցի, 2017 թ. խորհրդարանական ընտրությունների ժամանակ էլ ասեցի, որ իմ գործընկերներն ասել էին 50 միլիարդ ներդրում, որ ես ասեցի մեր բյուջեն 2,5 միլիարդ ա, ասեցի` եթե մենք, ասենք, մեծամասնություն ենք, 15 մլրդ ներդրում բերեն մեր գործընկերները, ժողովուրդը ասեց՝ Ծառուկյանը բլեֆ արեց, համապատասխան, իմ գործընկերոջը զանգելով, որ ինքը հեռուստաընկերությունով ելույթ ունեցավ և ասեց, որ մենք պատրաստակամ ենք դնելու, անելու:

Հիմնական մյուսը, որ մենք քաղաքապետի ընտրությանը ասեցինք, դուք տեսաք, եկել էին 20 երկրից 38 քաղաքապետ, մարդիկ եկել էին` ներդրողներ, եկել էին քաղաքական գործիչներ, համապատասխան ասելով, չափելով ինչ-որ անհրաժեշտ է, որ ես ասում եմ` Երևանում միջին խավը, որ կազմում է Երևանի 65-70 տոկոսը, որ 30 տարի տուն չի ստացել, տուն չի գնել, կարո՞ղ ա դուք կասկածում եք իմ ասածի մեջ, որ բնակարանը 7-8 հոգով` հարս փեսա, չգիտեմ, տղա, թոռ, քուր-ախպեր, սաղ էդ երկու սենյակում են քնում, որ պետք ա մի հատ քայլ կատարվի, որ 65 հազար դրամով 8 տարում մարդը կարանա 50 քառակուսու տեր լինի»:

Ծառուկյանը նշեց, որ թեպետ նախապես հայտարարել էին` հաղթելու դեպքում անմիջապես իրենք սկսելու էին աշխատանքները, հիմա դարձյալ աշխատելու են, սակայն պատասխանատուն այլևս իրենք չեն:

«Պատասխանատու է` ում հավատացել եք, մենք մենակ կարող ենք հինգ ավագանիով համապատասխան մեր ժողովրդի ձայնը բարձրացնենք և համապատասխան հաղթողներին հիշեցնենք, թե ժողովրդին ինչ են խոսք տվել: Ես ամեն ինչ անելու եմ, կապ չունի, բայց դուք ճիշտ հասկացեք, ամեն մեծահարուստ,  փողատեր, պետք է վստահություն լինի, երաշխիք լինի, գարանտ լինի, որ էդ մարդը… հենց այնպես փողատերերը փող չեն դնում»,- ասաց նա:

ԲՀԿ առաջնորդն ասաց, որ այսօր ևս ներդրումներ անել ցանկացողներ կան, սակայն նրանց վստահություն է պետք, հարգանք, պետք է տեղ տալ նրանց: Ինքը` Ծառուկյանը, նրանց ասել է, որ մեր երկրի դռները բաց են` օրենքի, օրինականության սահմաններում, մնացածը քննարկել է պետք, պայմանավորվել, անցնել զարգացումներին, նաև ասել է, որ այսօր մեծ շուկա կա:

Հարցին` ներդրողների համար վստահելի միջավայր կա՞ այսօր Հայաստանում, ինչպիսի՞ն է այդ միջավայրը հիմա, ինչպիսի՞ն էր նախորդ իշխանությունների օրոք:

«Ասենք թե գալիս են իմ գործընկերները, որ աշխարհով մեկ հարգանք կա, ճանաչում կա, ասենք թե երաշխիքը ես եմ, բայց ես էլ, եթե բան եմ ասել, ուրեմն իմ ասածին տեր եմ լինում: Հիմա իմ ուզածը` ոչ թե երաշխիքը ես լինեմ, երաշխիքը պետությունը, կառավարությունը լինի, դա օրենքներ են, որ խորհրդարանական ընտրություններից հետո կքննարկենք, կձևավորենք բոլոր պայմանները, նոր արդեն ամեն ինչը ճիշտ կլինի»,- ասաց Ծառուկյանը:

Ճշտող հարցին` հիմա արդեն իշխանությունների վրա է՞լ է հույս դնում, նա պատասխանեց.

«Մենք բոլորի վրա էլ հույս ենք դնում, հիմա խորհրդարանական ընտրություններից հետո համատեղ այն մտահոգիչ հարցերը, որ կան, գործարարի, ներդրողի համար, պետք է հիմնական պարզաբանումները տրվի, օրենքով ընդունվի, որ երաշխիքը ոչ թե Ծառուկյան Գագիկը լինի, այլ երաշխավորը լինի պետությունը, կառավարությունը, որ մարդիկ օրինական կարգով գան, որ էսօր բոլորն էլ գիտեն, որ ամեն ինչ փոխվել է, հետևողական է, ցանկացած ահազանգի հետևից գնացող կա, հետևող կա, մնում է, որ մենք արդեն` ամեն մեկը իր հնարավորության սահմանում, կարողանա կազմակերպել, իր պետությանը, իր ժողովրդին, իր տնտեսությանը օգուտ տա»:

Հեղափոխությանը իր միանալու վերաբերյալ հարցերին կրկին անդրադառնալով, Ծառուկյանը հայտնեց.

«Բոլորիդ ներկայությամբ ասում եմ, երբ Նիկոլ Փաշինյանին, Սասուն Միքայելյանին, Արարատ Միրզոյանին ձերբակալել էին, դեռ որևէ մեկի մտքով չէր անցնում, որ Սերժ Սարգսյանը հրաժարական կտա, դա հրաշք էր, չէր տա, բայց մինչև դա տալը ես, ասենք թե, հայտարարել եմ, որ ամբողջ թիմով պաշտպանում եմ մեր գործընկերներին, բոլոր պատգամավորներին ասել եմ, որ մենք թույլ չենք տա, խորհրդարանում երկրորդ օրը պետք է լսումներ լինեին, որ իրանց անձեռնմխելիությունից զրկեին, մենք իրանց ասել ենք, և հարցը չբերեցին խորհրդարան, և այդ հարցը համապատասխան լուծվեց: Մենք պարոն Փաշինյանի հետ հանդիպեցինք, ստորագրեցինք, նա էլ դա հաստատեց, որ, այո, մենք մասնակից, աջակից ենք եղել շարժմանը»: