«Աթլետիկո»-«Արսենալ». մեծ խաղի սպասումով

Մոտ 1 ժամից կմեկնարկեն ՈՒԵՖԱ-ի «Եվրոպա» լիգայի կիսաեզրափակիչ պատասխան հանդիպումները: «Զալցբուրգ»-ը կընդունի Մարսելի «Օլիմպիկ»-ին, իսկ Մադրիդի «Աթլետիկո»-ն՝ Լոնդոնի «Արսենալ»-ին: «Օլիմպիկ»-ն իր դաշտում 2-0 հաշվողվ հաղթել էր ավստրիական ակումբին, իսկ «Արսենալ»-«Աթլետիկո» կիսաեազրափակիչ առաջին հանդիպումն ավարտվել էր ոչ ոքի արդյունքով. զինագործներն ու մադրիդցիները մեկական գնդակ էին փոխանակել: Այդ խաղին Հենրիխ Մխիթարյանը չէր մասնակցում, վնասվածքից դեռևս չէր ապաքինվել: Այսօր, սակայն, իրավիճակն այլ է:

Անձրևի աղմուկը խանգարում է լսել գլխավոր մարզչի ու Հայաստանի հավաքականի կիսապաշտպանի զրույցը:  Վենգերի համար այս մարզումը վերջիններից է «Արսենալ»-ի ղեկին, իսկ Մխիթարյանի համար՝ առաջիններից մեկը ծնկի վնասվածքի ապաքինումից հետո: Միգուցե դա է պատճառը, որ 69-ամյա մասնագետն ու 29-ամյա ֆուտբոլիստն ամենաշուտն են եկել մարզաբազա, քննարկումն էլ տևում է բավական երկար, այնքան մինչև հավաքվում են լոնդոնյան ակումբի մյուս խաղացողները: Իսկ քննարկելու հարցեր, իսկապես, կան. ամենաառաջնայինը՝  ինչպես հաղթահարել Մադրիդի Աթլետիկոյի արգելքն ու հասնել Եվրոպա լիգայի եզրափակիչ: 

Ուղիղ մեկ շաբաթ առաջ Արսենալի՝ եզրափակիչ դուրս գալու հնարավորություններն ավելի իրական էին թվում: Լոնդոնյան խաղի ընթացքը հենց սկզբից բարենպաստ էր զինագործների համար: Մեկնարկից ընդամենը 10 րոպե հետո երկրորդ կոպիտ խախտման համար հեռացվեց մադրիդյան ակումբի խորվաթացի պաշտպան Սիմե Վրսալյկոն: 10 հոգով մնացած «Աթլետիկո»-ն ստիպված էր սեղմվել սեփական դարպասին ու հետ մղել «զինագործներ»-ի ՝ միմյանց հաջորդող գրոհները: «Արսենալ»-ի ֆուտբոլիստներն ամբողջ խաղի ընթացքում Յան Օբլակի դարպասի ուղղությամբ 28 հարված կատարեցին, բայց դրանցից միայն մեկը նպատակին հասավ: Դա խաղի 61 րդ րոպեին էր:

Here’s the @Betfair preview for tonight’s big #ATLvAFC match. What do you reckon the final score will be?

Get all the odds ???? https://t.co/Bz3JPl9ra4 pic.twitter.com/o7fxPVz9jF

— Arsenal FC (@Arsenal) May 3, 2018

Ֆրանսիացի Ալեքսանդր Լաքազեթի գոլից հետո էլ լոնդոնցիները հնարավորություններ ունեին, բայց դրանք օգտագործելու փոխարեն բաց թողեցին մադրիդցիների՝ հատուկենտ հակագրոհներից մեկը: «Աթլետիկո»-ի հարձակվող Գրիզմանը 82 -րդ րոպեին հարվածային դիրքում հայտնվեց անհավանական սայթաքումների ու պատահական համընկնումների արդյունքում: 
Նման խաղից հետո 1-1 հաշիվն Արսենալի համար պարտության պես մի բան էր: Այդ մասին խոսեց նաև Վենգերը՝ ընդգծելով, որ ավելի հավանական է համարում Աթլետիկոյի՝ հաջորդ փուլ դուրս գալը: Ինչ կարծիք ունի ֆրանսիացի մասնագետը 1 շաբաթ անց:   

«Հաջորդ խաղը միշտ էլ ավելի կարևոր է, քան նախորդը: Ավելին, հաջորդ խաղը մեծ խաղ է լինելու, շատ, շատ, շատ մեծ խաղ մեզ համար, որովհետև Չեմպիոնների լիգա դուրս գալու հարցում «Արսենալ»-ի ապագան կախված է դրանից: Մենք գիտենք, որ պետք է անպայման գոլ խփել, այնպես որ, շատ հստակ խնդիր ունենք մեր առջև դրված և ունենք հստակ մոտեցում: Միակ բանը, որ հստակ չէ, այն է՝ արդյոք «Աթլետիկո»-ն կփորձի նույն կերպ գործել, թե այլ մարտավարություն կընտրի»: 

Բուքմեյքերական ընկերություններն «Աթլետիկո»-ի հաղթանակի հավանականությունը շուրջ 3 անգամ ավելի բարձր են գնահատում, քան «Արսենալ»-ինը: Բայց վիճակագիրները չէ, որ ֆուտբոլ են խաղում:

Այս հանդիպմանը «Եվրոպա» լիգայում իր ցուցանիշները բարելավելու լավ հնարավորություն ունի Հենրիխ Մխիթարյանը:  Հայ ֆուտբոլիստը դա ապացուցեց Անգլիայի Պրեմիեր լիգայի առաջնության վերջին խաղում՝ յուրատեսակ ռեկորդ գրանցելով: Հենրիխը դարձավ միակ ֆուտբոլիստը, որը մեկ մրցաշրջանի ընթացքում գոլ է խփել ինչպես «Մանչեսթեր Յունայթեդ»-ի կազմում, այնպես էլ դրա դարպասը: 

«Աթլետիկո»-«Արսենալ» հանդիպումը կարող եք դիտել «Շանթ» և «Շանթ Պրեմիում» հեռուստաալիքների ուղիղ եթերում, Երևանի ժամանակով 23.05-ին: