Ի՞նչ կլինի Նիկոլ Փաշինյանի հրաժարականից հետո. թվեր ու ժամկետներ

Նիկոլ Փաշինյանն այսօր հրաժարական չի տալու։ Այս մասին ShantNews.am-ի հարցին պատասխանելիս ասաց վարչապետի խոսնակը։ Հետո պարզաբանեց, որ հրաժարականի օրը կախված է արտահերթ խորհրդարանական ընտրությունների անցկացման օրվանից՝ եթե դա հետաձգվում է, հետաձգվում է նաև հրաժարականը:

Հարցին, թե կա՞ այս պահին վարչապետի հրաժարականի համար նախանշված որևէ օր, խոսնակը բացասական պատասխան տվեց՝ ոչ, նախանշված չէ։

Իսկ France24-ին տված հարցազրույցում վարչապետ Նիկոլ Փաշինյանը հայտարարել էր հետևյալը.

«… Ընտրությունները, նախնական կարող եմ ասել, որ մոտավորապես դեկտեմբերի 9-ին, 10-ին, այդ հատվածում, պլյուս-մինուս մի քանի օր, այդ հատվածում տեղի կունենան և սրա համար, ըստ էության, ես պետք է հրաժարական տամ մինչև հոկտեմբերի 16-ն ընկած ժամանակահատվածում»։

Եթե վարչապետի հաշվարկը ճիշտ է, ապա հրաժարականի ու նոր ընտրությունների միջև ընկած ժամանակահատվածը պետք է լինի 55-56 օր։ ShantNews.am-ի հետ զրույցում սահմանադրական իրավունքի մասնագետ Վարդան Այվազյանը ավելի լայն միջակայք ներկայացրեց ու բացատրեց, որ այս թվերը կապված չեն քաղաքականության կամ պայմանավորվածությունների հետ։ Դրանք բխում են Սահմանադրությունից ու մաթեմատիկական հաշվարկից։

14 օր՝ վարչապետի «չընտրվելը» Ազգային ժողովում,

30-45 օր՝ ԱԺ լուծարումը և արտահերթ ընտրություններ,

Ընդհանուր գործընթացը՝ 44-59 օր։

Վարչապետի նշած թվաբանությունը համապատասխանում է սրան և մոտ է ամենասահմանային ժամկետին։ Իսկ համապատասխանո՞ւմ է արդյոք Ազգային ժողովում առկա թվաբանությունը նրա ակնկալիքների հետ։ Ուզածին հասնելու համար իշխանության փաշինյանական թևը պետք է ապահովի, որ իր հրաժարականից հետո Ազգային ժողովը երկու անգամ չընտրի ոչ մի վարչապետ։

Դրա համար անհրաժեշտ է տիրապետել խորհրդարանի ձայների մեծ մասին՝ 53 քվեի։ Հոկտեմբերի 15-ի դրությամբ եղած խոստումների համաձայն՝ Նիկոլ Փաշինյանի այս նախաձեռնությանը կողմ են՝

• 9 պատգամավոր «Ելք» խմբակցությունից,
• 31 պատգամավոր «Ծառուկյան» խմբակցությունից,
• 18 պատգամավոր «ՀՀԿ» խմբակցությունից (մեծ մասը դուրս է եկել խմբակցությունից)։

Ընդհանուր 58 քվեն բավարար է մեծամասնություն ունենալու և ցանկալի չընտրվելուն հասնելու համար, եթե անսպասելի շրջադարձեր չլինեն։

Նիկոլ Փաշինյանին չսատարող ուժերը Ազգային ժողովում հանրապետականներն ու դաշնակցականներն են։ ՀՀԿ-ն հայտարարել է, որ կողմ չէ, բայց չի խանգարի.

«Չընդունելով դեկտեմբերին ընտրություններ անցկացնելու հիմնավորումները՝ մեր խմբակցությունը չուներ և չունի մտադրություն՝ առաջադրելու վարչապետի թեկնածու: Մենք հոգեհարազատ ենք մնում մեր որդեգրած քաղաքականությանը և չենք խոչընդոտում ՀՀ կառավարության աշխատանքներին»։

Մյուս չսատարողը՝ ՀՅԴ  խմբակցությունը, վերջնական հայտարարություն դեռ չի տարածել, բայց նրանց ձայները մեծ չեն փաշինյանական ու հանրապետական քվեների համեմատությամբ։ Այս պայմաններում, ըստ սահմանադրական իրավունքի մասնագետ Վարդան Այվազյանի, միակ ուժը, որ տեսականորեն կարող է խանգարել Փաշինյանի ծրագրերի իրականացմանը, ՀՀԿ-ն է։

Տարբերակը, որ ՀՀԿ-ն այլ թեկնածու կառաջադրի, չնչին է։ Այվազյանի խոսքերով՝ ավելի հավանական է, որ կարող է լինել մյուս սցենարը։

«… Մյուս սցենարը, որը մի քիչ ավելի հավանական եմ համարում՝ Հանրապետական կուսակցությունը հենց Նիկոլ Փաշինյանի թեկնածությունը առաջադրի և նորից ընտրի, որպեսզի խորհրդարանը չինքնալուծարվի»։

Ի՞նչ կշահի սրանից Հանրապետականը։ Ժամանակ։ Մասնագետի խոսքով՝ այդ դեպքում նոր հրաժարական կպահանջվի, իսկ Հանրապետականը ժամանակ կշահի՝ ուժերի մոբիլիզացիայի համար։

Մինչ այդ արդեն տեղեկություն տարածվեց, որ վաղը՝ հոկտեմբերի 16-ին, նախատեսվում է անցկացնել ՀՀ կառավարության արտահերթ նիստ, որի օրակարգում, ըստ տարածվող տեղեկությունների, մեկ հարց է․

Վարչապետի հրաժարականը