Հայաստանը գրկաբաց ընդունեց 5 մայրցամաքից ժամանած Ֆրանկոֆոնիայի երկրների ներկայացուցիչներին. ԱԳ նախարար

ՀՀ արտաքին գործերի նախարար Զոհրաբ Մնացականյանը Ֆրանկոֆոնիայի 17-րդ գագաթնաժողովի ամփոփիչ ասուլիսի ժամանակ անդրադարձավ Հայաստանի` իբրև Ֆրանկոֆոնիայի կազմակերպության գործող նախագահի հետագա անելիքներին, ամփոփեց գագաթնաժողովի այս երկու օրերին իրականացված աշխատանքը:

«Հայաստանն այսօր մեծ հպարտություն է զգում միջազգային այդչափ կարևոր հանդիպման բեմահարթակ լինելու և դրա մեծ հաջողությունը տոնելու համար: Հայ ժողովուրդը, հավատարիմ իր նախնիների հյուրընկալության ավանդույթներին, գրկաբաց ընդունեց 5 մայրցամաքից ժամանած Ֆրանկոֆոնիայի երկրների ներկայացուցիչներին: Ողջ երիտասարդությունն է ներգրավվել իր խանդավառությամբ, դինամիզմով, ֆրանսերենի ու ֆրանկոֆոն մշակույթի հանդեպ իր սիրով: Չեմ կարող այս անմոռանալի պահերը հիշատակել` առանց հիշելու այն տխրության պահերը, որ ապրեցինք Շառլ Ազնավուրի` մեզնից հեռանալու պատճառով, այդ մեծ արվեստագետի, որ այդքան բան է տվել Ֆրանսիային և ֆրանսիական մշակույթին և այդքան բան նվիրել Հայաստանին: Այդ կապակցությամբ ցանկանում եմ կրկին իմ երախտագիտությունը հայտնել նախագահ Մակրոնին` հոկտեմբերի 5-ին Շառլ Ազնավուրի պատվին Ազգային հարգանքի տուրքի արարողությանը Հայաստանին մասնակից դարձնելու համար»,- ասաց նա:

Նախարարի խոսքերով` իբրև հուշ վառ կմնան նաև համակեցության այն վառ օրերը Երևանի սրտում, որոնք, շնորհիվ ֆրանկոֆոնիայի ավանի, մի քանի օրում դարձան մշակութային բազմազանության արտահայտության հիանալի վայր: Մնացականյանն անդրադարձավ այն փաստերին, որոնք նշանավորեցին գագաթնաժողովը, նախ` ընդգծելու համար անդամ և դիտորդ երկրների ղեկավարների և կառավարությունների` զգալի թվով մասնակցությունը: Նախարարն ընդգծեց, որ ուրախ է հատկապես մտքերի փոխանակման որակի և կառուցողական երկխոսության համար, որ ունեցան Հայաստանի կողմից առաջարկված «Ապրել միասին» թեմայի շուրջ:

«Ընդունելով Երևանի հռչակագիրը և «Ապրել միասին» ֆրանկոֆոն կոչը` մենք մշակեցինք մի ճանապարհային քարտեզ, որը սահմանում է այն նպատակները, որ մենք որդեգրել ենք մեր հասարակությունների առջև ծառացած հիմնական մարտահրավերներին պատասխանելու համար, այն միևնույն ժամանակ կուղղորդի մեր կազմակերպության առաջիկա տարիների գործունեությունը:

Այս ճանապարհային քարտեզը վերահաստատում է Ֆրանկոֆոնիայի հիմնարար արժեքների հենքը, նրա կայուն հանձնառությունը` հանուն խաղաղության, ժողովրդավարության, մարդու իրավունքների, կանանց և տղամարդկանց իրավահավասարության, նրա նվիրվածությունը կրթական և լեզվամշակութային բազմազանությանը, այն խթանում է համերաշխության և փոխանակման սկզբունքները, որոնք անհրաժեշտ են ավելի արդար և հավասար հասարակությունների զարգացման համար, այն նաև հիմնվում է ֆրանսերենի վրա` որպես շաղախի, որ միավորում է ֆրանկոֆոն ընտանիքը: Այս բոլոր տարրերը միասին կազմում են «Ապրել միասին»-ի հիմքը Ֆրանկոֆոնիայում, այն ընդհանուր ժառանգության, որին սերտորեն կապված ենք, և որը պետք է պահպանվի և ամրապնդվի»,- նշեց նախարարը:

Մնացականյանն ասաց, որ որպես Ֆրանկոֆոնիայի կազմակերպության գործող նախագահ՝ Հայաստանն իր նախագահության ընթացքում մի շարք նախաձեռնություններ կիրականացնի ՖՄԿ-ի հետ համատեղ, բայց նաև սերտ համագործակցություն զարգացնելով միջազգային և տարածաշրջանային կազմակերպությունների հետ, ինչպիսիք են ՅՈՒՆԵՍԿՕ-ն, ԵԽ-ն` մշակութային բազմազանության և ՄԻ բնագավառներում:

Նախարարն ասաց, որ աշխատանքներ կտարվեն նաև Երևանում կայացած տնտեսական ֆորումի ժամանակ ստեղծված թվային տեխնոլոգիաների հարցերով նախարարների ցանցի հետ՝ թվային տնտեսության բնագավառում նախագծեր զարգացելու համար:

Մնացականյանը խոստացավ, որ Ֆրանկոֆոնիայի տնտեսության ռազմավարությանը համապատասխան Հայաստանում կկազմակերպվի տնտեսական ֆորում` Ֆրանկոֆոնիայի և տարածաշրջանային տնտեսական ինտեգրացիոն գործընթացների միջև համագործակցության վերաբերյալ տարածաշրջանային և ենթատարածաշրջանային տնտեսական տարածքների հետ գործընկերություններ հաստատելու նպատակով: