ԱՄՆ կոնգրեսի լսումները Հայաստանում տիրող իրավիճակի վերաբերյալ

ԱՄՆ-ի Կոնգրեսի Հելսինկյան հանձնաժողովում լսումներ են կայացել Հայաստանում ընթացող վերջին զարգացումների վերաբերյալ: Հրավիրված բանախոսներն էին Միջազգային հանրապետական ինստիտուտի Եվրասիայի տարածաշրջանի տնօրեն Սթիվեն Նիքսը և անկախ վերլուծաբան Էլեն Աղեքյանը:

«Անկախ նրանից, թե մենք այս շարժումը կոչենք գունավոր հեղափոխություն կամ ուղղակի հեղափոխություն, այն միանշանակ ազատության, ընտրություն ունենալու իրավունքի ու ազատ կամքի արտահայտման վառ դռսևորում է: Հենց սա է ժողովրդավարության բնույթը»,- նշել է Սթիվեն Նիքսը:

Լսումների մյուս բանախոս Էլեն Աղեքյանը նշել է, որ Սերժ Սարգսյանի անձի հեռացումից հետո, շարժումը բախվել է ավելի դժվարին խնդրի հետ, մասնավորապես՝ գործող համակարգի դեմ պայքարը:

«Բողոքի շարժումն անսպասելիորեն հաջողություններ գրանցելուց հետո այժմ առերեսվում է Հայաստանում ժողովրդավարության զարգացման հիմնական խոչընդոտների հետ, որոնցից է ոչ թե մեկ անձի իշխանությունը, այլ համակարգը, որը չափազանց կոռումպացված է, հագեցած ազդեցիկ օլիգարխներով և փորձում է պահպանել իշխանությունը»,- նշել է Էլեն Աղեքյանը:

Ըստ Աղեքյանի, գործող համակարգի հեռացումը երկարատև ու դժվարին գործընթաց է, որը պահանջում է անկախ ընտրական և դատական համակարգի ձևավորում, ավելի ազատ մամուլ և պատասխանատու իշխանություն և մի շարք այլ գործոններ, սակայն վերլուծաբանի կարծիքով՝ շարժումն աննախադեպ է ողջ եվրասիական տարածաշրջանի համար:

Աղեքյանն ընդգծել է, որ Հայաստանում քաղաքացիական հասարակության զարգացման մակարդակը շատ ավելի բարձր է, քան պատկերացնում էին շատերը: Փորձագետը կարևորել է այս օրերին անկախ համացանցային լրատվամիջոցների, սոցցանցերի և երիտասարդության անգնահատելի դերն այս շարժման ծավալման հարցում:

«Այս շարժման առանձնահատկությունն է երիտասարդության ակտիվ մասնակցությունը, որը կապված է մի քանի գործոնների հետ: Առաջինն, անխոս, շարժման առաջնորդ Նիկոլ Փաշինյանի անձն է և առաջնորդի հատկությունները, իսկ երկրորդը «Ելք» դաշինքի բնույթը, որը բաղկացած է երիտասարդ լրագրողներից ու իրավապաշտպան ակտիվիստներից»,- նշել է Աղեքյանը:

Միացյալ Նահանգների ներգրավվածության մասին խոսելիս Սթիվեն Նիքսը, իր հերթին, ընդգծել է ԱՄՆ-ի կողմից Հայաստանին համապատասխան աջակցություն ցուցաբերելու անհրաժեշտությունը  և դրական արտահայտվել այս օրերին ՀՀ-ում ԱՄՆ-ի դեսպանի կատարած աշխատանքի վերաբերյալ:

«Գովելի է, որ ԱՄՆ-ի դեսպան Ռիչարդ Միլսն անմիջապես արձագանքեց իրավիճակին, հանդիպեց իշխանության ու ընդդիմադիր կողմերի հետ և կոչ արեց պահպանել խաղաղությունն ու փոխադարձ հարգանքը, ինչպես նաև բողոքի խաղաղ արտահայտման ձևը»,- նշել է Սթիվեն Նիքսը:

Նիքսն ընդգծել է, որ բողոքի ցույցերը չափազանց կազմակերպված են, և վստահություն է հայտնել, որ այս զարգացումները մեծ ազդեցություն են թողել մարդկանց մտածելակերպի վրա:

«Սա իրենից ներկայացնում էր չափազանց լավ կազմակերպված բողոքի ցույցերի շարք: Ցուցարարները հստակ գիտեն, թե ուր են գնում և որ ուղղությամբ: Որևէ ամբոխային մտածելակերպ չկար»,- ընդգծել է Նիքսը:

Երկու վերլուծաբաններն էլ համակարծիք են, որ նոր իշխանության առաջնահերթությունն է ընտրական համակարգի արմատական բարեփոխումը: