«Երկիր Ծիրանի»-ն ավագանու նիստում խոսել է քաղաքական հարցերից

Այսօր՝ ապրիլի 27-ին տեղի է ունեցել Երևանի ավագանու 3-րդ նստաշրջանի 3-րդ նիստը, որին ներկա էին ավագանու 45 անդամներ՝ ապահովելով քվորում:

Նիստին ներկա չէին միայն «Ելք» խմբակցության անդամները:

Օրակարգում ընդգրկված էր 6 հարց: 

Նիստի օրակարգային հարցերից հետո ելույթ ունենալու ցանկություն էին հայտնում միայն «Երկիր Ծիրանի» կուսակցության երեք անդամները՝ Զարուհի Փոստանջյանը, Մարինա Խաչատրյանը և Սոնա Աղեկյանը, սակայն նրանցից և ոչ մեկը օրակարգի հարցերին վերաբերող թեմայով չի խոսել: Բոլոր ելույթները վերաբերել են հայաստանյան ներքաղաքական իրավիճակին:

«Հերթական անգամ մասնակից ենք լինում Երևանին չվերաբերող խնդիրների քննարկմանը, սակայն այսօր Հայաստանում և ամբողջ աշխարհում աշխարասփյուռ հայերի մասնակցությմաբ տեղի ունեցող քաղաքական գործընթացները ստիպում են խոսել ավելի գլոբալ խնդիրներից և բարձրաձայնել քաղաքական հարցեր: Այդ իսկ պատճառով, ճիշտ կլինի այս քաղաքական հարթակում խոսենք քաղաքական խնդիրների վերաբերյալ, այլ ոչ թե առևտրային հարաբերություններ քննարկենք»,- ասել է Մարինա Խաչատրյանը:

Արտահերթ ելույթի ժամանակ Զարուհի Փոստանջյանը ևս խոսել է ներքաղաքական իրավիճակի մասին: 

«Ակնհայտ է, որ ողջ հանրապետությունում և հայ ազգի բոլոր հատվածներում քննարկվում է հայոց պետականության ձախողման և քաղաքական ճգնաժամի հարցը, այս ճգնաժամը լուծելու համար անհրաժեշտ է, որ իրականացնենք ներառող քաղաքական գործընթացներ և դրանք արդեն իսկ իրենց ազդակները տվել են»,- ասել է Զարուհի Փոստանջյանը:

Քանի որ ընդդիմադիր կուսակցության ելույթները ծավալուն էին և չէին տեղավորվում հատկացված 5 րոպե ժամանակի մեջ, ապա ելույթների շարունակությունը հնչում էր յուրաքանչյուր հաջորդ օրակարգային հարցից հետո: Նիստը վարող քաղաքապետ Տարոն Մարգարյանը խնդրեց ելույթներ ունենալ օրակարգի վերաբերյալ.

«Կխնդրեմ օրակարգի վերաբերյալ ելույթներ ունենալ, եթե քաղաքական ելույթներ եք ուզում՝ լիազորություն ունեք հրավիրել մամուլի ասուլիս և ձեր խոսքն ասել»,- հիշեցրեց Տարոն Մարգարյանը, սակայն կուսակցության անդմներն ընդդմացան՝ ասելով, որ իրավունք ունեն ելույթի, և ում չի հետաքրքրում, կարող է ազատել դահլիճը:

Զարուհի Փոստանջյանը քաղաքապետին կոչ արեց իրենց խորհուրդ տալու փոխարեն դահլիճում կարգ ու կանոն հաստատել և լռություն ապահովել, սակայն ավագանու ՀՀԿ-ական անդամները տեղից արձագանքում էին՝ իրենց դժգոհությունը ներկայացնելով:

«Ռեգլամենտը խնդրում ենք խիստ պահել, որովհետև հարթակ չունեն խոսելու, էստեղից են խոսում, մենք էլ էդքան տրամադրված չենք իրենց լսելու»,- ասաց ավագանու անդամներից մեկը, իսկ Լևոն Իգիթյանն առաջարկեց բարձրախոսն անջատել: 

Տարոն Մարգայանը, սակայն, խնդրեց լռություն պահպանել և թույլ տվեց ելույթները շարունակել: