Արտահերթ խորհրդարանական ընտրությունների անցկացումը ոչ միայն անհրաժեշտություն է, այլև պարտադիր. քննարկում Գյումրիում

Ե՞րբ է պետք անցկացնել խորհրդարանական արտահերթ ընտրություններ, ինչպիսի՞ն են լինելու մեխանիզմները և արդյո՞ք պետք է այս հարցում շտապողականություն ցուցաբերել: Այս հարցերի շուրջ այսօր Գյումրիի «Մեդիա կենտրոնը» հանրային քննարկում էր կազմակերպել:

Փորձագետներն արտահերթ խորհրդարանական ընտրությունների անցկացման անհրաժեշտությունը վերլուծել են ժամանակագրական հերթականությամբ՝ հեղափոխությունից մինչև «ԱԺ կանոնակարգ օրենքում» փոփոխությունների ընդունում: Հնչել են հակադիր կարծիքներ, բայց մեկ ընդհանուր եզրակացությամբ, որ հայաստանյան քաղաքական դաշտում ճգնաժամ է:

Հեղափոխությունից հետո արտահերթ խորհրդարանական ընտրությունների անցկացումը ոչ միայն անհրաժեշտություն է, այլև պարտադիր: Սա առաջին բանն էր,  որ շեշտեցին բանախոսները: Սա դեռ գարնանը՝  հեղափոխությունից հետո խորհրդարանական բոլոր ուժերին էր հայտնի, և բոլորը համակարծիք էին, որ մեկ տարվա ընթացքում պետք է տեղի ունենան արտահերթ ընտրություններ:

Ըստ փորձագետ Սեյրան Մարտիրոսյանի՝ խորհրդարանական մեծամասնությունը ինքը պետք է արտահերթ ընտրությունների առաջարկը հնչեցներ: Գործադիր մարմնում իշխանությունը փոխվել է,  իսկ օրենսդիրում նույն այդ իշխանությունը փոքրամասնություն է կազմում:  Այլ կերպ ասած, ըստ բանախոսների, Հայաստանում երկիշխանություն է ձևավորվել:

«Հայաստանում ստեղծվել է երկիշխանություն: Կա քաղաքական ուժ Նիկոլ Փաշինյանի գլխավորությամբ: Ես «Քաղաքացիական պայմանագիր»-ը չեմ համարում կայացած կուսակցություն, էլ չեմ ասում ՀՅԴ-ի մասին, որ 120 տարվա պատմություն ունի, բայց մինչև հիմա կայացած չէ:  ՔՊ-ն Երևանի ավագանու ընտրություններում ստացավ 81 տոկոս: 81 տոկոս ձայն ստանալ և չունենալ ընդդիմություն, դա մինուս է երկրի համար: Կարծում եմ՝ դեկտեմբերին նույն խնդիրը կառաջանա»,- հանրային քննարկման ժամանակ նման կարծիք հայտնեց ազգագրագետ Արտաշես Բոյաջյանը:

Իսկ ի՞նչ սցենարով է լուծարվելու խորհրդարանը: Այստեղ ևս մի քանի տարբերակ կա: Ամենաքիչ հավանականը փորձագետները համարում են այն, որ խորհրդարանական բոլոր ուժերը կհամաձայնեն վայր դնել մանդատները:

Հաջորդ սցենարը վարչապետի հրաժարականն է: Այստեղ էլ երաշխիքներ չկան,  որ խորհրդարանական մյուս ուժերը վարչապետի այլ թեկնածու չեն առաջադրի:

«4-5 սցենար կա: Ամենաթարմն այն է, որ Ազգային ժողովը պետք է բաղկացած լինի առնվազն 101 պատգամավորից: Եթե «Ելք» դաշինքի պատգամավորները և ցուցակի մյուս անունները հրաժարական են տալիս, ԱԺ կազմը կտրուկ պակասում է 101-ից և դառնում է հակասահմանադրական Ազգային ժողով: Սա բարդ, խուճուճ սցենարներից է»,- նշել է Գյումրիի ավագանու անդամ Լևոն Բարսեղյանը:

Հանրային քննարկմանը մասնակցել է նաև «Քաղաքացիական պայմանագիր» կուսակցության հիմնադիր անդամ Արթուր Համբարձումյանը: Նա նշեց, որ որքան շուտ լինեն ընտրությունները, այդքան կշահի պետությունը:

«Կարծում եմ, որ այս վիճակից դուրս գալու անհրաժեշտ, բայց ոչ բավարար պայմաններից մեկն Ազգային ժողովի լուծարումն է: Այնպես չէ, որ արտահերթ ընտրություններից հետո ռիսկերը իսպառ կվերանան»,- հավելեց նա:

Ազգային ժողովի արտահերթ ընտրությունները դեկտեմբերին անցկացնելը, ըստ մասնագետների, հնարավոր է: Այս ժամանակահատվածը բավարար է նաև Ընտրական օրենսգրքում փոփոխություններ կատարելու համար: Ընտրական օրենսգրքի փոփոխությունների ընդունումը մինչև հոկտեմբերի վերջ փորձագետները իրատեսական են համարում, այսինքն՝ ըստ նրանց,  դեկտեմբերին արտահերթ ընտրությունների անցկացման համար գոնե տեխնիկական խոչընդոտներ չկան: