Ես պարզապես Նիկոլ Փաշինյանն եմ. վարչապետը` ՀՅԴ պատգամավորին

Կառավարության հետ հարցուպատասխանի ժամանակ ՀՀ ԱԺ ՀՅԴ խմբակցության անդամ Արմենուհի Կյուրեղյանը նկատել է, որ  մաթեմաթիկական տրամաբանության մեջ հայտնի են խնդիրներ, պարադոքսներ, որոնք հնարավոր չէ ապացուցել: Կյուրեղյանն ասել է, որ տարածված այդ պարադոքսի խնդիրներից է ստախոսի խնդիրը, վարսավիրի խնդիրը և այլն:

«Վարսավիրի խնդիրը մի քիչ արդիական է, ուստի ներկայացնեմ ՝ գյուղում ապրում է մի վարսավիր, ով սափրում է այդ գյուղում ապրող այն գյուղացիներին, ովքեր իրենք րենց չեն սափրում: Հիմա հարց՝ այդ վարսավիրն ինքն իրեն սափրո՞ւմ է, թե՞ ոչ: Եթե վարսավիրն ինքն իրեն սափրում է, ապա, ըստ կանոնի, ինքն իրեն չպետք է սափրի: Եթե վարսավիրն ինքն իրեն չի սափրում, ապա, ըստ կանոնի, ինքն իրեն պետք է սափրի:

Ստացվում է հակասություն: Հիմա նման հակասությամբ խնդիր ես ձևակերպեցի Երևանի ավագանու ընտրություններում «Իմ քայլը» դաշինքի քարոզարշավին, երբ Դավթաշեն համայնքի վարչական տարածքում ելույթ էր ունենում վարչապետ Նիկոլ Փաշինյանը կամ Նիկոլ Փաշինյանը:

Հիմա, եթե որպես վարչապետ էր ելույթ ունենում, ապա դա չի դիտվելու որպես պաշտոնի չարաշահում: Իսկ եթե ելույթ էր ունենում որպես ՔՊ կուսակցության նախագահ, ապա ինչպես էր նա այդ հարթակից հրահանգ իջեցնում և մեջբերում՝ «ես այստեղից ԱԱԾ-ին, ոստիկանությանը հրահանգում եմ այս պահին իրականացնել ռեյդեր օլիգարխների, բարձաստիճան պաշտոնյաների…» և այլն, ամբողջը չմեջբերեմ, ժամանակի մեջ տեղավորվելու համար: Հիմա հարց՝ պարոն Նիկոլ Փաշինյան այդ պահին Դուք վարչապե՞տ Նիկոլ Փաշինյանն էիք, թե՞ ՔՊ կուսակցության նախագահ Նիկոլ Փաշինյանը»,- ասել է Կյուրեղյանը:

«Ձեր՝ էս անգամ ոչ լոռեցու միամիտ հարցին պատասխանեմ միամիտ կերպով՝ ես պարզապես Նիկոլ Փաշինյանն եմ», – ասել է վարչապետը:

Արմենուհի Կյուրեղյանը նշել է, որ ժողովրդի մոտ կարծիք կա, որ Փաշինյանը շատ արագ կերպարանփոխվում է վարչապետից հանրահավքի կազմակերպչի: Դուք ինքներդ քանի՞ տոկոսն եք համարում Ձեր մեջ վարչապետ և քանի՞ տոկոսը՝ հանրահավաքի ղեկավար:

«Միայն չասեք հավասար, քանի որ դա, մեղմ ասած, անազնիվ կլինի»,- հավելել է Կյուրեղյանը:

«Գիտե՞ք՝ ՀՀ-ում կան քաղաքական ուժեր, որոնք ավելի արագ են կերպարանափոխվում և ավելի մեծ ամպլիտուդներով, իսկ, ընդհանուր առմամբ, կարող եմ ասել, որ ես սովորաբար իմ դիրքորոշումներում, անելիքներում և ասելիքներում սիրում եմ լինել համարժեք: Եվ տվյալ դեպքում կարող եմ արձանագրել, որ ես Ձեր հարցին պատասխանեցի, և ես ասում եմ, որ ես հիմա էլ եմ Նիկոլ Փաշինյանը և այն, ինչ այստեղից ասում եմ, կարող եմ ասել նաև հանրահավաքում, գուցե,  բարձր գոռալով, որպեսզի վերջին շարքերին լսելի լինի: Քանի որ ԱԺ շարքերը նոսր են և գնալով նոսրանում են, այդ հանգամանքը ինձ հնարավորություն է տալիս այսպես պատասխանել Ձեր հարցին: Ինչ վերաբերում է իմ ելույթին, այնտեղ, որտեղ ես խոսել եմ որպես վարչապետ՝ խոսել եմ որպես վարչապետ, և այն, ինչ խոսել եմ որպես վարչապետ, չի վերաբերել  նախընտրական քարոզչությանը: Ինչ վերաբերել է նախընտրական քարոզչությանը, ես խոսել եմ որպես մի մարդ, որն իրավունք ունի խոսել նախընտրական քարոզչության վերաբերյալ»,- պատասխանել է Փաշինյանը: