Զարմացած եմ, որ ԲՀԿ-ն նախընտրեց դիմել ԿԸՀ, ոչ թե դատարան. Դանիել Իոաննիսյան

ՀՀ Կենտրոնական ընտրական հանձնաժողովի` սեպտեմբերի 29-ի նիստում ԿԸՀ-ն մերժեց «Բարգավաճ Հայաստան» կուսակցության լիազոր ներկայացուցիչ Ռուբեն Մանուկյանի կողմից ներկայացված դիմումը «Անկախ դիտորդ» դաշինքի` Երևանի ավագանու ընտրություններից մեկ օր առաջ` «լռության օրը», հրավիրված ասուլիսում ընտրախախտումների մասին բարձրաձայնումն անօրինական ճանաչելու վերաբերյալ:

Նիստի ավարտից հետո լրագրողների հետ զրույցում Ռուբեն Մանուկյանը նշեց, որ ԿԸՀ-ն «ապօրինի որոշում» է ընդունել:

«Այսինքն՝ կարելի է ընտրությունների նախօրեին՝ «լռության օրը», ցանկացած բան անել, ու դա կարելի՞ է ընդունել որպես նորմալ երևույթ»,- հարց ուղղեց նա:

Մանուկյանն ասաց, որ իրենց նկատմամբ հակաքարոզչություն է իրականացվել, հետագա քայլերի մասին նա չխոսեց, ասաց, որ կխորհրդակցեն իրավաբանների հետ:

ԲՀԿ ներկայացուցիչ Դավիթ Որսկանյանի խոսքով` «Անկախ դիտորդը» չճշտված ահազանգեր է ներկայացրել, թե իբր գումարներ են բաժանում, մինչդեռ ոստիկանությունն ու դատախազությունը նման հրապարակումներից, ելույթներից զերծ են մնացել, ասել են, որ կխոսեն ընտրություններից հետո:

«Ի՞նչն էր խանգարում դիտորդներին, որ զերծ մնային նման իրավիճակներից, երբ հնարավորություն ունեին դա երկուշաբթի անելու: Սա միտումնավորություն էր, մեղավորները թող պատժվեն»,- ասաց նա:

Որսկանյանը նշեց, որ դա իր ազդեցությունն էր ունեցել ընտրությունների արդյունքների վրա:

«Անկախ դիտորդ» դաշինքի անդամ Դանիել Իոաննիսյանը լրագրողների հետ զրույցում խոստովանեց` Ընտրական օրենսգրքով իրոք հստակ ամրագրված չէ «քարոզչություն» եզրույթը, սակայն նշեց, որ դա առիթ կլինի` հաջորդ ընտրություններից առաջ խնդրին անդրադառնալու:

«Ես մի քիչ զարմացած եմ, որ ԲՀԿ-ն նախընտրեց դիմում ներկայացնել ԿԸՀ, ոչ թե գնալ դատարան: Ընտրական օրենսգրքում շաբաթներ առաջ տեղի ունեցած փոփոխություններով նրանք կարող էին գնալ ուղիղ դատարան և պատասխանատվության կանչել անձին: Դա շատ ավելի էֆեկտիվ իրավական պաշտպանության մեխանիզմ է: Մի քիչ զարմացած ենք»,- ասաց նա:

Իոաննիսյանն ասաց, որ որևէ քարոզչություն, առավել ևս քարոզչության նպատակ չի եղել, նույն ասուլիսի ժամանակ քաղաքական այլ ուժերի խախտումների, ահազանգերի մասին էլ է բարձրաձայնվել, բազմակողմանիություն է ապահովվել, իրենք կենտրոնացած չեն եղել հենց ԲՀԿ-ի վրա և զարմացել են, որ ԲՀԿ ներկայացուցիչները եկան ասուլիսին, տապալեցին այն:

Խոսելով ԲՀԿ-ից գումար առաջարկելու վերաբերյալ համացանցում տարածված ձայնագրության մասին, Իոաննիսյանը նշեց, որ այդտեղ հանցակազմ որպես այդպիսին չկա, բայց իրավախախտումներ կան. քրգործ հարուցելու հիմք չկա, բայց հետևանքներ կարող են լինել այլ դաշտում, տարբեր օրենսգրքերի խախտումներ կան` ազգային, աշխատանքային: Հարցին` կարո՞ղ էին ասուլիսին արված բարձրաձայնումներն ազդել ընտրությունների արդյունքների վրա, նա պատասխանեց.

«Եթե ապատեղեկատվություն տարածեինք, կարող էին մեղադրել, որ ազդել ենք ընտրությունների վրա, բայց օբյեկտիվ տեղեկություններ ենք հրապարակել, դրանցով ընտրությունների վրա ազդեցության մեջ ոչ մի վատ բան չկա»: