«Ռա՛դ եղիր, սա Իսրայելն է». հրեաների պատասխանն Ադրբեջանի նախագահի սիրելի գործչին

Ադրբեջանա-իսրայելական քաղաքական ու ռազմական հարաբերությունների՝ վերջին շրջանի տհաճ զարգացումների ֆոնին օրերս Բաքվում Իսրայելի դեսպանությունում տեղի է ունեցել մի դեպք, որը կրկին ստվեր է գցել երկու երկրների բարեկամության շղարշի վրա:

Ադրբեջանի առաջատար լրագրող-խմբագիրներից մեկը համարվող, այդ երկրի նախագահ Իլհամ Ալիևի պալատական խոսնակ Էյնուլլա Ֆաթուլաևը փորձել է ստանալ Իսրայելի վիզա, սակայն այդ երկրի դեսպանության շեմին հանդիպել է իր համար ստորացուցիչ վերաբերմունքի:

«Ինձ տուրիստական ընկերություններն առաջարկեցին 280 մանաթի (164 դոլար) դիմաց կազմակերպել վիզայի հարցը, սակայն ես հրաժարվեցի՝ գերադասելով անձամբ դեսպանությունից ստանալ այն: Դեսպանատան դիմաց փորձում եմ կանգնեցնել ավտոմեքենան, վազելով մոտենում է հսկիչը, թե այստեղ չի կարելի մեքենան կանգնեցնել, քանի որ Իսրայելի դեսպանության տարածքն է»,- գրում է Ֆաթուլաևը՝ վրդովվելով, որ քիչ այն կողմում գտնվող իրանական դեսպանության մոտ կարելի է ավտոմեքենա կանգնեցնել, իսկ Իսրայելի դեսպանության մոտ՝ ոչ:

Ադրբեջանցի խմբագրի վրդովմունքին անվտանգության աշխատակիցը պատասխանել է հարցով՝ իսկ դուք չգիտե՞ք Իսրայելի և Իրանի միջև եղած տարբերությունը:

Այս դրվագից էլ սկսվում են ադրբեջանա-իսրայելական բախումները հրեական դեսպանությունում: Ֆաթուլաևի դժգոհությանը, թե ինքը Ադրբեջանի տարածքում է, իսրայելցի հսկիչները պատասխանում են լակոնիկ. «լռի՛ր և հերթ կանգնիր»:

Որոշ ժամանակ անց, երբ գալիս է պալատական լրագրողի հերթը, վերջինից պահանջում են փաստաթղթեր՝ միաժամանակ հանել ձեռքերը գրպաններից: Ֆաթուլաևը, իր խոսքով, չի հանդուրժում ադրբեջանցիների նկատմամբ հրեաների արհամարհական և ցինիկ վերաբերմունքը, պատասխանում է դեսպանության աշխատողներին նկատողությամբ և ստանում պատասխան.

«Ռա՛դ եղիր այստեղից, սա Իսրայելն է»:

Հետո կատարվում է զավեշտի հաջորդ փուլը:

Րոպեներ անց Էյնուլլա Ֆաթուլաևը կրկին հերթ է կանգնում, և երբ հասնում է նրա ժամանակը, մատով իր մոտ է կանչում դեսպանության անվտանգության բաժնի ղեկավարը և հարցնում.

– Դու ինչպե՞ս ես խոսում մեր գործընկերոջ հետ:

– Նորմալ: Ինձ հրահանգում են ձեռքերը չպահել գրպանում, բայց ես բանտում կամ բանակում չեմ: Այդ ի՞նչ տոն է,- նեղսրտում է ադրբեջանցի խմբագիրը:

– Այստեղ դուք պարտավոր եք մեր կանոններին ու պահանջներին ենթարկվել: Եթե ուզում ես վիզա ստանալ, լռի՛ր ու արա՛ այն, ինչ քեզ ասում են,- կոշտ կերպով խոսքն ավարտում է հրեա աշխատակիցը:

Քիչ անց, սակայն, իսրայելական կանոններին չենթարկվող ադրբեջանցուն, այնուամենայնիվ, հեռացնում են դեսպանության տարածքից՝ հրաժարվելով մուտքի արտոնագիր տալ:

Հրապարակման վերջում ադրբեջանցի խմբագիրը դժգոհում է, որ իր երկրում ոչ ոք օգնության ձեռք չի մեկնել իրեն՝ նշելով, որ ավելի լավ է՝ իրենք Իսրայելի հետ կոնֆլիկտ չունենան. նրանց հետ վտանգավոր է:

Ի վերջո, Իսրայելից նեղացած ադրբեջանցի պալատական խմբագիրը եզրակացնում է՝ ավելի լավ է Իրան գնալ, քան Իսրայել. գոնե Իրանում ամեն քայլափոխի իրեն «ռադ չեն անում» ադրբեջանցի լինելու համար, իսկ եթե նույնիսկ «ռադ են անում», ապա «հնագույն պարսկական մշակույթն ու կրոնական ավանդույթներն արգելում են վիրավորանքն ու բռնությունը: Գոնե հրապարակային ու ցուցադրական մակարդակում»,- նեղսրտած ավարտում է խոսքը ադրբեջանցի խմբագիրը: