Ադրբեջանը հայտարարում է Իսրայելի հետ նոր ռազմական դրոն արտադրելու մեկնարկի մասին

Ադրբեջանն ու Իսրայելը սկսել են իսրայելական Pegasus-120 պտուտակավոր հետախուզական անօդաչու թռչող սարքի համատեղ արտադրությունը։ Արտադրությունը կազմակերպվում է ադրբեջանական Azad systmes և իսրայելական Aeronautics ընկերությունների կարողությունների հիման վրա։ Այս մասին տեղեկացնում է ադրբեջանական լրատվամիջոցներից մեկը։

Մինչ այս արդեն հայտնի էր դարձել երկու երկրների կողմից այս սարքի համատեղ արտադրություն սկսելու մտադրության մասին։ Անօդաչու թռչող այս սարքը նորագույններից է իսրայելական ընկերության տեսականու մեջ, այն ներկայացվել է 2017 թվականի ամռանը։ Իսկ Ադրբեջանն այս ընկերության հետ համագործակցության մեծ փորձ ունի։ Իսրայելական այս արտադրողն է ադրբեջանական բանակին մատակարարել Orbiter ընտանիքի հետախուզական ու մահապարտ անօդաչու թռչող սարքեր, ապա նաև օգնել Ադրբեջանում այդ սարքերի արտադրությունը կազմակերպելուն։

Ադրբեջանական գերատեսչության ու իսրայելական ընկերության ստորագրած փաստաթուղթը պայմանագրային պարտավորություններ չի ենթադրում, կարող է և «ջրվել», բայց հնարավոր գործարքի դեպքում Ադրբեջանը կստանա նոր դասի անօդաչու թռչող սարքեր՝ պտուտակավոր։ Այս սարքերը կարողանում են ուղղաթիռի նման կախվել օդում և կայուն դիտարկում իրականացնել։ Ինքնաթիռային տիպի սարքերի հետ համեմատած՝ սրանց թերությունը թռիչքի կարճ տևողությունն է և փոքր բեռնատարողությունը՝ թեև կոնկրետ Pegasus 120 հետախուզական սարքը կկարողանա մինչև 75 կգ ընդհանուր զանգվածով տեսադիտարկման ու այլ հետախուզական տեխնիկա կրել։

Ավելացնենք նաև, որ իսրայելական նույն ընկերությունն էր, որ նախորդ տարվա ամռանը միջազգային սկանդալի կենտրոնում հայտնվեց։ Հուլիսին Aeronautics ընկերության երկու պաշտոնաթող աշխատակիցներ հայտարարել էին, որ Ադրբեջանում իրենց խնդրել են Orbiter-1K մահապարտ ԱԹՍ-ներով գրոհել հայկական դիրքերը։ Իրենց հրաժարվելուց հետո դա արել էր ընկերության բարձրաստիճան մասնագետը։

Oգոստոսին, դեպքի հետ կապված, Իսրայելի պաշտպանության նախարարության համապատասխան գործակալությունն ընկերությանն արգելել էր անօդաչու թռչող սարքերի հետագա վաճառքը «նշանակալի գնորդին» (Ադրբեջանի անունը չէր հիշատակվում, բայց առանց դրա էլ պարզ էր, թե որ երկիրն է գնորդը)։ Նույն հարցի վերաբերյալ անօդաչուներն արտադրող ընկերությունը հայտնել էր, որ «նշանակալի գնորդի» հետ ունի 20 միլիոն դոլարի պայմանագիր։

Այս տարվա օգոստոսին էլ հայտնի դարձավ, որ ընկերության մասնագետներին մեղադրանք է առաջադրվելու հայկական դիրքերի դեմ գործողությանը մասնակցելու համար։ Մեկ տարի ձգված քննությունից հետո հարցաքննության կանչվողների մեջ են ընկերության տնօրեն Ամոս Մաթանը, փոխտնօրեն Մեիր Ռիզմովիչը, զարգացման տնօրեն Հաիմ Հիվաշարը և մարկետինգի տնօրեն Դավիթ Գոլդինը։ Հնարավոր է, որ այս գործից բացի, ընկերության ներկայացուցիչներին նաև այլ մեղադրանքներ առաջադրվեն։