Հետաձգվել է Պուտինի այցը Բաքու. նա այնտեղ կմնա մի քանի ժամ

Ռուսաստանի նախագահի` Ադրբեջան այցը հետաձգվել է մինչև հնարավոր վերջին պահը։ Վլադիմիր Պուտինը Բաքու է մեկնելու վաղն  առավոտյան, որտեղից ցերեկը թռչելու է Տաջիկստան` ընդամենը մի քանի ժամ անցկացնելով Ադրբեջանում: Այս մասին այսօր տեղեկացրել է Ռուսաստանի նախագահի խոսնակ Դմիտրի Պեսկովը։

Նույն օրը՝ երեկոյան, ծրագրված է Պուտինի այցը Դուշանբե, որտեղ պետք է նախապատրաստվել ԱՊՀ անդամ պետությունների ղեկավարների հանդիպմանը։ Դրա հետ կապված՝ Պուտինը ցերեկը մեկնելու է Տաջիկստան։ Իսկ մինչ այդ մի քանի անկարևոր միջոցառումների է մասնակցելու Ադրբեջանի մայրաքաղաքում։

«Վաղը վաղ առավոտյան նախագահը թռչելու է Բաքու, որտեղ կայանալու է ռուս-ադրբեջանական միջռեգիոնալ համաժողովը։ Երկրների ղեկավարներ Պուտինը և Ալիևը կշփվեն երկրամասերի ղեկավարների հետ, ելույթ կունենան նրանց առաջ, բայց մինչ այդ նախագահը ներկա կլինի Բաքվում անցկացվող ձյուդոյի աշխարհի առաջնության մի քանի մրցումների»,- հայտնել է Պեսկովը։

Մինչ այս նախատեսված էր, որ Պուտինը Բաքու է այցելելու ավելի վաղ՝ սեպտեմբերի 25-ին, և նրա ուշանալը կասկածի տեղիք էր տալիս։ Բանն այն է, որ դեռ սեպտեմբերի 1-ին երկու նախագահները հանդիպել էին Մոսկվայում՝ Ալիևի այցի ընթացքում, երբ տասնյակից ավելի կարևոր փաստաթղթեր ստորագրվեցին երկու նախագահների ներկայությամբ։ Ալիևն այդ օրը Պուտինին հրավիրեց Ադրբեջան, իսկ սեպտեմբերի 8-ին Ռուսաստանի նախագահի օգնականը հայտնեց, որ սեպտեմբերի վերջին Պուտինն իրոք կայցելի Բաքու։

Սա կասկածելի էր այն իմաստով, որ այդքան փաստաթղթերի ստորագրումից հետո, թվում է, այլ կարևոր թեմաներ առանց քննարկման չեն մնացել։ Ավելի ուշ հայտնի դարձավ, որ Ռուսաստանի նախագահը Ադրբեջան է մեկնելու ոչ այնքան կարևոր միջոցառումների մասնակցելու՝ ձյուդոյի աշխարհի առաջնություն և երկրամասերի ղեկավարների համաժողով։

Ադրբեջանում արդեն սկսել էին տեղեկություններ շրջանառել, թե Ռուսաստանի նախագահը մասնակցելու է նաև Բաքվում անցկացվող ռազմարդյունաբերական ցուցահանդեսին։ Իսկ ադրբեջանցի որոշ գործիչներ բողոքի ձայն էին հնչեցնում այս այցի կապակցությամբ։ Հավաքի մասնակիցների հայտարարության մեջ նշվում էր, որ նրանք աջակցում են ռուս-ադրբեջանական հարաբերություններին ու ռազմատեխնիկական համագործակցությանը, սակայն դեմ են, որ «Ռուսաստանն ընդդիմանա Ադրբեջանի ժողովրդավարացմանը»։

Հետո արդեն կասկածներ առաջացան, երբ սեպտեմբերի 10-ին Ռուսաստանի Պետդումայի ԱՊՀ գործերով, եվրասիական ինտեգրման կոմիտեի նախագահ Լեոնիդ Կալաշնիկովը հայտարարեց, որ Պուտինը Բաքու կայցելի սեպտեմբերի 25-ին։ Իսկ երկու օր անց էլ նույն Կալաշնիկովը հայտնեց, թե Պուտինը կայցելի ոչ թե հենց 25-ին, այլ սեպտեմբերի 25-27 ժամանակահատվածում որևէ օր, սակայն մինչև սեպտեմբերի 26-ի կեսօր այս այցի մասին տեղեկությունները չէին հաստատվում, մինչև Պեսկովը չազդարարեց այցի մանրամասները։