Այսօր Հայաստանում սկսվել է հեղափոխություն. Նիկոլ Փաշինյան

Հայաստանի վարչապետ Նիկոլ Փաշինյանը հայտարարել է, Հայաստանում սկսվել է հեղափոխություն, որը նույնքան կարևոր է, որքան 2018 թվականին տեղի ունեցած ոչ բռնի, թավշյա, ժողովրդական հեղափոխությունը։ «Արմենպրես»-ի փոխանցմամբ՝ Փաշինյանն այս մասին ասել է ՀՀ ԱԺ-ում ունեցած ելույթում։

«Այսօր Հայաստանում սկսվել է հեղափոխություն, որը, եթե ոչ առավել, առնվազն նույնքան կարևոր է, որքան 2018 թվականի ժողովրդական, ոչ բռնի թավշյա հեղափոխությունը: Եվ այդ հեղափոխությունն էլ է ավարտվելու ժողովրդական հաղթանակով: Տեղի է ունենում իրական Հայաստանի սոցիալ-հոգեբանական հեղափոխությունը: Այդ հեղափոխության առանցքային արձանագրումն այն է, որ վերջին մի քանի հարյուրամյակներում առաջին անգամ միջազգայնորեն ճանաչված մեր պետությունն ու մեր հայրենիքը նույնական են՝ մեր հայրենիքը Հայաստանն է: Պետությունը, որում ապրում ենք, նույնպես Հայաստանն է»,-ասել է Փաշինյանը:

Ըստ նրա՝ ընդդիմությունն այդպես էլ չի ընդունում սա, չի հասկանում, թե ինչ է «հայրենիքը պետությունն է» կարգախոսը և ինչ բացատրություն ունի:

«Իսկ բացատրությունն այն է, որ վերջին առնվազն 6 դարում մենք ապրել ենք մի իրավիճակում, երբ մեր հայրենիքը եղել է Հայաստանը, իսկ պետությունը՝ Պարսկաստանը, հայրենիքը եղել է Հայաստանը, պետությունը՝ Օսմանյան կայսրությունը, հայրենիքը՝ Հայաստանը, պետությունը՝ Ռուսական կայսրությունը, հայրենիքը՝ Հայաստանը, պետությունը՝ Խորհրդային Միությունը: Եվ ինչպես պարզ թվարկումը ցույց է տալիս, պետությունը հիմնականում ատելի է եղել մեզ համար, իսկ հայրենիքը՝ սիրելի ու խեղճ ու կրակ: Եվ այս սոցիալ-հոգեբանությունը մեզ համար դարձել է ձեռքբերովի ռեֆլեքս՝ ատելություն պետության և նրա ատրիբուտների ու կառուցակարգերի նկատմամբ, հուսահատ և անկանոն սեր հայրենիքի նկատմամբ: Սա է պատճառը, որը ընդդիմությունը հուսահատ աղաղակում է՝ «ժողովուրդ հասեք, սրանք բյուջե են լցնում»: Որովհետև բյուջեն ու հարկը պետության ատրիբուտ են, հետևաբար ենթագիտակցորեն կամ ձեռքբերովի ռեֆլեքսի համաձայն՝ ատելի: Նրանք չեն ուզում, որ այստեղ պետություն լինի: Նրանք ուզում են, որ այստեղ լինի հայրենիք, որովհետև հայրենիքը պետական սահման չունի, իսկ պետությունը՝ ունի…»,–ասել է Փաշինյանը:

Նա շեշտել է՝ պատասխանատու կերպով կարող է հայտարարել, որ այսօր պետություն ունենալու այնպիսի շանս կա, որ չի եղել երբեք: Իսկ թե ինչ է պետք անել այդ շանսն օգտագործելու համար՝ վարչապետն ասել է.

«Նախ պետք է հաղթահարել պետության նկատմամբ այդ ռելիկտային, մնացորդային ատելությունը, որ ձեռքբերովի ռեֆլեքսի նման ուղեկցում, առաջնորդում է մեզ: Եվ սրան զուգահեռ ամեն ինչին պետք է նայել պետական շահի տեսակետից՝ ընդունելով և ճանաչելով այդ շահի գերակայությունը: Իսկ պետական շահը տնտեսական զարգացումն է»:

Փաշինյանը հավելել է՝ տնտեսական զարգացման համար հարկավոր է խաղաղություն և օրինականություն, իսկ այս ամենն ապահովելու համար անհրաժեշտ է կրթություն և աշխատանք:

«Նոր հայացքով, նոր աչքերով մեր տարածաշրջանին ու աշխարհին նայելը կրթական պրոցես է: Ու տարածաշրջանում ինքներս մեզ նոր հայացքով ու նոր աչքերով նայելը նույնպես կրթական պրոցես է, որովհետև տարածաշրջանը, որտեղ կա Հայաստան-հայրենիք, մի բան է, իսկ տարածաշրջանը, որտեղ կա Հայաստան-պետություն, հայրենիք-պետություն-Հայաստանի Հանրապետություն, բոլորովին ուրիշ բան է»,–ասել է վարչապետը: