Դեղերի պետական գրանցման գործընթաց, առկա խնդիրներ ու կարգավորումներ. քննարկում Առողջապահության հարցերի մշտական հանձնաժողովում

ԱԺ առողջապահության հարցերի մշտական հանձնաժողովը կազմակերպել էր աշխատանքային քննարկում դեղերի պետական գրանցման գործընթացի, առկա խնդիրների ու լուծմանն ուղղված մեխանիզմների վերաբերյալ:

Հանձնաժողովի նախագահ Արսեն Թորոսյանը կարեւորել է նմանատիպ քննարկումները ոլորտի խնդիրները բարձրաձայնելու եւ դրանց կարգավորման համար անհրաժեշտ գործիքակազմեր առաջարկելու տեսանկյունից:

Անկախ դեղատների ասոցիացիայի նախագահ Արթուր Խաչատրյանը ոլորտային երկու խնդրի է անդրադարձել՝ ՀՀ-ում դեղորայքի հասանելիությանը եւ դեղերի որակի ու անվտանգության ստուգման գործընթացին:

Ներկայացնելով մի շարք վիճակագրական տվյալներ ու հետազոտություններ՝ Արթուր Խաչատրյանը կարծիք է հայտնել, որ Հայաստանում դեղերի օրինական հասանելիության հարցը չլուծելու դեպքում շարունակվելու է մաքսանենգ եւ չգրանցված ճանապարհով դեղերի շրջանառությունը:

Զեկուցողը խոսել է նաեւ օրենսդրական դաշտի կարգավորումների մասին: Նրա կարծիքով անհրաժեշտ է ուսումնասիրել ԵԱՏՄ միասնական գրանցամատյանի ցանկը, եւ քանի որ այդ դեղերը գրանցվում են նույն նորմատիվային կարգով, ինչպես ՀՀ-ում, պետք է ԵԱՏՄ միասնական գրանցամատյանում ճանաչել նաեւ այն դեղերը, որոնք անհրաժեշտ են ՀՀ բնակչությանը: Արթուր Խաչատրյանի գնահատմամբ ՀՀ-ում դեղերի որակի լաբորատոր փորձաքննությունը պետք է դարձնել պարտադիր՝ հաշվի առնելով նախկին իրավական փորձը:

ՀՀ առողջապահության նախարար Անահիտ Ավանեսյանը հավաստիացրել է՝ դեղորայքային շուկայի եւ դեղորայքային անվտանգության հետ կապված խնդիրներն իրենց ուշադրության կենտրոնում են:

Նախարարը մանրամասնել է դեղերի գրանցման ընթացակարգերը, նշել, որ Հայաստանը, լինելով ԵԱՏՄ անդամ երկիր, կաշկանդված է համապատասխան օրենսդրությամբ եւ պարտավոր է հետեւել ԵԱՏՄ կարգավորումներին: Ոլորտային պատասխանատու նախարարի խոսքով մեր երկիրը չի կարող ԵԱՏՄ-ից տարբեր կարգավորումներ ունենալ: Դրա համար ընտրվել է չգրանցված դեղերի ներմուծման հնարավորությունների ընդլայնման ճանապարհը:

Խոսելով դեղերի որակի ստուգման հարցի մասին՝ նախարարն իրազեկել է՝ պարտադիր չէ, որ դեղի փորձաքննությունն իրականացնի Դեղերի փորձագիտական կենտրոնը, այլ իրականացնում է ներմուծողը՝ հիմնվելով իր ներքին փորձաքննությունների վրա: Գործում է նաեւ դեղերի որակի մշտադիտարկման էլեկտրոնային համակարգ, որտեղ ներմուծված տեղեկատվությամբ դեղերի որակի հետ կապված խնդիրներ չկան:

Անահիտ Ավանեսյանը տեղեկացրել է, որ նախատեսվում են փոփոխություններ դեռեւս 2016 թվականին ընդունված «Դեղերի մասին» օրենքում: Քննարկումներին կհրավիրվեն շահագրգիռ բոլոր կողմերը:

Հարցուպատասխանի ու ելույթների ընթացքում անդրադարձ է եղել չգրանցված դեղերի ներմուծման ընթացակարգերին, ազգային գրանցման մեխանիզմները երկարաձգելու հնարավորությանը, դեղերի շուկայում պետական գնումների իրականացման արդյունավետությանը, անձնական կարիքների համար որոշակի քանակով դեղերի ներմուծման պայմաններին եւ օրենսդրական լուծում պահանջող մի շարք խնդիրների:

Ձեռք բերված պայմանավորվածության համաձայն՝ քննարկման մասնակիցներն առաջիկայում կներկայացնեն գրավոր առաջարկներ, որոնք անհրաժեշտ օրենսդրական փոփոխությունների հիմք կարող են հանդիսանալ:

Մարտի 24-ի քննարկմանը մասնակցել են ներկայացուցիչներ Կառավարությունից, դեղատնային ու բժշկական ասոցիացիաներից, բժշկական կենտրոններից, դեղատներից ու դեղագործական ընկերություններից: