ԵԽԽՎ-ում ադրբեջանական պատվիրակության լիազորությունները կարող են սառեցվել ևս մեկ տարով

Երևան մեկնելուց առաջ Վրաստանի վարչապետ Կոբախիձեն մեկնաբանել է ԵԽԽՎ-ում վրացապան պատվիրակության շուրջ ստեցծված իրավիճակը: Նա դաստապարտել է Թբիլիսիի դեմ Ստրասբուրգի ճնշումները՝ հայտարարելով, որ Վրաստանը կվերականգնի լիակատար հարաբերությունները Եվրախորհրդի հետ, միայն եթե եվրոպացի գործընկերները դադարեն խոսել վերջնագրների լեզվով: Ստեղծված իրավիճակը կարո՞ղ է նշանակել, որ Վրաստանը սառեցնում է իր աշխատանքը ԵԽԽՎ-ում: Ինչպե՞ս այս իրավիճակը կազդի մեզ վրա, «Հորիզոնի» տաղավարում մանրամասներ է ներկայացրել Արտյոմ Երկանյանը։

«Հիշեցնեմ նախապատմությունը. ԵԽԽՎ խոշորագույն քաղաքական ուժը՝ «Ժողովրդական կուսակցությունը», առաջարկում էր ընդհանրապես չհաստատել Վրաստանի պատվիրակության լիազորությունները, և մի շարք երկրներ դրան կողմ էին, օրինակ՝ Ուկրաինան, իսկ որոշ երկրներ էլ՝ դեմ, օրինակ՝ Հունգարիան։ Ի դեպ, Վրաստանի ընդդիմադիրները նույնպես կոչ էին անում չհաստատել վրացական պատվիրակության լիազորությունները։

Արդյունքում, հաստատվեցին պատվիրակության լիազորությունները, բայց նախապայմաններ առաջ քաշվեցին այն մասին, որ Վրաստանում խորհրդարանական ընտրություններ անցկացվեն, որպեսզի Վրաստանը վերականգնի վերաինտեգրման ուղին, ազատ արձակի քաղբանտարկյալներին և հարգի մարդու իրավունքները։ Վրաստանի իշխանությունները դա որակեցին որպես շանտաժ և համարեցին, որ իրենք պետք է հրաժարվեն ԵԽԽՎ-ի հետ համագործակցությունից։ Համենայն դեպս, այս նստաշրջանի ընթացքում, կարծում եմ, Վրաստանի պատվիրակությունը չի մասնակցի նիստերին, ըստ էության՝ խզելով կապը խորհրդարանական վեհաժողովի հետ։

Հայաստանի համար սա կարող է ունենալ ինչպես տակտիկական առավելություններ, այնպես էլ՝ երկարաժամկետ խնդիրներ։ Մի կողմից՝ մեզ պետք է, որ մեզ Եվրոպայում սկսեն ավելի շատ գնահատել՝ հաշվի առնելով այն, որ Հայաստանը տարածաշրջանի միակ երկիրն է, որը հարգում է եվրոպական արժեքները, հավատարիմ է ստանձնած պարտավորություններին և մարդու իրավունքները գնահատում է այնպես, ինչպես Եվրոպայում է ընդունված։ Եվ մենք դրանից, կարծես, ինչ-որ չափով օգտվում ենք։ Օրինակ՝ մեր պատվիրակության անդամ Արուսյակ Ջուլհակյանը ընտրվել է ԵԽԽՎ փոխնախագահ, իսկ Վլադիմիր Վարդանյանն էլ՝ խոշորագույն քաղաքական ուժի՝ «Ժողովրդական կուսակցության» խմբակցության փոխնախագահ։

Բայց այստեղ նաև խնդիրներ կան։ Բանն այն է, որ Վրաստանի՝ ԵԽԽՎ-ից հեռանալուց հետո, Ադրբեջանին ավելի հեշտ կլինի փաստարկել իր վարկածը այն մասին, որ ճնշման և պատժամիջոցների այսպիսի տակտիկան արդյունավետ չէ, և դրանից պետք է հրաժարվել։ Այսպիսով, արդեն 4 եվրոպական պետություն դուրս է եկել ԵԽԽՎ-ից. Վրաստանից և Ադրբեջանից բացի՝ նաև Ռուսաստանն ու Բելառուսը։ Ադրբեջանը շահագրգռված է, որ որքան հնարավոր է շատ լինեն այդպիսի երկրները, քանի որ համատեղ ուժերով ավելի հեշտ է պայքարել և ապացուցել, որ այդ քայլերը արդյունավետ չեն։

Արդեն ԵԽԽՎ-ում կան մարդիկ, ովքեր այս վարկածը պատրաստ են պաշտպանել։ Այս նստաշրջանի առաջին իսկ նիստում Հունգարիայի պատվիրակության անդամ Ժոլտ Նեմետը հայտարարել է, որ մեկ տարի առաջ ԵԽԽՎ-ն սխալ է գործել՝ չճանաչելով Ադրբեջանի պատվիրակության լիազորությունները, և կոչ է արել վերանայել այդ որոշումը։ Անգամ Լյուքսեմբուրգի արտգործնախարարը նույն այդ նիստում հայտարարել է, որ ժամանակն է մտածել Ադրբեջանի հետ հարաբերությունները վերականգնելու մեխանիզմների մասին։

Այս ամենը, իհարկե, բխում է Ադրբեջանի շահերից, և կարծում եմ, որ այս հարցում Վրաստանի իշխանությունները Ադրբեջանի իշխանությունների հետ նույնիսկ համաձայնեցնում են ինչ-որ քայլեր»,- ասաց Արտյոմ Երկանյանը:

Մանրամասները՝ ամբողջական հարցազրույցում: