Պետական-իրավական հարցերի մշտական հանձնաժողովը դրական եզրակացություն է տվել քննարկված նախագծերին

Պետական-իրավական հարցերի մշտական հանձնաժողովի` դեկտեմբերի 4-ի արտահերթ նիստում երկրորդ ընթերցմամբ քննարկվել է Կառավարության հեղինակած ««Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում լրացում եւ փոփոխություններ կատարելու մասին» օրինագիծը:

ՀՀ արտաքին գործերի նախարարի տեղակալ Մնացական Սաֆարյանը հիշեցրել է, որ նախաձեռնության ընդունումը պայմանավորված է դիվանագիտական աստիճանի համար դիվանագետներին տրվող հավելավճարի չափի վերանայման անհրաժեշտությամբ:

Հիմնական փոփոխությունները` այստեղ:

Զեկուցողի խոսքով առաջին ընթերցումից հետո կատարվել են տեխնիկական փոփոխություններ:

ՀՀ ընտրական օրենսգրքում եւ կից մի շարք օրենքներում փոփոխություններ ու լրացումներ նախատեսող օրենսդրական փաթեթի լրամշակված տարբերակը ներկայացրել է ՀՀ արդարադատության նախարար Սրբուհի Գալյանը:

Նրա բարձրաձայնել է այն առաջարկները, որոնք ներկայացվել են ԱԺ խմբակցությունների, պատգամավորների եւ Կառավարության կողմից առաջինից երկրորդ ընթերցում ընկած ժամանակահատվածում: Նշվել է, որ փաթեթից հանվել են ռազմական եւ արտակարգ դրության ժամանակ ընտրությունների կազմակերպմանն առնչվող փոփոխությունները: Զեկուցողի տեղեկացմամբ դրանք հետագայում կքննարկվեն առանձին փաթեթի շրջանակում:

«Մենք չենք հրաժարվել կարգավորումներից, այլ հետաձգել ենք դրանց քննարկումը, որպեսզի կարողանանք ավելի լավ լուծումներ գտնել»,- ընդգծել է Սրբուհի Գալյանը:

Նշվել է, որ թեկնածուներին գրանցելու ժամանակ կուսակցության կանոնադրությունը ստուգելուն վերաբերող կարգավորումները նույնպես հանվել են նախաձեռնությունից, քանի որ, ըստ նախարարի, առկա է գործընթացը ծանրաբեռնելու ռիսկ, ինչի արդյունքում կարող էին տուժել նաեւ թեկնածուները` կանոնադրության ստուգման հետեւանքով բաց թողնելով իրենց համար սահմանված ժամկետները:

Ըստ զեկուցողի` կանանց ներգրավվածությունը խթանելու եւ որոշումների կայացման գործընթացում նրանց հավասար մասնակցությունն ապահովելու նպատակով առաջարկվում է սահմանել, որ եթե պակաս ներկայացված սեռի թեկնածուները հրաժարվում են մանդատներից եւ ցուցակում այլեւս չկա այդ սեռի ներկայացուցիչ, ապա համապատասխան մանդատները մնում են թափուր, այլ ոչ թե համալրվում են մյուս սեռի ներկայացուցիչներով: Առաջարկվում է հստակեցնել, որ թեկնածուի` կուսակցության լիազոր ներկայացուցիչ եւ տեղամասային հանձնաժողովի անդամ կարող է լինել միայն ՀՀ քաղաքացին:

«Առաջարկվում է նաեւ նախատեսել, որ կուսակցությունը նվիրատվություններն ու անդամավճարները կարող է ստանալ իր ընտրությամբ, բայց միայն մեկ բանկում բացված հաշիվներով, որի վերաբերյալ տեղեկությունը պետք է ներկայացնի Կոռուպցիայի կանխարգելման հանձնաժողով: Կուսակցությունները պետք է որոշակի պարբերականությամբ բանկից ստանան այն տեղեկությունները, որոնք վճարումներ կատարելիս ֆիզիկական անձինք տրամադրել են բանկին` ներառյալ փոխանցված գումարի չափի մասին տեղեկությունները»,- ընդգծել է Սրբուհի Գալյանը եւ հավելել, որ փոփոխությունների նպատակն է հնարավորություն տալ կուսակցություններին եւ ԿԿՀ-ին` արդյունավետ վերահսկելու նվիրատվությունների վերին սահմանաչափերը գերազանցելու դեպքերը, եւ ավելի փոխանցված գումարները վերադարձնել հասցեատերերին, կուսակցություններին էլ զերծ պահել խախտումներից ու չարաշահումներից:

Նշվել է, որ իշխող խմբակցության եւ ընդդիմության կոնսեսուսային առաջարկների հիման վրա վերանայվել են կուսակցության ֆինանսավորման տարբեր եղանակների սահմանաչափերը: Օրինակ` մեկ ֆիզիկական անձի կողմից մեկ տարվա ընթացքում կուսակցություններին կատարվելիք նվիրատվության շեմը առաջարկվում է 2,5 մլն դրամից դարձել 10 մլն դրամ: Ընդ որում, ընդհանուր շեմի շրջանակում ֆիզիկական անձը նվիրատվություն կարող է կատարել բոլոր կուսակցություններին: Կուսակցության տարեկան մուտքերի սահմանափակումը 500 մլն դրամի փոխարեն առաջարկվում է սահմանել 1 մլրդ դրամի չափով:

«Այս շեմը չի գործի ընտրությունների ընթացքում, քանի որ փոփոխություններով արդեն նախընտրական հիմնադրամներին մուծումներն արվելու են կուսակցության միջոցով»,- մանրամասնել է զեկուցողը:

Կուսակցություններին տրվող պետական ֆինանսավորման մասով առաջարկվում է ընդհանուր ֆինանսավորման շեմը 60 տոկոսից դարձնել 80 տոկոս, իսկ նպատակային ֆինանսավորման դեպքում` 10 տոկոսը սահմանել կանանց ներգրավվածության համար, իսկ մյուս 10 տոկոսը` տարածքային կառույցների համար:

Նախաձեռնությամբ նաեւ հստակեցվել են Կենտրոնական ընտրական հանձնաժողովի վերահսկիչ, վերստուգիչ ծառայության լիազորությունները:

Նախատեսվում է, որ փաթեթն ուժի մեջ կմտնի 2025 թվականի ապրիլի 1-ից: Կուսակցությունների ֆինանսական վերահսկողության գործառույթը Կոռուպցիայի կանխարգելման հանձնաժողովի եւ Կենտրոնական ընտրական հանձնաժողովի միջեւ բաշխելուն վերաբերող կարգավորումներն առաջարկվում է ուժի մեջ մտցնել 2025 թվականի հունվարի 1-ից:

Կատարվել են նաեւ տեխնիկական փոփոխություններ: Փաթեթից հանվել է երկու օրինագիծ:

Նախարարը պատասխանել է պատգամավորների հարցերին:

Անդրադառնալով «Հայաստան» խմբակցության ներկայացրած այն առաջարկներին, որոնք Կառավարությունը չի ընդունել` Սրբուհի Գալյանը նշել է, որ դրանք գործադիրի կողմից նպատակահարմար չեն համարվել:

Հարակից զեկուցող, պատգամավոր Արփինե Դավոյանը նշել է, որ նախաձեռնության վերաբերյալ անցկացվել են աշխատանքային քննարկումներ եւ խորհրդարանական լսումներ, սակայն դեռեւս որոշ հարցերի վերաբերյալ չկա միասնական դիրքորոշում: Պատգամավորը հորդորել է կողմ քվեարկել փաթեթին:

Քննարկված նախաձեռնությունները ստացել են դրական եզրակացություն: