Փողոցային պայքարի հարցում հերթը տղամարդկանցն է. Անի Զախարյան

Այս պահին կառավարությունն այնպիսի փուլում է գտնվում, այնպիսի մոտեցումներով է առաջնորդվում, որ հեղափոխական կոչեր հնչեցնելու կաիրք  չկա»,– այսօր ասուլիսի ժամանակ ասել է «Նոր քաղաքական մշակույթ» կուսակցության նախագահ Անի Զախարյանը՝ պատասխանելով այն հարցին, թե պայքարի որ տարբերակն է ընտրելու ակտիվ քաղաքականություն վերադառնալով:

«Ես արդեն մայր եմ առաջնահերթ, հետո նոր քաղաքական գործիչ: Այս փուլում ես չեմ կարող իմ նորածին երեխային թողնել և դուրս գալ հրապարակային ինչ-որ պայքարի: Բավ է, 5 տարի մոտավորապես ես հրապարակային նման պայքարի մեջ եղել եմ և որպես կին իմ լուման ունեցել եմ այդ պայքարում, հասարակակական գիտակցության զարգացման և հասունացման գործընթացում: Հիմա թող շարունակեն տղամարդիկ, սակայն եթե ես զգամ, որ երկրի վիճակն այնպիսին է, որ իսկապես հարկավոր  է դուրս գալ հրապարակ և համախմբել հասարակությանը, ապա միանշանակ ես պատրաստ եմ»,- ասել է Անի Զախարյանը:

Հիշեցնենք, որ «Նոր քաղաքական մշակույթ» կուսակցության վերաակտիվանալու հանգամանքը պարզ դարձավ այս տարվա մարտի 4-ին, երբ Անի Զախարյանը ֆեյսբուքյան իր էջում գրեց, որ կուսակցությունը տվել է գիտության, կրթության, մշակույթի գործիչների Հայաստան-Արցախ-Սփյուռք համախմբման համահայկական ծրագրի մեկնարկը:

«Այս ծրագիրը գործելու է ազգ-ընտանիք գաղափարախոսության ներքո: Ազգ-բանակ կարող ենք լինել միայն այն դեպքում, երբ առաջին հերթին լինենք ազգ-ընտանիք: Հայաստանը, Արցախն ու Սփյուռքը միշտ եղել են մեկ եռամիասնություն, մեկ ամբողջական ազգային ընտանիք, և ուրեմն ժամանակն է հանուն այդ եռամիասնության միավորել այդ երեք ազգային բևեռների առողջ ներուժը: Մենք կարող ենք առաջընթաց ունենալ միայն այն դեպքում, երբ միմյանց վերաբերվենք որպես մեր ընտանիքի անդամի, ժամանակն է դառնալ մեկ հոգևոր-գիտակցական մշակույթի լիիրավ անդամ, հարգենք և սիրենք միմյանց մեր բոլոր առավելություններով և թերություններով հանդերձ, վերաբերվենք միմյանց, ինչպես կվերաբերվեինք մեր եղբայրներին և քույրերին, այլապես այս ազգային բևեռացումը մեզ կործանման է տանում: Ժամանակն է մի կողմ դնել իշխանություն-ընդդիմություն ձևական ջրբաժանը, և որպես մեկ ազգային ընտանիք լծվենք մեր հայրենիքը, մեր պետությունը շենացնելու նվիրական գործին: Հայաստանի «Նոր քաղաքական մշակույթ» կուսակցությունն առաջինն է իր դրոշը խոնարհում այդ գաղափարախոսության ներքո: Սակայն սա չի նշանակում, որ մենք պետք է դադարենք պահանջատեր լինել միմյանց նկատմամբ: Ազգային բազմակողմանի պահանջատիրություն՝ ազգ-ընտանիք գաղափարախոսության ներքո»,- ասված է ֆեյբուքյան հայտարարության մեջ: