Հայաստանյան 20 ստարտափ միջազգային աքսելերատորի հետ աշխատելու հնարավորություն ունի. կայացել է աքսելերացիոն ծրագրի մեկնարկի հանդիսավոր արարողությունը

ՀՀ բարձր տեխնոլոգիական արդյունաբերության նախարարության դրամաշնորհային մրցույթի հաղթող «Plug and Play Germany GmbH» աքսելերատորը Հայաստանում գործունեություն ծավալող տեխնոլոգիական ոլորտի սկսնակ ընկերություններին կտրամադրի խորհրդատվական ծառայություններ, բիզնեսի զարգացման և գործարար կապերի հաստատման օժանդակում, նորարարության աջակցություն և անհատական մենթորություն:

Հոկտեմբերի 31-ին կայացել է աքսելերացիոն ծրագրի մեկնարկի հանդիսավոր արարողությունը։ Հայտարարվել է 26 շաբաթյա ծրագրին մասնակցության հայտ ներկայացրած 119 ստարտափներից մասնակցության հնարավորություն ստացած 20-ի անունները՝ TACTUN, Kerpak, The Fintch, EdMap, Prodmap, Doctor Yan, Biocentric, Wearify, Hirebee, Zegashop, Moby, Sestive, Hoviv, FiveBrane, Text’nPayMe, Doccy, Pearch.AI, CaseLens, doodooc, LunarTech։

Ներկաներին ողջունել և ծրագրի կարևությունն է ընդգծել ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը։ «Սրանով հնարավորություն է տրվում հայաստանյան ստարտափներին դուրս գալու միջազգային շուկաներ, ստանալու նոր գիտելիքներ, լավարկել իրենց պրոդուկտները, պատկերացնել և հասկանալ, թե ինչպես են աշխատում միջազգային ընկերությունները և ինչպես է հնարավոր դառնալ չեմպիոններ նաև միջազգային շուկաներում»,- ասել է նախարարի տեղակալը, տեղեկացնելով նաև, որ ընտրված 20 ստարտափից 10-ը նոյեմբերին գնալու են Սիլիկոնյան հովիտ, որն անչափ մեծ հնարավորություն է նրանց համար ներկայացնելու Հայաստանը, կապեր հաստատելու, բրենդավորելու իրենց թիմերը և պրոդուկտները միջազգային հարթակներում։

Ողջույնի խոսքով հանդես է եկել նաև «Plug and Play Germany GmbH»-ի կազմակերպության գործադիր տնօրեն Սաշա Քարիմպուրը։

«Այս առաքելությամբ մենք Հայաստանում ենք ՀՀ բարձր տեխնոլոգիական արդյունաբերության նախարարության նախաձեռնությամբ՝ ստարտափներին օգնելու աճել հասնելով միջազգային մակարդակի՝ կապելով նրանց մեծ կորպորացիաների և ներդրողների հետ»,- ասել է «Plug and Play Germany GmbH»-ի գործադիր տնօրենը։

Նա նաև ընդգծել է, որ որ իրենք այստեղ են, քանի որ ԲՏԱ նախարարությունը շատ հետաքրքրված է Հայաստանում ունենալ միջազգային աքսելերատոր՝ նպատակադրված լինելով զարգացնելու ստարտափ էկոհամակարգը երկրում։

Միջոցառման մասնակիցներին ողջունել է ՀՀ-ում ԱՄՆ փոխդեսպան Դեյվիդ Ալենը։ Տեսակապի միջոցով ներկաներին ողջույնի խոսք է ուղղել նաև Plug and Play-ի ղեկավար (CEO) Սայիդ Ամիդին։

Տեղի է ունեցել նաև պանելային քննարկում՝ «Ինչպես են բեկումնային ստարտափները նպաստում զարգացող շուկաների աճին» թեմայով, որին մասնակցել են ԲՏԱ նախարարի տեղակալ Ռուբեն Սիմոնյանը, Plug and Play-ի կորպորատիվ նորարարության ավագ մենեջեր Ալֆրեդո Գոմես Սորիան և ծրագրի մենթոր, դոկտոր Ֆարես Ալաբուդը։

Միջոցառմանը ներկա են գտնվել ՀՀ-ում Կանադայի արտակարգ և լիազոր դեսպան Էնդրյու Թըրները,ՀՀ-ում Հնդկաստանի Հանրապետության արտակարգ և լիազոր դեսպան Նիլակշի Սահա Սինհան, Էստոնիայի պատվավոր հյուպատոս Ավեինք Ղուկասյանը, բարձրաստիճան այլ պաշտոնյաներ, ոլորտային ընկերությունների ներկայացուցիչներ։

Plug and Play-ը միջազգային հեղինակավոր նորարարական հարթակ է և ստարտափ աքսելերատոր, որի գլխամասը գտնվում է Սիլիկոնյան հովտում: Այն կապում է ստարտափներին, կորպոռացիաներին և ներդրողներին՝ խթանելու տեխնոլոգիական առաջընթացը և բիզնեսի աճը: Ներկայանալով բազմաթիվ երկրներում՝ Plug and Play-ն աջակցում է ստարտափներին՝ օգնելով ընդլայնելու գործունեության աշխարհագրությունը և հաջողության հասնելու տարբեր ոլորտներում:

Plug and Play- ը համագործակցում է այնպիսի հեղինակավոր կազմակերպությունների հետ, ինչպիսիք են՝ VISA-ն, ROCHE-ն, JAGUAR LAND ROVER-ը, WALMART-ը, Mercedes-Benz-ը, VOLVO-ն, PORSCHE-ն, NISSAN-ը և այլք:

Plug and Play-ի պորտֆոլիոյում կան ավելի քան 30 միաեղջյուր (unicorn) կազմակերպություններ: Նրանց պորտֆոլիոյում ընդգրկված կազմակերպությունների թվում են PayPal-ը, Dropbox-ը, Honey-ն, SoundHound-ը, Rappi-ն, CourseHero-ն, Pinterest-ը, Pony.ai-ը և այլք:

ՀՀ բարձր տեխնոլոգիական արդյունաբերության նախարարության և «Plug and Play Germany GmbH» կազմակերպության միջև ծրագրի իրականացման պայմանագիրը կնքվել է 2024թ. օգոստոսի 15-ին: Մրցույթի համար նախատեսված բյուջեն կազմում է 336,000,000 (երեք հարյուր երեսունվեց միլիոն) ՀՀ դրամ: