Ադրբեջանական կողմի կրակոցներից վիրավորված Կոթի գյուղի բնակիչը տեղափոխվել է Երևան

Ինչպես հայտնի է, սեպտեմբերի 15-ին ադրբեջանական կողմը կրակել է Տավուշի մարզի Կոթի գյուղի ուղղությամբ։  Կրակոցների հետևանքով վիրավորվել է գյուղի բնակիչ Սուրեն Սեփխանյանը, ով այդ պահին գյուղի կենտրոնում է եղել: Shantnews.am-ն այսօր այցելել է «Հերացի» թիվ 1 համալսարանական հիվանդանոց: Բանն այն է, որ Սուրեն Սեփխանյանը Նոյեմբերյանի հիվանդանոցից տեղափոխվել է Երևան, քանի որ ոտքի վերականգման համար նեղ մասնագիտական վիրահատություն է պահանջվել:

«Հիվանդը երեկոյան ժամը 18.00-ին ընդունվել է, ունի աջ սրունքի հրազենային վնասվածք: Նոյեմբերյանի բժշկական կենտոնում կատարվել է առաջնային վիրաբուժական մշակում, մենք կատարել ենք երկրորդային վիրաբուժական մշակում: Այս պահին հիվանդի վիճակը բավարար է, առողջությանը վտանգ չի սպառնում,  հենարանային ֆունկցիան պահպանվելու է, ոչ մի խնդիր չենք տեսնում: Սկզբնական շրջանում ինքը հենակներով կքայլի, հետագայում արդեն նորմալ իր առօրյայով կզբաղվի: Սովորաբար տրավմաներից հետո վերքերը միշտ զգացնել են տալիս, բայց էս պարագայում, ինձ թվում է, ինքը նորմալ կլինի, ոչ մի խնդիր պետք է չունենա ֆունկցիայի հետ կապված»,- ասել է Սուրեն Սեփխանյանին բուժող բժիշկներից Աբրահամ Դանիելյանը՝ նշելով նաև, որ ոտքի ոսկրի հետ կապված մեծ խնդիր չկա: Կա բեկորային փոքր կոտրվածք՝ առանց տեղաշարժի, ինչն ամեն դեպքում ոտքի ֆունկցիայի վրա չի ազդելու:

Ըստ Դանիելյանի՝ Սուրեն Սեփխանյանը Երևան է տեղափոխել`ելնելով նրանից, որ կարող է լինել նյարդի հետ կապված, միկրովիրաբուժական խնդիր:

«Վերքերը լայնացվել են, լամպասային կտրվածքներ են կատարվել, կանխարգելիչ աշխատանքներ»,- «Հերացի» թիվ 1 համալսարանական հիվանդանոց կատարած աշխատանքից խոսել է ՀՀ ԱՆ գլխավոր պլաստիկ վիրաբույժ Արտավազդ Սահակյանը: Սահակյանը նաև ասել է, որ սա առաջին դեպքը չէ, երբ Սուրեն Սեփխանյանը վիրավորվում է:

«Հիվանդը փորձ ունի նման վերքերի, մեր սահմանամերձ հերոսական Կոթի գյուղից է, էնպես որ որևէ արտառոց  բան չէ իր համար: Կապաքինվի, կգնա, բայց մենք լուրջ մտածելու առիթ ունենք՝ ոչ միայն ԱՆ-ը, այլև հայկական բանակը, պետք է հակագանգրենոզային շիճուկներ ձեռք բերվեն: Դրանք չկան Հայաստանում», – ասել է Սահակյանը՝ հավելելով, որ այս դեպքում Սուրեն Սեփխանյանի բախտը կարելի է ասել բերել է, քանի որ վնասվածքը մեծ չէ:

Shantnews.am-ը զրուցել է նաև հենց Սուրեն Սեփխանյանի հետ: Նա պատմել է, որ դեպքը տեղի է ունեցել գիշերը՝ ժամը 24-ի մոտ, երբ համագյուղացիներով հավաքված են եղել գյուղի կենտոնում, որպեսզի մի փոքր զրուցեն:

«Կրակոցներ եղան, խանութ կար, մտանք խանութի մեջ: Սպասեցինք, կրակոցը կտրվեց, ասինք՝ երևի դադարեց, էլի դուրս եկանք, նորից էլի կրակեցին, ու ոտքիս կպավ: Հետիս տղաները միանգամից փաթաթել են, կապել են, տարել են Նոյեմբերյանի հիվանդանոց, փամփուշտը հանեցին միջից, մի հատ փամփուշտ էր: Հետո ուղարկեցին էստեղ՝ Երևան, որ հետագա պրոցեսը կատարվի»,- պատմել է Սուրեն Սեփխանյանն ու հավաստիացրել, որ հենց գյուղ վերադարձավ, նորից գնալու է գյուղամեջ՝ գյուղացիների հետ զրույցի:

Ըստ Սուրեն Սեփխանյանի՝ առաջին կրակոցից հետո իրենք անջատել են լուսավորությունը, բայց դա էլ չի օգնել, որ չկարողանան խոցել իրենց: Հարցին՝ Կոթիից դուրս գալու մտադրություն ունե՞ք,  բնակիչն այսպես է պատասխանել.

«Չէ, ի՞նչ դուրս գալ, մեր գյուղն է: Սա առաջին դեպքը չէ՝ թոքից էլ եմ վիրավորվել: Կգնամ մատաղ կանենք՝ գառ, աքլոր, տեսնենք ինչ կստացվի,  կնստենք գյուղի կենտրոնում կուտենք, կզրուցենք»:

Հավելենք, որ Սուրեն Սեփխանյանը 60 տարեկան է: Սեփխանյանի հետ հեռախոսով զրուցել է նաև վարչապետ Նիկոլ Փաշինյանը: Փաշինյանն այդ մասին երեկ գրառում էր կատարել «Ֆեյսբուք»-ի իր էջում։

«Հենց նոր հեռախոսով զրուցեցի Կոթիում վիրավորված Սուրեն Սեփխանյանի հետ: Ոտքից է վիրավորվել, ոսկորը չի վնասվել: Ասում էր՝ լավ է: Ինձ ասում էր՝ դուխդ չգցես»,- նշել էր Նիկոլ Փաշինյանը: