Ինչո՞ւ է Ռուսաստանի ԿԸՀ նախագահը դասել Հայաստանը Մոսկվայի «ամենաոչ բարեկամական» պետությունների շարքին

Ռուսաստանի կենտրոնական ընտրական հանձնաժողովը այսօր պաշտոնապես հրապարակել է նախագահական ընտրությունների  արդյունքները:  Վլադիմիր Պուտինը հավաքել է ձայների 87,28% -ը, երկրորդ տեղը զբաղեցրած Կոմկուսի թեկնածու Նիկոլայ Խարիտոնովին ձայն է տվել ընտրողների 4,31% տոկոսը: Կենտրոնական ընտրական հանձնաժողովի նախագահը մամլո ասուլիսում անդրադարձել է նաև Հայաստանում բացված տեղամասերում արձանագրված արդյունքներին:

Ինչո՞ւ է Պամֆիլովան հատուկ հիշատակել Հայաստանի մասին, և որքա՞ն ձայն է ստացել Պուտինը Հայաստանում: Թեմային «Հորիզոնի» տաղավարում անդրադարձել է Արտյոմ Երկանյանը։

«ԿԸՀ նախագահ Էլլա Պամֆիլովան հիշատակել է Հայաստանի մասին հետևյալ համատեքստում, բառացիորեն մեջբերեմ նրա խոսքերը. «Այն երկրներում, որոնք համարվում են Ռուսաստանի ամենաոչ բարեկամական պետություններ, ևս հաղթել է Վլադիմիր Պուտինը»:

Եվ ահա, թվարկելով այդ պետությունները, նա հիշատակել է նաև Հայաստանը, նույն շարքում հիշելով նաև ԱՄՆ-ին, Գերմանիային, Էստոնիային և Լատվիային:

Շատ տարօրինակ պատճառաբանություն է բերել, թե ինչու է Հայաստանը դասում Ռուսաստանի ամենաոչ բարեկամական պետությունների շարքին՝ ասելով, որ պատճառն այն է, որ հարևան Վրաստանից Հայաստան շատ են եկել ընդդիմադիր հայացքներ ունեցող ռուս ռելոկանտներ և դա է պատճառը, որ Հայաստանը ևս հայտնվել է ԱՄՆ-ի, Գերմանիայի, Էստոնիայի և Լատվիայի հետ մի շարքում:

Իսկապես գիտենք, որ Վրաստանից բազմաթիվ ռուս ընդդիմադիրներ են եկել Երևան, քանի որ Վրաստանում ընտրատեղամաս չէր բացվել, սակայն դժվարանում եմ հասկանալ, թե արդյոք դա կարող է իսկապես հիմք հանդիսանալ Հայաստանը ոչ բարեկամական պետություն անվանելու համար. ամեն դեպքում, կարծում եմ, որ սա ոչ կոռեկտ ձևակերպում էր, մանավանդ, որ Հայաստանն այստեղ ընդհանրապես որևէ դեր չունի, Հայաստանը չի միջամտում Ռուսաստանի ընտրական գործընթացներին՝ նույնիսկ եթե այդ գործընթացները Հայաստանի տարածքում են տեղի ունենում:

Դե իսկ ամենագլխավոր հարցն այն է, թե արդյոք ԿԸՀ-ի նախագահն է այն մարդը, ով իրավասու է Ռուսաստանում որոշել՝ որ պետությունն է Ռուսաստանի բարեկամ պետությունը և որը պետությունը՝ ոչ այնքան: Որքան գիտեմ, սովորաբար դա քաղաքական իշխանությունների իրավասության հարցն է»,-ասել է Արտյոմ Երկանյանը:

Արդյո՞ք այլ պետություններում բացված ընտրատեղամասերում Պուտինը շատ ավելի քիչ ձայն է հավաքել, քան Ռուսաստանում: Հայաստանում ռուս ընդիմադիրները ընտրությունների օրը փորձել էին հակապուտինյան ակցիաներ անցկացնել: Դա կարո՞ղ է բացասաբար ազդել Երևանի ու Մոսկվայի հարաբերությունների վրա:

Մանրամասները՝ ամբողջական հարցազրույցում: