Նիկոլ Փաշինյանն ԱԻՆ աշխատողներին մաղթեց քիչ աշխատանք, մեծ բարեկեցություն

ՀՀ վարչապետ Նիկոլ Փաշինյանը սեպտեմբերի 4-ին մասնակցել է ԱԻՆ աշխատողի օրվան նվիրված տոնական շքերթին: ԱԻՆ աշխատողներին իրենց օրվա կապակցությամբ շնորհավորելով՝ վարչապետը մաղթեց հնարավորինս քիչ աշխատանք և հնարավորինս մեծ բարեկեցություն:

«Ըստ էության՝ ԱԻՆ աշխատողները շատ կարևոր դերակատարում ունեն մեր կյանքում: Իհարկե, մենք չենք կարող հուսալ, որ երկրում արտակարգ իրավիճակներն ընդհանրապես կբացառվեն: Ինչպես վիճակագրությունն է ցույց տալիս, ՀՀ-ում մեր սիրելի հայրենակիցների կողմից արտակարգ իրավիճակ է գնահատվում նույնիսկ այն, երբ, օրինակ, սիրելի կատուն բարձրանում է տանիքը և չի կարողանում իջնել, նաև այսպիսի դեպքերով են դիմում փրկարար ծառայությանը, ԱԻ նախարարությանը: Ուզում եմ բոլորիս մաղթել, որ ՀՀ-ում արտակարգ իրավիճակները լինեն այսպիսին կամ մոտավորապես այսպիսին, և չլինեն այնպիսի իրավիճակներ, որոնք կտխրեցնեն, խնդիրներ կառաջացնեն, կխոսեն ճգնաժամերի մասին»,- ասաց նա:

Փաշինյանի խոսքով՝ մեր երկրի ինքնազգացողության, քաղաքացիների ինքնազգացողության համար կարևոր է իմանալ, որ կա բարձր պրոֆեսիոնալիզմի չափանիշներին համապատասխանող ԱԻՆ համակարգ: Վարչապետը նշեց, որ այս շրջանում յուրաքանչյուր համազգեստավոր մարդու` ոստիկանի, զինվորականի, ԱԻՆ աշխատողի քաղաքացին պետք է վերաբերվի որպես հարազատի, քանի որ հենց նրանք են մեր իրականության մեջ առաջինը օգնության գալիս վտանգի, ճգնաժամի, արտակարգ իրավիճակի պահին: Փաշինյանը հույս հայտնեց, որ համատեղ գործունեության արդյունքում հարազատի այս զգացողությունը ԱԻՆ աշխատակիցների նկատմամբ ավելի ու ավելի կմեծանա:

Կառավարության ղեկավարը հիշեցրեց` ինչպես ասել է Զինված ուժերի, ոստիկանության և ընդհանրապես համազգեստավոր ցանկացած ծառայության մասին, որ դրանք պետք է զերծ մնան քաղաքական որևէ գործունեության մեջ ներքաշվելուց, նույնը վերաբերում է նաև ԱԻ աշխատողներին, փրկարար ծառայությանը, այն ծառայություններին, ովքեր, ըստ էության, ՀՀ ԶՈՒ մաս են կազմում:

«Ուզում եմ մենք ևս մեկ անգամ արձանագրենք` որևէ կերպ չի կարելի քաղաքական որևէ գործունեության մեջ ներքաշվելով` վտանգել, ստվերել հարազատի այն զգացողությունը, որ ՀՀ յուրաքանչյուր քաղաքացի պետք է ունենա ՀՀ զինվորական համազգեստ կրող ցանկացած անձի նկատմամբ: Ես գիտեմ, որ այսօր ԱԻ համակարգում բազմաթիվ պրոբլեմներ կան, երեք օր առաջ իմ հեռախոսին այսպիսի sms-հաղորդագրություն եմ ստացել: Քաղաքացին գրում է` «Պարոն վարչապետ, աշխատում եմ փրկարար ծառայությունում, ապրելու հնար չկա»: Ես հասկանում եմ, գիտեմ, մենք բոլորս գիտենք, որ այս հաղորդագրությունը կարող էին ուղարկել շատերը` ԱԻ ծառայությունից, ՀՀ ԶՈՒ ծառայողներից, ոստիկանությունից, ԱԱԾ-ից և բազում այլ տեղերից: Մենք գիտենք, որ սա խնդիր է, որ մենք միասին պետք է լուծենք, բայց ուզում եմ մի իրողություն արձանագրել. այսօր պետական կառավարման համակարգում աշխատավարձերը ցածր են շատ դեպքերում նաև այն պատճառով, որ այդ համակարգերն արդյունավետ չեն կառավարվում, պետական միջոցներն արդյունավետ չեն տնօրինվում»,- ասաց նա:

Փաշինյանը առաջարկեց գնալ հետևյալ ուղով. ոչ թե սկզբից պետք է լավ ապրել և հետո միայն մտածել մեր պետության, պետական միջոցների, երկրի արդյունավետ կառավարման մասին, այլ հակառակը պետք է տեղի ունենա, սկզբից պետք է աշխատել մեզնից յուրաքանչյուրի, մեր համակարգերի արդյունավետությունը, պատասխանատվությունը բարձրացնելու ուղղությամբ, որից հետո միայն կարձանագրվի անխուսափելիորեն բոլորի, նաև ԱԻ համակարգի աշխատողի, փրկարար ծառայության աշխատողների բարեկեցության մակարդակը:

Վարչապետի խոսքով` այսօր ՀՀ-ում հաստատված մթնոլորտում բոլորը պետք է համախմբեն իրենց ուժերը, քանի որ հնարավոր չէ առանձին վերցրած ոլորտում, առանձին վերցրած որևէ նախարարությունում ապահովել զարգացում, այդ զարգացումը պետք է լինի ամբողջական, համապարփակ և ապագային ուղղված: Փաշինյանը հույս հայտնեց, որ ՀՀ ԱԻ աշխատողներն իրենց ծառայության անձնազոհ, բարձր բնույթով սատար կկանգնեն այն փոփոխություններին, այն բարեփոխումներին, այն կամքին, որը արտահայտվել է Հանրապետության հրապարակում, որն արտահայտել է ՀՀ քաղաքացին:

«Այդ կամքը հետևյալի մասին է. ՀՀ քաղաքացիները, հայությունը պետք է ապրեն ազատ, երջանիկ, զարգացած, հզոր և բարեկեցիկ Հայաստանում: Մեզնից յուրաքանչյուրը պիտի արձանագրի, որ յուրաքանչյուր ոք իր անելիքն ունի այս գործում` սկսած վարչապետից ավարտած փրկարար ծառայության այն աշխատակցով, որն այսօր ապրելու հնար չունի: Մենք ուս ուսի տված ոչ թե ապրելու հնար պետք է ստեղծենք իրար համար, այլ ուս ուսի տված մեր երկիրը բարձրացնենք զարգացման նոր մակարդակի, երջանկության նոր մակարդակի, ազատության և օրինականության նոր մակարդակի: Ես շնորհակալություն եմ հայտնում ԱԻ բոլոր աշխատողներին` իրենց կատարած անձնվեր աշխատանքի համար և վստահություն եմ հայտնում, որ ՀՀ ԱԻ աշխատողներն ինչպես եղել, այնպես էլ շարունակում են սատար լինել հայոց պետականությանը, հայ ժողովրդին, ՀՀ քաղաքացիության ինստիտուտին»,- նշեց նա: