Ինչո՞ւ է Իլհամ Ալիևը որոշել արտահերթ ընտրություններ անցկացնել

Անսպասելի լուր՝ Բաքվից: Փետրվարի 7-ին Ադրբեջանում նախագահական ընտրություններ են անցկացվելու: Իլհամ Ալիևը առավոտյան հրամանագիր է ստորագրել իր իսկ լիազորությունների վաղաժամ դադարեցման ու արտահերթ ընտրություններ անցկացնելու մասին:

Ինչի՞ համար: Արտահերթ ընտրություններ անցկացնելու որոշումն ինչպե՞ս կարող է կապված լինել Հայաստանի հետ խաղաղ համաձայնագրի կնքման հետ: Թեմային «Հորիզոնի» տաղավարում անդրադարձել է Արտյոմ Երկանյանը:

«Հերթական ընտրությունները Ադրբեջանում պետք է կայանային 2025թ.-ի ապրիլին: 2016թ.-ի սահմանադրական փոփոխությունների հանրաքվեի արդյունքում նախագահն իրավունք ստացավ սեփական լիազորությունները դադարեցնել և արտահերթ ընտրություններ նշանակել: Եվ ահա այդ իրավունքից օգտվում է, սակայն հետաքրքիր է, որ ոչ մի պարզաբանում  չկա, թե ինչով էր պայմանավորված իր այդ որոշումը:

Իրականում մի քանի պատճառ կա.

1-ինը՝ ակնհայտ է, որ նրա վարկանիշը իսկապես այժմ շատ բարձր է: Այն բանից հետո, երբ Ադրբեջանը ներխուժեց Արցախ, այնտեղ էթնիկ զտում իրականացրեց, Ալիևի վարկանիշը կտրուկ աճեց, և այժմ նա փորձում է օգտվել այդ հնարավորությունից, քանի որ գիտակցում է, որ այն շատ շուտով կսկսի նվազել:

2-րդ՝ ընդդիմությունն այժմ ջախջախված է և երբեք այդքան թույլ չի եղել, որքան հիմա: Մինչև 2025թ.-ի ապրիլը ընդդիմադիրները կարող էին վերախմբավորվել, նոր առաջնորդ առաջ քաշել, ուժերը մոբիլիզացնել. սա ևս գործոն է: Այսինքն՝ քանի դեռ ընդդիմադիրները պատրաստ չեն, օգտվեն այդ հնարավորությունից:

3-րդ՝ շատ շուտով սպասվում են խնդիրներ Ադրբեջանի և Արևմուտքի միջև: ԱՄՆ-ը, Եվրամիությունն արդեն ակնարկում են, որ չի բացառվում անգամ պատժամիջոցների կիրառումը Ադրբեջանի նկատմամբ՝ կապված և՛ Հայաստանի խաղաղ համաձայնագրի հարցում Ադրբեջանի ոչ կոնստրուկտիվ դիրքորոշման հետ,  և՛ Ադրբեջանում քաղբանտարկյալների խնդրի հետ: Այսպիսով, Ալիևը շտապում է ընտրություններ անցկացնել, քանի դեռ պատժամիջոցների մահին խոսակցությունն այսպես լուրջ չէ արդեն:

4-րդ՝  պատերազմի համար ահռելի միջոցներ են ծախսել, նավթային հիմնադրամը դատարկվել է, հետկոնֆլիկտային ռեաբիլիտացիան էլ ավելի մեծ փողեր կպահանջի և պարզ է, որ արդյունքում ստիպված են լինելու գոտիներն ավելի ամուր կապել և ստիպված են լինելու ոչ պոպուլյար քայլերի գնալ՝ հարկերի, տուրքերի,  բարձրացում, գների ավելացում և այլն:

Եվ Ալիևը ցանկանում է այդ ոչ պոպուլյար քայլերը կատարել արդեն վերարտադրվելուց հետո»,-ասել է Արտյոմ Երկանյանը:

Ինչպե՞ս են քաղաքակիրթ աշխարհում վերևաբերվում դրան, որ իշխանությունը Ադրբեջանում վերարտադրվում է, այլ ոչ թե ընտրվում:  Ի՞նչ կանխատեսումներ կան ընտրություններում Ալիևի հավաքած ձայների տոկոսի վերաբերյալ:

Մանրամասները՝ ամբողջական հարցազրույցում: