Ադրբեջանի ԱԳՆ-ն Արցախի հայկական հուշարձաններն անվանել է Ադրբեջանի ժողովրդի ժառանգություն ու խոչընդոտում է ՅՈՒՆԵՍԿՕ-ի փաստահավաք առաքելության գործուղումը

Ադրբեջանի արտգործնախարարությունն այսօր արձագանքել է Հայաստանի արտգործնախարարի՝  ՅՈՒՆԵՍԿՕ-ին ուղղված կոչին: Հիշեցնենք, որ Արարատ Միրզյոյանն  առաջարկել էր կազմակերպությանը դիտորդական առաքելություն ուղարկել Արցախ` այնտեղ հայկական պատմական ժառանգության հուշարձանների վիճակին ծանոթանալու համար:

Ի՞նչ դիրքորոշում է ցուցաբերել Բաքուն այդ առաջարկի վերաբերյալ: Թեմային «Հորիզոնի» տաղավարում անդրադարձել է Արտյոմ Երկանյանը:

«Երեկ Փարիզում՝ ՅՈՒՆԵՍԿՕ-ի գլխավոր կոնֆերանսում, ունեցած ելույթում և ՅՈՒՆԵՍԿՕ-ի գլխավոր տնօրեն Օդրի Ազուլեի հետ առանձնազրույցում Հայաստանի արտաքին գործերի նախարարը կարևորել է ՅՈՒՆԵՍԿՕ-ի դերը՝ Արցախում հայկական պատմական և կրոնական հուշարձանների պահպանության ու վանդալիզմից փրկելու հարցում:

Այս կապակցությամբ նա կարևորել է, որ ՅՈՒՆԵՍԿՕ-ն կարողանա Արցախ գործուղել փաստահավաք առաքելություն՝  դեպքերի իրական վիճակին տեղում ծանոթանալու համար: Նախարար Միրզոյանն ասել էր, որ հակառակ դեպքում Արցախում տեղի կունենա այն, ինչ 1997-2006 թթ.-ը տեղի է ունեցել հարևան Նախիջևանում, ուր ամբողջովին ոչնչացվել է հայկական պատմական ողջ ժառանգությունը:

Եվ այսօր այս ամենի վերաբերյալ Ադրբեջանի արտգործնախարարության մամուլի ծառայության ղեկավար Այհան Հաջիզադեն տարածել է իր գերատեսչության պաշտոնական հաղորդագրությունը:

Ըստ էության, անուղղակիորեն հաստատել են այն, որ Ադրբեջանը դեմ է այդպիսի փաստահավաք առաքելության ուղարկմանը և անհիմն են համարել Հայաստանի արտգործնախարարի այդ կոչը, մեջբերեմ Հաջիզադեի խոսքերը. «Մեր պատմական և կրոնական հուշարձանները գտնվում են Ադրբեջանի սուվերեն տարածքում և հանդիսանում են մեր պատմական ժառանգությունը»,-ասել է նա՝ հայկական հուշարձանների մասին խոսելիս:

ՅՈՒՆԵՍԿՕ-ն արդեն 3 տարի պահանջում է Ադրբեջանին հնարավորություն տալ՝ դիտորդական փաստահավաք առաքելություն ուղարկելու համար: Խոսքերով սկզբում Ադրբեջանը դեմ չէր, բայց գործնականում խոչընդոտում էր այդպիսի առաքելության ուղարկմանը: Անգամ օր էր նշվում, թե երբ պետք է այդ առաքելությունը հասնի Ադրբեջան և Արցախ: 2021 թ.-ի դեկտեմբերի մասին էր խոսքը: Մինչ օրս այդ առաքելությունն այդպես էլ տեղ չի հասել»,-ասել է Արտյոմ Երկանյանը:

Այսպիսով կարող ենք արձանագրել, որ մեր դեպքում ՅՈՒՆԵՍԿՕ-ն ի վիճակի չէ կատարել իր պարտականությունները:
Ինչո՞ւ է Բաքուն խոչընդոտում դիտորդների այցը: Այս հարցերի վերաբերյալ մանրամասները՝ ամբողջական հարցազրույցում: