Դիտորդները շարունակում են մտահոգիչ համարել ՔԿՀ-ներում իրավիճակը

«Մեր պլանային հերթական այցի ժամանակ հայտնաբերեցինք, որ «Աբովյան» ՔԿՀ-ում կոպտորեն խախտվում է անչափահասների կրթություն ստանալու իրավունքը: Մեկ տարի շարունակ պետությունն ինքը ոտնահարում է այդ իրավունքը և, փաստորեն, գոյություն ունի «Հանրակրթության մասին» օրենք, որտեղ գրված է, որ Հայաստանում կրթությունը պարտադիր անվճար է 12 տարի շարունակ»,- այս մասին նշել է քրեակատարողական հիմնարկներում և մարմիններում վերահսկողություն իրականացնող դիտորդների խմբի անդամ Զարուհի Հովհաննիսյանը:

Ինչպես արդեն տեղեկացրել է SHANTNEWS.am-ը՝ դիտորդական խումբն այսօր ամփոփել է 2017 թվականին կատարված աշխատանքները: Իրավապաշտպանը նշել է, որ ՔԿՀ-ում կան կալանքի դատապարտված 6-7 անչափահաս անձինք, ովքեր մեկ տարի շարունակ զրկված են այդ իրավունքից: Նրա խոսքերով՝ իրենց պատկան մարմիններից տեղեկացրել են, որ խնդիրը լուծման փուլում է, բայց Հովհաննիսյանը նկատում է, որ եթե սպասեն, թե երբ հարցը կլուծվի, կարող է ձգձգվել ևս 1 տարի և ցանկացած կալանքի ենթարկված անձ, որ զրկված է այդ իրավունքից, կարող է դիմել ՄԻԵԴ և Հայաստանի դեմ վճիռ ունենալ: Այդ խնդրով անհանգստացած են և կարծում են, որ անհապաղ պետք է անձը լուծի, հատկապես, եթե հաշվի առնվի այն դրույթը, որ ՔԿՀ-ները մարդուն ճիշտ ճանապարհի վրա դնելու համար են և ոչ թե փակելու ու տարբեր շփումներից զրկելու: 

«Հիմա ո՞նց ենք պատկերացնում անչափահասներին վատ ճանապարհից հետ կանգնեցնելու գործընթացը, երբ նրանց անգամ կրթությունից ենք զրկում: Փաստորեն՝ ՔԿՀ-ն հանդիսանում է փակ տարածք, որտեղ նրանք զրկված են տարբեր իրավունքներից»,- նշեց Զարուհի Հովհաննիսյանը: 

Դիտորդական խմբին նշված խնդրի մասին տեղեկացրել են, թե պատճառն այն է, որ նախորդ պայմանագիրը խզվել է անչափահասների կրթությամբ զբաղվող կառույցի հետ, իսկ նոր պայմանագիր կնքելու համար աշխատանքներ են տարվում:   

«Այնպես չէ, որ դատապարտյալների զբաղվածությունը ապահովելու համար որևէ բան չի արվում, 2016-2017 թվականերին բավականին աշխատանքներ են տարվել նույն Աբովյան ՔԿՀ-ում: Օրինակ՝ արհեստագործական ուսումնական մասնագիտական համակարգչային շահագործման դասեր են տարվել և 10 կին դատապարտյալներ ստացել են սերտիֆիկատներ, վարսահարդարման դասեր են եղել, 11 կին է ստացել սերտիֆիկատ, սա էլ համարենք ուսուցում և հետագայում վերաինտեգրման հարցով կատարված աշխատանք»,- ի պատասխան քննադատությունների՝ պատասխանեց ԱՆ քրեակատարողական վարչության սոցիալ-հոգեբանական և իրավական աշխատանքների բաժնի գլխավոր մասնագետ, հոգեբան Անուշ Ջենտերեջյանը:  

Որպես խնդիր՝ մատնանշվեց նաև ՔԿՀ-ներում քիչ թվով հոգեբանների առկայությունը: Իսկ դիտորդական խմբի անդամներից էլ Ռոբերտ Ռևազյանը պատմեց, որ եղել են դեպքեր, երբ իրենք տեղեկություններ են ստացել ՔԿՀ-ում անձին ծեծելու վերաբերյալ, բայց երբ գնացել են և ցանկացել մուտք գործել հիմնարկ, թույլ չեն տվել՝ պատճառաբանելով, թե քնի ժամին չեն կարող մտնել ՔԿՀ: 

Հաշվի առնելով այս ամենը՝ դիտորդական խումբն արձանագրում է, որ Հայաստանի ՔԿՀ-ներում իրավիճակը 2017 թվականին շարունակել է մնալ մտահոգիչ։ Ընդհանուր առմամբ՝ ազատազրկված անձանցից անցած տարի ստացվել է 102 ահազանգ, և իրականացվել է ոչ պլանային 68 այցելություն։