Ոստիկանները պետք է վերահսկե՞ն գազաբալոնի վկայագրի առկայությունը

SHANTNEWS-ն արդեն տեղեկացրել է, որ e-draft.am  կայքէջում քննարկման է դրվել «Սեղմված գազով աշխատող ավտոմեքենաների գազաբալոնային սարքավորումների կարգը սահմանելու մասին» օրենքի նախագիծը: Նախագծին են այսօր անդրադարձել Շուկայի վերահսկողության տեսչական մարմնի ղեկավարի տեղակալ Արման Ավետիսյանը և ԱԻՆ պետական հրդեհային և տեխնիկական անվտանգության տեսչության քարոզչության բաժնի պետ Սերգեյ Հայրապետյանը՝ պարզաբանելով, որ եթե օրինագիծը օրենք դառնա, վարորդների համար պարտադիր կլինի ունենալ վկայագիր ավտոմեքենայի վրա տեղադրված գազաբալոնի անվտանգ լինելու մասին:

«Վկայագիրը, նախատեսվածի համաձայն, տեխզննման կտրոնի նման կփակցնեն ավտոմեքենայի դիմապակուն: Կտրվի հատուկ ժամկետով, այդ ժամկետը անցնելուց կամ վթարից հետո վարորդը նորից պետք է տանի փորձարկման  ու բալոնը վկայագրի լիզենզավորված կազմակերպությունում»,- ասել է ԱԻՆ պետական հրդեհային և տեխնիկական անվտանգության տեսչության քարոզչության բաժնի պետ Սերգեյ Հայրապետյանը:

SHANTNEWS-ի այն դիտարկմանը, թե, ի վերջո, վարորդն ու գազալցակայանի աշխատակիցը կարող են պայմանավորվել ու առանց վկայագրի էլ լիցքավորել, ինչո՞ւ պետք է գազալցակայանը շահագրգիռ լինի վկայագիր պահանջել, հետո նոր լիցքավորել, Հայրապետյանն արձագանքել է, թե նախագծով տուգանքներ են սահմանված՝ առաջին անգամ՝ 1 մլն դրամ տուգանք, երկրորդ դեպքի պարագայում՝ 3 մլն, իսկ երրորդ անգամ՝ լիցենզիայից զրկում: 

SHANTNEWS-ը հիշեցրել է որոշ ժամանակ առաջ «Էքսպերտ թեչ» գազաբալոնային սարքավորման փորձարկման, տեղակայման և սերտիֆիկացման ընկերության տնօրեն Մկրտիչ Տիգրանյանի այն պնդման մասին, որ եթե վերահսկման գործառույթը ոստիկանությանը չհանձնվի, խնդիրը չի կարգավորվի: Ըստ Տիգրանյանի՝ եթե ոստիկանությունը տեխանձնագրի նման վարորդից պահանջի նաև գազաբալոնի անվտանգ լինելու վերաբերյալ փաստաթուղթը, վարորդները ստիպված կլինեն ստուգման տանել իրենց ավտոմեքենաների գազաբալոնները, հնամաշները կխոտանվեն, և դաշտը վերահսկելի կդառնա:

«Իմ կարծիքով՝ վերահսկողությունը պետք է լինի ոչ թե ոստիկանությանը, այլ  տեսչական մարմիններից որևէ մեկին, և այդ մարմինը պետք է դիտարկման լիազորություն ունենա՝ առանց տնտեսվարողին տեղյակ պահելու»,- հիշեցմանն ի պատասխան՝ ասել է Շուկայի վերահսկողության տեսչական մարմնի ղեկավարի տեղակալ Արման Ավետիսյանը: 

Հիշեցմանը, որ հաճախ են պնդում, թե չեն կարող բոլոր գազալցակայաններում ամենօրյա վերահսկողություն սահմանել, քանի որ այդքան տեսուչ չունեն, Սերգեյ Հայրապետյանն այսպիսի պատասխան է տվել.

«Տեսուչ չունենք, ոստիկանությունն էր այդքան տեսուչ չունի նման գործառույթ ավելացնելու համար, նույն մարդկային ռեսուրսն է պետք ոստիկանության համար: Իմ կարծիքով՝ այդ նույն ռեսուրսը կարելի է ավելացնել. մասնագիտացված հիմնարկներում 400 հազար մեքենա կա և 400 գազլցակայան, տարբերությունը բավական մեծ է: Գազալցակայաններն էլ պարտադիր չէ ամեն օր ստուգել, դա կարելի է փուլային տարբերակով անել: Մենք, օրինակ, տարեկան 58 գազալցակայան ենք ստուգում»:

Լրագրողների այն դիտարկմանը, թե ոստիկանությանը հաջողվում է տեխանձնագրերի և ԱՊՊԱ փաստաթղթերի առկայությունը վերահսկել, իսկ երբ չլինի ամենօրյա հսկողություն, չի լինի նաև արդյունք, Հայրապետյանն արձագանքել է.

«Կպայմանավորվի վարորդի հետ, ուրեմն թող լիցքավորի և իրեն էլ տուգանեն»: 

ԱԻՆ պետական հրդեհային և տեխնիկական անվտանգության տեսչության քարոզչության բաժնի պետը նաև ասել է, որ այս պահին դեռ հայտնի չէ, թե որ կառույցին են վստահելու վերահսկողությունը: Դա պարզ կլինի ավելի ուշ: