Շիրակի մարզի 4 գյուղում արոտների ջրարբիացման ծրագիրը ձգձգվում է

Շիրակի մարզի մի քանի խոշորացված համայնքներում ծրագրեր են սառեցվել, մի քանիսի մեկնարկն էլ ուշանում է: Ղազանչի, Մեծ Սեպասար, Հարթաշեն, Զույգաղբյուր բնակավայրերի արոտավայրերի ջրարբիացման ծրագիրը 2 տարի է՝ գործնական փուլ չի հասնում, որը, ի դեպ, դեռևս համայնքների միավորումից առաջ պետք էր մեկնարկվեր Համաշխարհային բանկի ֆինանսավորմամբ:

Նախապատրաստական աշխատանքներ տարվել էին, իսկ երբ գործը հասել էր համայնքների՝ 5 տոկոսի չափով համաֆինանսավորմանը, գումարի փոխանցումը կատարվելու էր արդեն ոչ թե առանձին համայնքների, այլ Աշոցք խոշորացված համայնքի բյուջեից:

Համայնքապետարանի ֆինանսավորման ձգձգումը ծրագրի ուշացման պատճառ է դարձել: Աշոցքի տարածաշրջանի ալպյան մարգագետինները հազարավոր հեկտարներ են, որոնք համարվում են հյուսիսային մարզի լավագույն արոտները, բայց խմելու ջրի բացակայության պատճառով վերոնշյալ բնակավայրերի անասնապահական տնտեսությունները անասուններին վաղուց արոտ չեն տանում:

Գյուղացիների խոսքերով՝ կենդանիները պետք է 16 կմ քայլեն, որ ջուր խմեն, իսկ այդ դեպքում ո՛չ կաթնատվությունը կբարձրանա, ո՛չ էլ մսատվությունը: 4 գյուղի շուրջ 8000 խոշոր եղջերավոր անասունի կբավականացնեն գյուղերի արոտները, որոնք անտեղի չորանում են: Ջուր չլինելու պատճառով էլ անասուններին գյուղացիները սար չեն տանում, այնինչ հեռագնա արոտները ջրարբիացնելու դեպքում հնարավոր է կաթնատու անասունը առանձնացնել մսատուից և եկամուտ ստանալ արոտները լիարժեք օգտագործելու հաշվին:

Ղազանչիի և Մեծ Սեպասարի նախկին գյուղապետերը, որոնք Արոտօգտագործողների կոոպերատիվների նախագահներն են, նշում են, որ 2 տարի առաջ կազմված ծրագրով նախատեսվում էր 12 կմ ջրագծի և յուրաքանչյուր կիլոմետրի վրա տաշտակների տեղադրում: Անասնապահությամբ զբաղվող գյուղերի համար այս ծրագիրն առաջնահերթ է, բայց ընթացք չի տրվում. դրան խանգարել է համայնքների միավորումը:

Մինչև խոշորացումը, ըստ Մեծ Սեպասարի նախկին գյուղապետ Սերգեյ Սողոյանի,  համայնքի բյուջեից 570 հազար դրամ փոխանցվել է, իսկ հետո խոշորացված Աշոցք համայնքի շուրջ 300 մլն դրամանոց բյուջեում արդեն երկու տարի է՝ 18 մլն դրամ այս ծրագրի համար չի գտնվում, թերևս նաև այն պատճառով, որ Աշոցքի համայնքապետը դեռ այն ժամանակ հրաժարվել էր այս ծրագրից՝ ասելով, թե արոտների ջրարբիացման խնդիր չունի:

Կոոպերատիվների նախագահները մոտ մեկ ամիս առաջ խնդիրը ներկայացրել են կառավարություն: Արդեն ֆինանսավորող կողմի և համայնքների միջև պայմանագիր է կնքվել, որով Աշոցք խոշորացված համայնքի ղեկավարը պարտավորվել է համաֆինանսավորումը կատարել փուլ առ փուլ:

Ըստ Աշոցք համայնքի ղեկավարի տեղակալ Կարեն Աբրեյանի՝ մոտ 2 մլն դրամ արդեն փոխանցվել է ծրագրին, հիմա նախագծա-նախահաշվային աշխատանքների փուլն է: 370 մլն դրամ ընդհանուր արժեքով ծրագիրը կմեկնարկի հավանաբար հաջորդ տարի:

Համաֆինանսավորման տարբերակով Համաշխարհային բանկը պատրաստ է նաև գյուղտեխնիկայի ապահովման ծրագիր ներդնել, բայց այս խոշորացված համայնքը դրանից չի օգտվի. մեկ այլ ծրագրով արդեն գյուղտեխնիկա ներկրել է: