Ի՞նչ նկատի ունեն Բաքվում, երբ խոսում են Արցախ մարդասիրական օգնություն ուղարկելու մասին

Ինչի՞ հետ է կապված այն, որ Բաքվում հենց հիմա հանկարծ որոշեցին Արցախին օգնություն ուղարկել: Թեմային «Հորիզոնի» տաղավարում անդրադարձել է Արտյոմ Երկանյանը։

«Այսօր առավոտյան Ադրբեջանի «Կարմիր մահիկի» կազմակերպության նախագահը հայտարարեց, որ կազմակերպությունը երկու բեռնատար մեքենա է տեղափոխելու Արցախ, որով սնունդ, այլուր, հացահատիկ պետք է հասցնեն։ Այդ ամենն անվանել է մարդասիրական օգնություն: Կարևոր է ընդգծել որ, սովորաբար ազատ երկրում «Կարմիր մահիկի» ընկերությունը ազատ, պետությունից անկախ կազմակերպություն է:

Պարզաբանեմ, թե ինչ է այն ներկայացնում Ադրբեջանում: Բավական է հիշատակել, որ այդ կազմակերպությունն արդեն քառորդ դար է, ինչ ղեկավարում է մի մարդ, ով մեջլիսի պատգամավոր է և մեջլիսում ներկայացնում է իշխող կուսակցությունը (խոսքը Նվրոզալի Ասլանովի մասին է): Այսինքն՝ պարզ է, որ սա նախագահի աշխատակազմի ցուցումով իրականացվող առաքելություն է:

Եվս մի հետաքրքիր հանգամանք. այդ կազմակերպության ղեկավարը խոստովանել է, որ, բացի սննդամթերքից, այդ բեռնատարներով տեղափոխում են նաև «Կարմիր մահիկի» ընկերության սպասարկման համար անհրաժեշտ տեխնիկական միջոցները, վրանները և այլն: Այսինքն՝ դրանից պարզ է դառնում, որ հենց կազմակերպության ղեկավարը քաջ գիտակցում է, որ այդ ուղեբեռը Արցախ մտնելու շանս չունի, այսինքն՝ Աղդամից ոչ հեռու վրանային ճամբար պետք է բացեն ու շաբաթներով պետք է ապրեն այդ մարդիկ: Պարզ է, որ Արցախի իշխանությունների հետ չհամաձայնեցրած այդ գործողությունն իրականություն դառնալու շատ քիչ շանսեր ունի: Դե իսկ ամենահետքրքիրն այն է, որ, ինչպես հիշատակեցի, «Կարմիր մահիկի» կազմակերպության ղեկավարն անվանել է այս ամենը հումանիտար օգնություն. ընդգծում եմ հումանիտար բառը և դա պատահական չէ, եթե նկատի ունենանք, որ Ադրբեջանի իշխանավորներն ասում են, որ ոչ մի հումանիտար վտանգ Արցախին չի սպառնում, և հումանիտար աղետի մասին խոսելն անիմաստ է:

Փաստորեն ստացվում է, որ հակասություն կա, իսկ եթե այժմ պատրաստ են խոստովանել, որ հումանիտար աղետի վտանգ կա, ուրեմն հարց է առաջանում՝ ովքե՞ր են մեղավոր այդ հումանիտար աղետի առաջացման վտանգի համար, ովքե՞ր են կրելու այդ ամենի պատասխանատվությունը»,-ասել է Արտյոմ Երկանյանը:

Ինչպե՞ս են Բաքվում մտադիր կանխել միջազգային մարդասիրական օգնության հոսքը: Մանրամասները՝ ամբողջական հարցազրույցում: