Բարբին մեծ էկրաններին. ինչպե՞ս հանրահայտ տիկնիկը հայտնվեց ֆիլմում

Բարբի տիկնիկների մեծ հավաքածու ունենալը աղջնակների գլխավոր երազանքներից մեկն է: Միշտ երիտասարդ Բարբին կամ Բարբարա Միլիսենթ Ռոբերթսը այսօր արդեն 64 տարեկան է: Բարբին այնքան է սիրվել, որ շատերը դիմել են պլաստիկ վիրահատությունների՝ նմանվելու սիրելի հերոսին: Օրինակ՝ ամերիկուհի Սինդի Ջեքսոնը կատարել է շուրջ 55 պլաստիկ վիրահատություն: Այս տիկնիկի մասին նույնիսկ ֆիլմ է նկարահանվել:

2023 թ հուլիսի 21-ը համաշխարհային կինոարտադրության մեջ սպասված օրերից էր, քանի որ տեղի ունեցավ «Բարբի» ֆիլմի համաշխարհային պրեմիերան: Այն համարվում է տարվա գլխավոր ֆիլմերից մեկը:

Ինչպե՞ս ծնվեց Բարբին

Տիկնիկը ծնվեց «Mattel» ընկերությունում։ Այն ստեղծեց դրա հիմնադիր Էլիոթ Հանդլերը՝ կնոջ Ռութի հետ: Ենթադրվում է, որ հայտնի տիկնիկի նախատիպ է դարձել էրոտիկ դերասանուհի Բիլդ Լիլին:

Հանդլերի խոսքերով՝  իր աղջիկը՝ Բարբարան (որի անունով կոչվել է բարբի տիկնիկը), մանկության տարիներին հաճախ էր խաղում իր ընկերների հետ տիկնիկներով, որոնք պատրաստված էին թղթից: Բարբարան տիկնիկների համար թղթից հագուստներ էր պատրաստում։ Նա նկատում էր տիկնիկների անհրաժեշտությունը: Այսպես որոշեց ստեղծել առաջին բարբին:

Բարբի տիկնիկի գինը ընդամենը 3 դոլար էր։ Բարբիի ընկերը՝ Քենը, նրանից փոքր է 2 տարի 2 օրով:

Առաջին բարբին սև ու սպիտակ գծավոր լողազգեստով էր:

Բարբի տիկնիկներն այսօր

Բարբիի փիլիսոփայությունը մեկն է՝ ցույց տալ աղջիկներին, որ իրենք են որոշում՝ ինչպիսին լինել, դրա համար էլ պարբերաբար դուրս են գալիս նոր մոդելներ՝ տարբեր կազմվածքներով, մաշկի գույնով, ոճով և տեսքով. այն բազմազգ խաղալիք է: Վաճառքի են հանվում նաև հայտնի աստղերի տիկնիկ տարբերակները:

Ամենաթանկարժեք Բարբին վաճառվել է 302 000 դոլարով, քանի որ տիկնիկի վզնոցին կար 3 կարատ սպիտակ և 1 կարատ վարդագույն ադամանդ: Վաճառքից ստացված հասույթը տրամադրվել է քաղցկեղին ուղղված հետազոտություններին: Բարբի տիկնիկների ամենապահանջված մոդելներն են հարսնացուն և բալետի պարուհին:

Ինչպե՞ս Բարբին հայտնվեց ֆիլմում

Խաղալիքներ արտադրող Mattel Inc. ընկերությունը և Warner Bros. Pictures Group կինոստուդիան միավորվեցին ֆիլմ նկարահանելու համար, որի հերոսները կդառնան Barbie շարքի տիկնիկները: Ֆիլմի փոքր կադրում երևում է նաև Բարբիի ստեղծողի դուստրը:  Ֆիլմի ռեժիսորը՝ Գրետա Գերվիգը, օսկարակիր ֆիլմերի հեղինակ է: Հենց ֆիլմի առաջին կադրում Բարբիին մարմնավորող դերասանուհի Մարգո Ռոբին առաջին Բարբի տիկնիկի լողազգեստով է:

Գլխավոր հերոսների ընտրությունը

Դերասանուհի Մարգո Ռոբին հայտնի է «Ինքնասպանների ջոկատը» ֆիլմից, որտեղ մարմնավորում է Հարլի թագուհու կերպարը: Դերերը հակասական են, ինչը խոսակցությունների մեծ ալիք է բարձրացրել: Կընդունի՞ դերասանուհու նոր կերպարը լսարանը, պարզ կդառնա շուտով:

Ֆիլմի գլխավոր դերասաններից Քենին ընտրելիս բացի Ռայան Գոսլինգից ուրիշ ոչ ոքի չեն դիտարկել: Դերասանը պատմում է, որ առաջարկը ստանալուց հետո երկար է մտածել և միայն իր աղջկա Բարբի տիկնիկը պատահաբար հատակին գցած տեսնելուց հետո որոշել է համաձայնել:

Բարբիի հագուստներն ու վարդագույն ներկերի «դեֆիցիտը»

Թե՛ ֆիլմի նկարահանման, թե՛ բոլոր մեդիաարշավների ընթացքում ֆիլմի հերոսները կրել են օրիգինալ բարբիի հագուտների կրկնօրինակները: Իրենց գովազդային արշավների ժամանակ կարևոր է, որ նրանք համագործակցում են տարբեր բրենդների հետ և համատեղ թողարկում Բարբիի թեմատիկայով հավաքածուներ:

Ռեժիսորը բացահայտել է, որ նախագծի նկարահանումները նույնիսկ հանգեցրել են աշխարհում վարդագույն ներկի դեֆիցիտի։ Նա ցանկացել է նվազագույն չափով օգտագործել թվայնացում: Փոխարենը նկարահանումների համար օգտագործվել են ձեռքով վարդագույն ներկված մեծ թվով դեկորացիաներ: Սա, ըստ Գերվիգի, առաջացրել է այդ գույնի պակաս ամբողջ աշխարհում։

«Ես ցանկանում էի, որ վարդագույնը շատ վառ և առատ լիներ, քանի որ ես հիշում եմ, թե ինչու էի սիրում Բարբիին, երբ դեռ փոքր էի»,- ասել է ռեժիսորը:

Բարբիի պրեմիերայի օրվա գլխավոր դրեսկոդը վարդագույն, Բարբիին հիշեցնող  հագուստն էր: Բարբիի աշխարհի բոլոր սիրահարները պրեմիերայի օրը խորհրդանշական վարդագույնով էին:

PR մասնագետները բարձր են գնահատում ֆիլմի կատարած մեդիարաշավը, քանի որ ամենուր կարելի էր նկատել Բարբիին հիշեցնող, հուլիսի 21-ը՝ պրեմիերայի օրը ազդարարող դետալներ և վահանակներ: Ֆիլմի նկարահանման վրա ծախսվել է 145 միլիոն դոլար: Միայն թրեյլերը օրերի ընթացքում դիտել է ավելի քան 46 մլն մարդ:

Հեղինակներ՝ Հռիփսիմե Ավագյան, Միլենա Մկրտչյան