Գյումրիի սելեկցիոն կայանի նոր տնկարան-ջերմատանը աճեցնում են մարզի բնակլիմայական պայմաններին հարմարեցված ծառատեսակներ

Գյումրիի սելեկցիոն կայանում հիմնված տնկարան-ջերմատանը կաճեցվեն  տեղի բնակլիմայական պայմաններին հարմարեցված թփածառատեսակներ, իսկ տնկիները կօգտագործվեն մարզում անտառապատման ու կանաչապատման համար։ 250 քառակուսի մետր տարածքով ջերմատան և երկու հեկտար տնկարանի կառուցումն իրականացվել է «Էյ Թի Փի», «Ջինիշյան» հիշատակի և «Էներգետիկայի հայկական գործակալություն» հիմնադրամների աջակցությամբ և Եվրոպական միության միջոցներով։

Ջերմատանը երեք տեսակի 100 հազար տնկիներ են աճեցնում: Կենսածառից բացի,  սոճիներ ու կեչիների տնկիներ էլ կան: Ծառատեսակների աճեցման համար ստեղծվել են հատուկ պայմաններ ու բավարար ջերմաստիճան, իսկ սերմերի ծլողունակությունը բարձրացնելու համար օգտագործում են հատուկ հողախառնուրդ:

Շիրակի մարզի առաջին ջերմատանը աճում են այնպիսի ծառատեսակներ, որոնք  անտառապատման հիմնական մասն են կազմում, նպատակահարմար են հատկապես լեռնային ու բարձր լեռնային թեքություններում անտառային գոտիներ հիմնելու համար: Տնկիները ջերմատանը խնամվելուց բացի, կհարմարեցվեն տեղի բնակլիմայական պայմաններին, որից հետո նոր կտեղափոխվեն բաց տարածք:

«Սոճիները և կաղնիները համարվում են անտառի հիմնական մաս կազմող ծառատեսակները, այդ պատճառով ընտրվել են հենց դրանք, և որպեսզի ավելի հարմարեցված լինեն, աճեցվում են հենց մարզի տարածքում գտնվող ջերմատանը, որից հետո կլինի կլիմայի հարմարեցում։ Հարմարվելով Շիրակի մարզի կլիմային, կտեղափոխվեն անտառներ, տնկիներն իրենց ավելի լավ կդրսևորեն»,- ShantNews-ի հետ զրույցում նշել է ջերմատան պատասխանատու Արմինե Հակոբյանը։

Ջերմատունը կառուցված է նորարարական տեխնոլոգիաներով: Օդափոխության և ոռոգման համակարգերն աշխատում են ավտոմատ ռեժիմով, ջերմաստիճանն ու  խոնավությունը կարգավորվում է հատուկ սարքերի միջոցով:

Իսկ հարակից մոտ 2 հեկտար տարածքում աճեցնում են նաև կանաչապատման համար նախատեսված 8 թփատեսակներ ու 2 մշտադալար ծառատեսակ: Դեկորատիվ ու ծաղկող թփերը կտրամադրեն համայնքներին, դրանք  ցրտադիմացկուն  են ևհեշտ կհարմարվեն հյուսիսային տարածաշրջանի ցուրտ կլիմային:

Փակ արմատային համակարգով աճեցումից բացի, առաջին անգամ սերմերը փորձարկում են բաց արմատային համակարգով: Այս կերպ անտառապատման համար նախատեսված ծառատեսակներն ավելի շուտ են հարմարվում տեղի կլիմային։

«Դրսի գրունտում աճեցումը բաց արմատային համակարգով է, իսկ ներսի  աճեցումը համարվում է փակ արմատային համակարգ։ Բաց համակարգի դեպքում տնկիները ձմռանը ոչ մի խնդիր չունեն, կլիմային հարմարված են, չեն ցրտահարվում։ Փակ արմատային համակարգով աճեցում կարելի է  իրականացնել տարվա բոլոր եղանակներին, իրենց տնկման ժամանակահատվածը երկար է լինում»,-նշում է ջերմատան պատասխանատու Սերյոժա Ջիլավյանը։

Ջերմատուն-տնկարանում նախատեսվում է տարեկան աճեցնել հարյուր հազարավոր ծառաթփատեսակներ։ Մինչ այս անտառային գոտիներ հիմնելու համար տնկիներ էին ներկրվում հարևան մարզերից, որոնց կպչողականության տոկոսն այնքան էլ բարձր չէր: Մարզում աճեցվող տնկիները  անտառներ կտեղափոխվեն հաջորդ տարի աշնանը։ Նախատեսում են նաև ջերմոցի և տնկարանի տարածքներն ընդլայնել։