Գյումրեցի դպրոցականը քիմիայի միջազգային օլիմպիադայում բրոնզե մեդալ է նվաճել

Հայաստանը ապրիլի 30-ից մայիսի 6-ը Ղազախստանի Աստանա քաղաքում կայացած միջազգային 57-րդ Մենդելեևյան օլիմպիադայում նվաճել է 2 մեդալ՝ արծաթե և բրոնզե։ Մեր երկիրը ներկայացրել է պատանի քիմիկների խումբը, որի կազմում 4 աշակերտներ են Երևանից, Վանաձորից և Գյումրիից։ Բրոնզե մեդալը նվաճել է Գյումրի «Ֆոտոն» վարժարանի բնագիտական հոսքի 12-րդ դասարանի աշակերտ Տիգրան Մխիթարյանը։ Հարազատ կրթօջախում այսօր հանդիսավորությամբ են դիմավորել պատանի քիմիկոսին։ Տիգրանը մեկնել էր վարժարանում քիմիայից ստացած գիտելիքներով ու վերադարձել է բրոնզե մեդալով։

«Մենդելեևյան օլիմպիադան միջազգային իմ առաջին փորձն էր ու ուրախ եմ, որ ստացվեց արդյունքով նշել այդ փորձը։ Երեք փուլերից էր բաղկացած օլիմպիադան, երկու տեսական և մեկ ՝ փորձնական։ Փորձնականն իմ կարծիքով ամենահետաքրքիրն էր։ Կազմված էր 3 տարբեր փորձերից, որոնք միմյանց հետ կապված էին։ Առաջինը՝ թեյի մեջ պարունակվող կոֆեինի դուրս բերում, հետո կոֆեինի օքսիդացում ու օքսիդացված նյութերով ինչ-որ բաներ, քանակական որոշումներ։ Ընդհանուր օլիմպիադայում առավելագույնը հնարավոր էր վաստակել 230 միավոր։ Ես վաստակել եմ 130-ը »,- SHANTNEWS-ի հետ զրույցում նշել է Մենդելեևյան 57-րդ օլիմպիադայի բրոնզե մեդալակիր Տիգրան Մխիթարյանը։

Մինչ այս Տիգրանը դիպլոմներ է նվաճել քիմիայի հանրապետական օլիմպիադաներում, պատանի քիմիկների համար անցկացված մրցաշարերում։ Մենդելեևյան միջազգային օլիմպիադան ձևաչափով ու առաջադրանքներով շատ ավելի բարդ է եղել։ Մասնակցել է 116 աշակերտ՝ 21 երկրից։ Օլիմպիադան անցկացվել է 3 փուլով։ Մասնակիցներին առաջադրվել են տեսական խնդիրներ քիմիայի բոլոր բաժիններից և, իհարկե, գործնական մաս է ներառել, որի ընթացքում պատանի քիմիկոսները փորձեր են կատարել։

Մենդելեևյան օլիմպիադան առկա ձևաչափով է անցկացվել, իսկ ևս մեկ միջազգային՝ Ժաուտիկովյան 19-րդ օլիմպիադան առցանց է եղել։ Այստեղ ևս «Ֆոտոնի» սանը մեդալ է նվաճել։ Խոսքն արդեն «ինֆորմատիկա» առարկայի մասին է։ Ֆիզմաթ հոսքի 12-րդ դասարանի աշակերտ Դավիթ Ենգոյանը երկօրյա օլիմպիադայում նվաճել է բրոնզե մեդալ:

«Երկու օր անցկացվեց օլիմպիադան։ Բավական շատ երկրներ էին մասնակցում։ Հայաստանը 10-ից ավելի մասնակից ուներ, որոնցից 7-ը մեդալներ նվաճեցին։ Ես 600 միավորից վաստակեցի 198-ը։ Իմ ցուցանիշը մասնակիցների 50%-ի մեջ էր։ Այդ պատճառով էլ բրոնզե մեդալ նվաճեցի »,-S HANTNEWS-ի հետ զրույցում նշել է Ժաուտիկովյան 19-րդ օլիմպիադայի բրոնզե մեդալակիր Դավիթ Ենգոյանը։

Դավիթի ու Տիգրանի բրոնզե մեդալները վարժարանի միջազգային նվաճումների շարքում համապատասխանաբար 5-րդն ու 6-րդն են։ Սակայն այս տարվա միջազգային օլիմպիադաները դեռ ավարտված չեն։ 2 ամսից կայանալու է քիմիայի Համաշխարհային օլիմպիադան, որին վարժարանում լրջորեն պատրաստվում են։

« Մեր նույն սանը՝ Տիգրան Մխիթարյանը, ամռանը մասնակցելու է քիմիայի Համաշխարհային օլիմպիադայի, որը կայանալու է Շվեյցարիայի Ցյուրիխ քաղաքում։ Անհամեստություն չհամարվի, բայց կրկին մեդալի ակնկալիք ունենք այդ օլիմպիադայից։ Վերջին 3 տարիներին «Ֆոտոն» վարժարանը միջազգային օլիմպիադաներում 6 մեդալի է արժանացել, սպասում ենք յոթերորդին»,- SHANTNEWS-ի հետ զրույցում  ասել է Գյումրիի «Ֆոտոն» վարժարանի տնօրեն Կարինե Պետոյանը։

Միջազգային օլիմպիադաներում հաղթանակները լայն հնարավորություններ են տալիս աշակերտներին ընդունելության հարցում։ Կարող են համապատասխան բաժիններ ընդունվել առանց միասնական քննությունների։