Ունենք իրավիճակ, երբ բոլոր դիմորդներն ընդունվում են բուհեր․ Նիկոլ Փաշինյան

Հայաստանի բուհական համակարգն, ըստ ՀՀ վարչապետ Նիկոլ Փաշինյանի, ունի լուրջ պրոբլեմ, և ամենամեծ խնդիրներից մեկն այն է, որ բուհերը զանգվածաբար ունեն դիմորդի և ուսանողի խնդիր։ Վարչապետն այդ մասին նշել է իր ֆեյսբուքյան ուղիղ եթերի ժամանակ։

«Ըստ էության՝ ունենք իրավիճակ, երբ բոլոր դիմորդներն ընդունվում են բուհեր, ունենք մեկ բացառություն, և դա Բժշկական համալսարանն է։ Ի՞նչ առանձնահատուկ բան կա․ կա հետևյալը, որ դեռ խորհրդային տարիներից Բժշկական համալսարանն իր քաղաքականության մեջ եղել է արտերկրից ուսանողներ ներգրավող, հիմա բազմաթիվ ուսանողներ են ներգրավված, ինչը հնարավորություն է տալիս չունենալ ուսանողի, դիմորդի խնդիր, հետևաբար՝ շատ ավելի լավ ֆինանսական վիճակում է, շատ ավելի մեծ պլաններով է գործում ռազմավարությունը։ Մեր բուհական համակարգն այս տրամաբանության մեջ պետք է կառուցված լինի, միտված լինի արտերկրից ուսանող բերելուն»,- ասաց նա։

Փաշինյանն ընդգծեց՝ աշխարհում բազմաթիվ առաջատար բուհեր կան, բայց միշտ էլ կա հնարավորություն՝ ունենալու գին-որակ այնպիսի հարաբերակցություն, որ լինեն հազարավոր դիմորդներ, որոնց դա հետաքրքիր է։ Նրա խոսքով՝ եթե կա Քեմբրիջ, Հարվարդ, Կոլումբիայի համալսարան, դա չի նշանակում, որ այլ համալսարաններ չկան։ Նա բերեց իր երեխաների օրինակը, նշեց՝ իր երեխաները սովորել են Տարտուի համալսարանում, որտեղ գները շատ մատչելի են, անգամ համադրելի են հայաստանյան որոշ բուհերի վարձավճարների հետ։

«Եթե հայաստանյան բուհերում իրականացվեն ռեֆորմներ, որ բոլոր բուհերը միտված լինեն արտերկրից ուսանող ներգրավելուն, սահմանեն գին-որակ գրավիչ հարաբերակցություն, միշտ էլ աշխարհում կա սեգմենտ, որի համար եղած բուհերը ինչ-ինչ պատճառներով կամ թանկ են, հարմար չեն և այլն։ Բուհական համակարգի փոփոխությունները, և ոչ միայն բուհական, կարևոր են մեր տնտեսության զարգացման համար»,- ասաց նա։

Վարչապետը նշեց, որ նույն տրամաբանությամբ պետք է շարժվել նաև առողջապահական քաղաքականության դեպքում։ Նա ասաց, որ կարևոր է՝ կարողանալ առողջապահական քաղաքականությունն իրականացնել այնպես, որ այն գրավիչ լինի արտերկրից պոտենցիալ հաճախորդների համար, ովքեր կգան այստեղ այդ ծառայություններից օգտվելու։

«Նույնը վերաբերում է գիտությանը, այն, ըստ էության, այսօր դարձել է գլոբալ երևույթ, մենք այստեղ ականատես եղանք՝ ինչպես են մեր գիտնականները մասնակցում գլոբալ նախագծերի։ Այսինքն՝ պարտադիր չէ, որ գիտնականը լինի մի տիեզերանավի կողքին կամ այլ գիտահետազոտական ինստիտուտում։ Նրանք պետք է կարողանան այստեղից իրենց ծառայությունները մատուցել, նաև փորձը փոխանցել այլ սերունդների, ունենան ծառայություններն արտահանելու հնարավորություն»,- ասաց նա՝ հավելելով, որ գիտությունը պետք է գործնական գործառույթներ իրականացնի տնտեսության մեջ։