Ձյունն ու մերկասառույցը տրավմաների և կոտրվածքների պատճառ․ Գյումրի ԲԿ-ում կան հոսպիտալացվածներ

ԳյումրիԲԿ-ի թերապևտիկ և ինֆեկցիոն բաժանմունքների հիվանդասենյակներում ազատ մահճակալներ կան, այս մի քանի օրերին գրիպով  կամ սուր շնչառական վիրուսին բնորոշ ախտանշաններով հոսպիտալացումները պակասել են, թեև օդակաթիլային վարակների վտանգավոր շրջանը դեռ պահպանվում է։

«Ի տարբերություն հունվար ամսվա ծանրաբեռնված վիճակի, փետրվար ամսին կարծես թե դիմելիությունը մի փոքր նվազել է, հիմա թերապևտիկ բաժանմունքում 30 մահճակալներից զբաղված են 26-ը, այդ թվում՝ ունենք 8 թոքաբորբով հիվանդներ: Հիմա բաժանմունքը ծանրաբեռնված է հիմնականում խրոնիկ հիվանդներով, բրոնխիտներով և սիրտ-թոքային անբավարարությամբ հիվանդներով»,- իրավիճակը ներկայացրել է Գյումրի ԲԿ-ի թերապևտիկ բաժանմունքի վարիչ Լիլիթ Սարգսյանը:

Բաժանմունքներում ստացիոնար բուժում ստացողները հիմնականում  թթվածնային սարքերով շնչող  հիվանդներն են, որոնց մոտ հիվանդության բարդացումներ են։ Այս վիրուսին բնորոշ կլինիկական  որոշ նշաններ ու հատկապես չոր բնույթի հազը պահանջում  են երկարատև բուժում։

«Գրիպը ծանր հիվանդություն է համարվում, վերին շնչառական ուղիները ավելի քիչ են ախտահարվում, քան ավելի ներքևինը, այսինքն՝ բրոնխները, թոքերը: Գրիպը սիրում է ախտահարել. խորը ինտոքսիկացիա է առաջանում  հիվանդության ժամանակ։ Հազը, եթե աբստրուկտիվ բրոնխիտ է զարգանում, կարող է երկար ժամանակ շարունակվել ու դժվարությամբ բուժվել»,-նշում է  Գյումրի ԲԿ-ի ինֆեկցիոն բաժանմունքի վարիչ Կարինե Տոնոյանը:

Բժշկական կենտրոն դիմած բոլոր քաղաքացիները նմուշառվում են, սա էլ  կորոնավիրուսի դեպքերը բացառելու համար։ Մինչ այժմ դրական դեպքեր չեն ունեցել։ Ըստ մասնագետների, սուր ռեսպիրատոր վիրուսների ակտիվացումը հնարավոր է Քովիդ 19-ի վարակվածության նվազմամբ է պայմանավորված։

Թերապևտիկ ու ինֆեկցիոն բաժանմունքներում դիմելիությունը պակասել է, փոխարենն ավելացել է վնասվածքաբանության և օրթոպեդիայի բաժանմունքում։ Ձյունն ու մերկասառույցը տարբեր աստիճանի տրավմաների, կոտրվածքների պատճառ են դարձել։ Ամեն օր տուժածներ են հոսպիտալացվում՝ մեծ մասը վիրահատական միջամտության անհրաժեշտությամբ։

«Վերջին մի քանի օրերին 5-6  վիրահատություն ենք օրական կատարում, որոնց գերակշիռ մասը կոտրվածքներով, տրավմաներով հիվանդներն են: Վերջին մի քանի օրերի ձյան տեղումների պատճառով են մեր բաժանմունքում  տուժած քաղաքացիների դիմելիությունն ավելացել: Էս պահին մենք ունենք 18 հիվանդներ, մաքսիմում փորձում ենք արագ բոլորին վիրահատել, որ մահճակալային ծանրաբեռնվածությունը թեթևացնենք»,- նշում է Գյումրի ԲԿ-ի վնասվածքաբանության և օրթոպեդիայի բաժանմունքի բժիշկ Ջոն Կարապետյանը:

Վիրահատությունները, որոնք համարվում են բարդ աստիճանի, կատարվում են տեղի բժիշկների ուժերով, հավելյալ մասնագետներ ներգրավելու անհրաժեշտություն չի եղել։

Հոսպիտալացված և վիրահատվածների մեջ կան նաև օտարերկրացիներ, որոնք ժամանակավոր են գտնվում Գյումրիում կամ որպես զբոսաշրջիկ են այցելել։ Սառած փողոցներով անզգույշ քայլելու պատճառով կոտրվածքներ են ստացել։ Վնասվածքաբանության և օրթոպեդիայի բաժանմունքում փորձում են պլանային  ու  կոտրվածքների հետևանքով անհետաձգելի վիրահատությունները համատեղել, որպեսզի բաժանմունքի աշխատանքում ծանրաբեռնվածություն չառաջանա։