Արթիկ համայնքում 2022-ի սուբվենցիոն ծրագրերի հիմնական մասը չի իրականացվել․ աշխատանքները կսկսվեն այս տարվա ծրագրերի հետ միաժամանակ

2021 թվականին Արթիկի տարածաշրջանը, որպես խոշորացված համայնք, ձևավորվեց 23 գյուղական և մեկ քաղաքային բնակավայրով, բայց տեղական ինքնակառավարման մարմինը՝ ավագանիով ու նոր աշխատակազմով սկսեց աշխատել ավելի ուշ՝ 2022-ի մարտից, նույն այն ժամանակահատվածում, երբ սուբվենցիոն հայտերի ներկայացմանը մնացել էր մեկ ամիս։ Համայնքապետարանը հասցրեց մշակել համայնքային խնդիրների փաթեթը, բայց դրանց մեծը 2022-ին մեկնարկին  չհասավ, թեև շինմրցույթները կայացել էին, շինընկերությունները հայտնի էին:

Փոխանցիկ է դարձել մոտ 251 միլիոն դրամ արժողության Արթիկի կենտրոնական հրապարակի և հարակից փողոցների ու մայթերի ասֆալտապատման, սալապատման ծրագիրը: Անցած տարվա ծրագրով չէին սկսվել նաև Արևշատ,Նահապետավան, Սարալանջ և Հառիճ գյուղերի ճանապարհների  սալապատման աշխատանքները, որի համար պետությունն ու համայնքը ներդրել են 172 միլիոն դրամ:

Ստացվում է, որ 2022-ի և այս տարվա  սուբվենցիոն ծրագրերը զուգահեռ են մեկնարկելու։ Հին ու նոր ծրագրերը սկսել Արթիկի համայնքային բյուջեի սեփական եկամուտների հավաքագրումները թույլ տալիս են, ընդ որում, աշխատանքների և՛ ծավալն է համեմատաբար մեծ, և՛ ներդրման չափը։

«Հավաքագրումները 2022 թվականին կատարվել է գերազանց, այսինքն՝ պլանավորվել էր սեփական եկամուտները 496,266 հազար դրամ, բայց փաստացի հավաքագրվել է 510,211 հազար դրամ, այսինքն՝ սեփական եկամուտների պլանը կատարվել է 102,8 տոկոսով»,-նշել է Արթիկի համայնքապետարանի  ֆինանսատնտեսագիտական և եկամուտների հավաքագրման բաժնի պետ Էմմա Յայլոյանը։

Արթիկ քաղաքի առաջնահերթ լուծում պահանջող խնդիրների ցանկում շենքերի տանիքների նորոգումն է։ Նախորդ տարվա ծրագրում 5 շենքեր էին ընդգրկվել և, ի դեպ, 2022-ի սուբվենցիոն միակ ծրագիրն է եղել, որ ժամկետներում ավարտել են։ Այս տարի տանիքների նորոգման ենթակա շենքերի թիվն ավելացրել են, 15  բնակելիների տանիքներ կվերանորոգվեն։ Համայնքապետարանն այս տարվա սուբվենցիոն փաթեթում ներառել է նաև մանկապարտեզների նոր շենքերի կառուցման, հների վերանորոգման ու այլ ծրագրեր:

«Ծրագրերից մեկն Արթիկ համայնքի թվով վեց գյուղերի գազատարի ներքին ցանցի անցկացման աշխատանքներն են։ Այդ գյուղերն են՝ Գեղանիստ, Հոռոմ, Լեռնակերտ, Մեծ Մանթաշ, Փոքր Մանթաշ և Հայրենյաց»,-նշում է Արթիկի համայնքապետարանի աշխատակազմի  քարտուղար Արա Սուքիասյանը։

Բոլոր ծրագրերը հիմա գտնվում են նախագծային փուլում: Արթիկ համայնքում նախատեսում են նաև ծրագրեր իրականացնել Հայաստանի զարգացման հիմնադրամի հետ: Արդեն ընթանում են 70-ականներին կառուցված էստակադայի հիմանորոգման աշխատանքները։  Համայնքային ավտոպարկն էլ են թարմացնելու, բավարար քանակության գյուղտեխնիկա չունեն, ինչպես նաև կոմունալ սպասարկման անհրաժեշտ մեքենա-մեխանիզմներ։

«Մենք հիմա  տեխնիկա չունենք, համայնքային ենթակայության ոչ մի միավոր տեխնիկա չունենք, միայն աղբատար մեքենա ու ջրցան ունենք։ Անցած տարի շատ ձյուն եկավ, ուժեղ բուք եղավ, մեր վերին ենթաշրջանի գյուղերի փակ ճանապարհները մենք բացել չէինք կարողանում։ Մի կերպ մասնավորի տեխնիկան ներգրավելով կարողացան խնդիրը կարգավորել։ Իսկ եթե մեր  տեխնիկան ունենանք, կկարողանանք արդեն լիարժեք սպասարկում իրականացնել նաև կոմունալ ոլորտում»,- նշում է համայնքապետարանի աշխատակազմի քարտուղարը։

Նոր տեխնիկայի ձեռք բերումը կօգնի նաև արդյունավետ աղբահանություն իրականացնել Արթիկում և գյուղերում: Արթիկում այժմ աղբահանություն է  կատարում մրցույթով շահած մեկ ընկերություն, բայց քաղաքը մաքուր պահել չի ստացվում, կենտրոնական ու երկրորդական բոլոր փողոցներում աղբ կա կուտակված:

2022-ին աղբահան ընկերությունը Արթիկում իրականացրել է մոտ 50 միլիոն դրամի մաքրման աշխատանքներ, ըստ համայնքապետարանի, աշխատում են շահույթով: Արթիկում առաջնահերթ խնդիրներից է մնում վթարային շենքերի ամրացումը, այս ուղղությամբ առաջարկներով դիմել են կառավարություն, խնդիրը համայնքային բյուջեի միջոցներով լուծելի չէ։ Այս տարի միայն կմեկնարկի շինարարական մեկ ծրագիր՝ Արթիկի առողջության կենտրոնի համար նոր շենքի կառուցումը, նախագծային ու մրցութային փուլերն ավարտված են: