Չարլզ III թագավորի թագադրման արարողությունը տեղի է ունենալու մայիսին. նախատեսվում է լուսային շոու և համերգ

Բուքինգհեմյան պալատը հրապարակել է Չարլզ III թագավորի և կոնսորդտ թագուհի Կամիլայի թագադրման ծրագրերը: Բացի Լոնդոնի Վեսթմինսթերյան աբբայությունում պաշտոնական արարողությունից, Վինձորի ամրոցում տեղի կունենա համերգ, որին կմասնակցեն «աշխարհի ամենահայտնի երաժշտական ​​արտիստները» և հատուկ հավաքված «թագադրման երգչախումբը»։
Համերգը, որը նախատեսված է մայիսի 7-ին, կհեռարձակի BBC-ն։

Ինչպես հայտնի է, նախատեսվում է լուսային շոու՝ օգտագործելով լազերներ և անօդաչու թռչող սարքեր, սակայն պլանավորված չէ փարոսներ վառել ամբողջ երկրում, ինչը նախորդ թագադրման ավանդույթների մի մասն էր։

Բուն թագադրումը տեղի կունենա մայիսի 6-ին Վեսթմինսթերյան աբբայությունում։ Օրը կսկսվի հանդիսավոր երթով դեպի տաճար, և կավարտվի Բուքինգհեմյան պալատի պատշգամբում թագավորի և թագուհու հայտնությամբ։

Թագավորը և թագուհին ասել են, որ հույս ունեն, որ թագադրումը հնարավորություն կտա ամբողջ երկրին մասնակցել տոնակատարությանը և նշել իրենց հետ:

Թե կոնկրետ ով է մասնակցելու Վինձորում կայանալիք համերգին, դեռ հայտնի չէ։ Սակայն դրա կազմակերպիչները հասկացրել են, որ խոսքը «աշխարհի խոշորագույն արտիստների» մասին է։

Մենք դեռ չգիտենք բոլոր մանրամասները, բայց, ամենայն հավանականությամբ, արարողությունն ավելի կարճ և համեստ կլինի, քան 1953 թվականին Եղիսաբեթ II-ի թագադրումը, որը տևել է երեք ժամ։

Ավելի վաղ հայտնի էր դարձել, որ Չարլզ III-ը որոշել է արարողությունից բացառել որոշ ավանդական պահեր, օրինակ՝ հավատարմության երդումը, որը պետք է կատարեին  թագավորական ընտանիքի բոլոր տղամարդիկ, այսպես կոչված, «արքայական դուքսերը»:
Դա, սակայն, չի ազդի թագավորի ավագ որդու՝ Ուելսի արքայազնի վրա, ով պարտավոր կլինի ծնկի գալ հոր առաջ և հավատարմության երդում տալ նրան «թե մարմնով, թե հոգով»։

Այժմ հատուկ թագավորական հանձնաժողովը որոշում է, թե ավանդական թագադրման որ դերերը պետք է պահպանվեն, իսկ որոնք՝ վերացնեն, հայտնում է ԲԻ ԲԻ ՍԻ-ն:

1953 թվականին Եղիսաբեթ II-ի թագադրմանը մասնակցել է ավելի քան 8000 հյուր։ Սպասվում է, որ Չարլզ III-ի թագադրմանը հրավիրվածների թիվը չորս անգամ պակաս կլինի, քանի որ Վեսթմինսթերյան աբբայությունը չի կարող ավելի քան 2200 մարդ ընդունել։

Հնարավոր է, որ թագադրությանը հրավիրվածների դրես-կոդը լինի ավելի ժամանակակից և ոչ այնքան խիստ, որքան Եղիսաբեթ 2-րդինը։
Թագադրման ծախսերը, որոնց համար վճարում է պետությունը, կհասցվեն նվազագույնի։ Համայնքների պալատի գրադարանի տվյալներով՝ 1953 թվականին թագադրումն արժեցել է 18,8 միլիոն ֆունտ սթեռլինգ՝ 2021 թվականի գներով։

Թագադրման արարողությունը տեղի կունենա Վեսթմինսթերյան աբբայությունում, և, ինչպես միշտ, լցված կլինի կրոնական սիմվոլիզմով, բայց նաև խոստանում է լինել շատ տպավորիչ: