Թուրքիան «С-400»-ներից չի հրաժարվի նույնիսկ պատժամիջոցների դեպքում. Էրդողան

Ռուսաստանից «С-400» զենիթահրթիռային համակարգեր գնելու մտադրությունից Թուրքիան չի հրաժարվի նույնիսկ հնարավոր պատժամիջոցների պարագայում։ Այս մասին հայտարարել է Թուրքիայի նախագահ Ռեջեփ Թայիփ Էրդողանը։

«Դուք ոչինչ չէիք ասում Հունաստանին (այդ երկիրը Ռուսաստանից գնել է «С-300» համակարգեր – խմբ.), ասում էիք, որ Թուրքիային թույլ չեք տա գնել «С-400» համակարգեր, Ռուսաստանի հետ համաձայնագիրը համարում էիք սխալ։ Դուք նաև ասում էիք, որ կարող եք պատժամիջոցներ մտցնել։ Մենք չենք պատրաստվում ձեզ հաշվետու լինել։ Մենք առանց զիջումների կգնանք ճիշտ ճանապարհով՝ մեր սեփական նպատակներին հասնելու համար», – հայտարարել է Թուրքիայի նախագահը:

Էրդողանի խոսքերը վերաբերում են ԱՄՆ-ի կողմից հնարավոր պատժամիջոցներին, որոնք սահմանված են, մասնավորապես, Ռուսաստանի ռազմարդյունաբերական ընկերությունների նկատմամբ։ Դրանով իսկ արգելվում են գործարքներն այդ ընկերությունների հետ, ինչը նշանակում է, որ պատժամիջոցները կարող են անդրադառնալ նաև Ռուսաստանին զենք պատվիրող պետությունների վրա։

Հավանական է, որ այս պատժամիջոցների ցանկում ռուսական ռազմարդյունաբերական ընկերությունները ներառելիս Վաշինգտոնը հաշվի է առել նաև Թուրքիայի՝ Ռուսաստանի «С-400» համակարգեր գնելու գործարքն ու փորձել է խափանել այն:

Սակայն թուրքական ղեկավարությունн արդեն տևական ժամանակ բոցաշունչ հայտարարություններ է անում այն մասին, որ իրենք չեն հրաժարվի այս գործարքից, քանի որ դա հուսալի հակաօդայինն պաշտպանություն ունենալու՝ իրենց միակ տարբերակն է, սակայն իրականում սա կարող է լինել թուրքական քաղաքականության մի մասը։

Անկարան իրականում ցանկանում է ունենալ սեփական արտադրության ՀՕՊ համակարգ և կախված չլինել գերտերություններից։ Բանն այն է, որ զենք վաճառելով Թուրքիային՝ այդ գերտերությունները կարող են ժամանակ առ ժամանակ քաղաքական պահանջներ ներկայացնել Անկարային՝ սպառնալով դադարեցնել զինամթերքի մատակարարումը կամ այդ համակարգերի սպասարկումը (առանց սպասարկման ցանկացած զինատեսակ շարքից դուրս է գալիս նախատեսվածից ավելի շուտ)։

Թուրքիան համաձայն կլիներ այդ զենիթահրթիռային համակարգերը գնել ՆԱՏՕ-ի դաշնակիցներից ու հատկապես ԱՄՆ-ից, որն արտադրում է Patriot համակարգեր։ Սակայն թուրքական կողմի պայմաններից մեկը համակարգերի արտադրության տեղայնացումն էր՝ զինատեսակն ու դրա հարակից ամեն ինչն արտադրելու տեխնոլոգիան ներկրել ու ներդնել Թուրքիայում՝ հետագայում կախվածությունից խուսափելու համար։

Վաշինգտոնը, սակայն, իրեն նման ճոխություն թույլ տալ չի կարող, քանի որ կկորցնի ազդեցությունն, ու նաև վտանգ կա, որ այդ համակարգերի սխեմաները կարող են հայտնվել այլ կողմերի (օրինակ` Ռուսաստանի) ձեռքում, քանի որ Անկարան մերթ ընդ մերթ շատ լավ հարաբերություններ է հաստատում Մոսկվայի հետ։

Թուրքիայի կողմից հակաօդային սպառազինության ձեռքբերումների հնարավոր տարբերակների ու դրանց ձախողման մասին ավելի մանրամասն գրել ենք ShantNews-ի նախորդ հոդվածներից մեկում։

Ինչ վերաբերում է Ռուսաստանի ռազմարդյունաբերական ընկերությունների վրա սահմանված պատժամիջոցների ու Հայաստանի վրա դրանց ազդեցությանը, ապա այս հարցին անդրադարձել է ՀՀ ԱԳ նախարարի տեղակալ Շավարշ Քոչարյանը։

«Չափազանցվում է այն վտանգը որը կա, բայց դա չի նշանակում, որ պետք է անուշադրության մատնել, պետք է անընդհատ հետևել: Չկա հասունացած հարց, որը պահանջի թե ռուսաստանյան, թե ամերիկյան կողմի հետ բնակցություններ», – ասել է նա:

Փոխնախարարի խոսքով՝ հայկական կողմը շահագրգիռ է պահպանել հարաբերությունները Ռուսաստանի հետ փոխգործակցության դաշտում, քանի որ դա Հայաստանի անվտանգության կարևոր բաղադրիչներից է։