Շվեդ լրագրողները հետաքննել են Բաքվի կողմից Եվրախորհրդարանի պատգամավորներին կաշառելու փորձերը

Լրագրողական հետքննությունների գործում մասնագիտացող Blankspot շդեդական պարբերականը սենսացիոն բացահայտումներ է արել Բաքվի կողմից Եվրախորհրդարանի պատգամավորներին կաշառելու փորձերի մասին: Հատաքննողների հայտնաբերած փաստերը վկայում են այն մասին, որ խավիարային դիվանագիտությանը Բաքվում նոր զարկ են տվել:

Կոնկրետ ի՞նչ է հայտնի և դա ինչպիսի՞ ազդեցություն է ունեցել եվրոխորհդարանականների մոտեցումների վրա: Թեմային «Հորիզոնի» տաղավարում անդրադարձել է Արտյոմ Երկանյանը:

«Մեր շվեդացի գործընկերները հետազոտել են եվրախորհրդարանականներից երկուսի գործունեությունը: Առաջինը Գերմանիայից ընտրված էթնիկ թուրքական ծագում ունեցող պատգամավոր Էնգին Էրողլին է, իսկ մյուսը Սլովենիան ներկայացնող պատգամավոր Ֆրանկ Բոգովիչը:

Հետաքրքիր է, որ ժամանակին երկուսն էլ Ադրբեջանին հետևողական ձևով քննադատող պատգամավորների շարքում էին, սակայն ամեն ինչ փոխվեց այն բանից հետո, երբ այս տարվա սեպտեմբերի վերջին նրանք համաձայնեցին ընդունել Ադրբեջանի կառավարության հրավերը և մեկնեցին Ադրբեջան, բնական է՝ ադրբեջանական փողերով:

Հիշեցնեմ, որ մինչ այդ նրանք քվեարկել էին հայտնի բանաձևի ընդունման օգտին, որը դատապարտում էր՝ Ադրբեջանի կողմից ԼՂ-ում հայկական պատմական ժառանգությունը ոչնչացնելու փաստերը: Այժմ բոլորովին այլ բովանդակության տեքստերով են հանդես գալիս:

Լրագրողները պարզել են, որ սեպտեմբերի վերջին կայացած այդ ուղևորությունը ֆինանսավորվել է Ադրբեջանի պետական բյուջեից այն դեպքում, երբ եվրախորհրդարանականները պարտավոր են հայտարարագրել յուրաքանչյուր օտարերկրյա այցելություն, եթե այն ֆինանսավորվում է այլ աղբյուրներից: Պատգամավորներն այս այցելությունը չեն հայտարարագրել՝ հավանաբար նպատակ ունենալով թաքցնել այն, որ Բաքվում են եղել: Սակայն Բաքվի լրատվամիջոցներն ուշադիր հետևում և լուսաբանում էին նրանց այցելությունը, և Բաքվում նրանք անգամ անզգուշություն են ունեցել լրագրողներին հարցազրույց տալու:

Մեկ այլ հանգամանք. ընդունված կանոնը պահանջում է, որ Եվրախորհրդարանի պատգամավորն իրավունք չունի 150 եվրոյից թանկ նվեր ստանալ, իսկ եթե ստիպված է այդպիսի նվեր ստանալ, ապա  պարտավոր է հայտարարագրել այն: Պատգամավորները չեն հայտարարագրել Բաքվում ստացած ոչ մի նվեր:

Լրագրողները պարզել են, որ նրանք Բաքվում մնացել են ամենաթանկ հյուրանոցներից մեկում՝ Մարիոթում, ինչի համար Ադրբեջանի կառավարությունը մի քանի հազար եվրո է վճարել, ինչը ևս կարելի է դիտարկել որպես նվեր, ես անգամ կասեի՝ կաշառք: Այդ ամենի մասին նույնպես որևէ հայտարարագրում չի եղել:

Ի դեպ նշեմ, որ այդ հյուրանոցը պատկանում է Իլհամ Ալիևի տիկնոջը՝ երկրի առաջին փոխնախագահ Մեհրիբան Ալիևային, Փաշա Գրուպ հոլդինգի մասն է կազմում:

Այս ամենը հաշվի առնելով, շվեդացի լրագրողները հարց են տալիս. ինչպե՞ս կարող է եվրախորհրդարանականն իրեն թույլ տալ մեկնել մի երկիր դիկտատորի հրավեր-առաջարկով և լոբբինգ անել մի պետության, որը «Ֆրիդոմ Հաուս» ժողովրդավարության վարկանիշում  100 միավորից ընդամենը 9 է ստանում»,- ասաց Արտյոմ Երկանյանը:

Ի՞նչ հետևանք կարող է ունենալ այս ամենը եվրապատգամավորների համար:

Մանրամասները՝ տեսանյութում: